ជប៉ុន ផ្តល់ម៉ាស៊ីនរាវមីនជំនាន់ថ្មី៣០គ្រឿងបន្ថែមទៀត មានតម្លៃជាង ១លាន៣សែនដុល្លារដល់កម្ពុជា

រដ្ឋាភិបាលជប៉ុន បានផ្តល់ម៉ាស៊ីនរាវមីនទំនើបជំនាន់ថ្មីចំនួន៣០គ្រឿងបន្ថែមទៀត ដែលគិតជាទឹកប្រាក់មានតម្លៃប្រមាណ ជាង១លាន ៣សែនដុល្លារអាម៉េរិក ជូនដល់កម្ពុជាសម្រាប់គាំទ្រដល់សកម្មភាពបោសសម្អាតមីន។

អគ្គនាយក​នៃមជ្ឈមណ្ឌល​សកម្មភាព​កំចាត់មីន​កម្ពុជា (CMAC) លោក​ ហេង រតនា​ បានឱ្យដឹងថា នៅថ្ងៃទី១១​ ខែមីនា​ ឆ្នាំ២០២៦នេះ​ នៅទីបញ្ជាការ CMAC ភ្នំពេញ​ បានទទួលម៉ាស៊ីនរាវមីនទំនើបជំនាន់ថ្មីប្រភេទAdvanced Land­mine Ima­ging Sys­tem (ALIS) mine detect­ors ចំនួន៣០គ្រឿង​ ដែលគិតជាថវិកាមានចំនួនប្រមាណជាង១លាន៣សែនដុល្លារអាមេរិក​ ជាជំនួយរបស់រដ្ឋាភិបាលជប៉ុនផ្តល់ជូនរាជរដ្ឋាភិបាលកម្ពុជា ដើម្បីគាំទ្រសកម្មភាពអង្គភាពCMAC បានអនុម័តតាំងពីដើមឆ្នាំ២០២៥​ និងបានដំណើរការដេញថ្លៃទិញដែលសម្ភារបច្ចេកទេសខ្លះត្រូវចំណាយពេលវេលាប្រមាណពី១-២ឆ្នាំទើបអាចទទួលបាន។

សូមបញ្ជាក់ថា​ ម៉ាស៊ីនរាវមីនប្រភេទ (ALIS) នេះ ត្រូវបានស្រាវជ្រាវ និងអភិវឌ្ឍន៍បច្ចេកទេសរួមបញ្ចូលគ្នារវាង​ប្រពន្ធ័ស្រូបសារធាតុដែកនិងប្រពន្ធ័រ៉ាដាកំណត់ចំណុច​រូបភាព (a metal detector and Ground Penetrating Radar, GPR)​ ដោយសហការរវាងអង្គភាពCMACនិងសកលវិទ្យាល័យTOHOKU ជប៉ុន​ដឹកនាំដោយលោកសាស្ត្រាចារ្យ​  Prof. Motoyuki Sato ដែលចាប់ផ្តើមតាំងពីឆ្នាំ២០០៥-២០០៦​ ពោលមានរយៈពេលជាង២០ឆ្នាំ​ ទើប​សម្រាចបានជោគជ័យដ៏ថ្លៃថ្លាមួយនេះ។ ម៉ាស៊ីនរាវមីននេះ​ ប្រៀបដូចឧបករណ៍ស្គែនមើលរូបភាពក្រោមដី​ ដែលមានប្រយោជន៍ការពារសុវត្ថិភាពនិងល្បឿននៃការបោសសម្អាតគ្រាប់មីន និងសំណល់យុទ្ធភណ្ឌសង្គ្រាមកាន់តែមានប្រសិទ្ធភាពថែមទៀត។

នៅក្នុងខែមីនា ឆ្នាំ ២០២៦ នេះ ជប៉ុនក៏បានផ្តល់ម៉ាស៊ីនបោសម្អាតមីនមន្ត (Robot) ចំនួន ៤គ្រឿងដែលនឹងត្រូវពង្រាយប្រតិបត្តិការនៅជួរមុខ ដើម្បីចូលរួមរំដោះផ្ទៃដីរងផលប៉ះពាល់ដោយសំណល់គ្រាប់យុទ្ធភណ្ឌសង្គ្រាមថៃឈ្លានពាន និងគ្រាប់មីន ដើម្បីធានាសុខសុវត្ថិភាពជូនប្រជាពលរដ្ឋ។ ព្រមទាំងផ្តល់គ្រឿងចក្រកម្ទេចមីនថ្មីទំនើប ប្រភេទ KOMATSU ដើម្បីចូលរួមកម្ទេចសំណល់យុទ្ធភណ្ឌសង្គ្រាម៕