គ្រួសារមួយចាប់របរចិញ្ចឹមកូនមាន់ ក៏អាចរកចំណូលមកផ្គត់ផ្គង់គ្រួសារបានដែរ

គ្រួសារអ្នកស្រី ពុត សុជា រស់នៅភូមិត្រពាំងសង្កែ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ បាន​ជ្រើស​យករបរចិញ្ចឹមភ្ញាស់យកកូនមាន់លក់ និងលក់ស៊ុត​ ព្រមទាំងមាន​បើកបង្រៀន​ពីវិធីចិញ្ចឹម​មាន់តាម​បច្ចេកទេសដល់កសិករទៀតផង។ ​

​ការចិញ្ចឹមបានផលល្អនេះ ដោយមានការជួយជ្រោមជ្រែងផ្តល់បច្ចេកទេសពីមន្ទីរកសិកម្ម រុក្ខា​ប្រមាញ់ និងនេសាទ ខេត្តត្បូងឃ្មុំផងដែរ។​

​អ្នកស្រី ពុត សុជា អាយុ៤២ឆ្នាំ បានបញ្ជាក់ឲ្យដឹងថា គ្រួសារគាត់បានចិញ្ចឹមមាន់​លក់រយៈ​ពេលជិត២០ឆ្នាំមកហើយ ដំបូងគាត់ចិញ្ចឹមលក់ទាំងមាន់សាច់ និងភ្ញាស់យកកូនលក់។

​សម្រាប់ឆ្នាំ២០២៤នេះ អ្នកស្រីចិញ្ចឹមដោយភ្ញាស់យកតែកូនលក់ និងលក់ស៊ុតតែម្តង ដោយភ្ញាស់​តាមទូភ្ញាស់ស្វ័យ​ប្រវត្តិ អាចលក់កូនមាន់ជូនប្រជាពលរដ្ឋក្នុងខេត្តបានគ្រប់តម្រូវការ ជាងនេះទៀត យើង​ក៏បានលក់ជូនប្រជាពលរដ្ឋនៅក្រៅខេត្ត មានខេត្ត កំពង់ចាម កំពង់ធំ ក្រចេះ និងព្រៃវែង​ផងដែរ។

​រោងមានទំហំ ៤មែត្រ គុណ ៣៣មែត្រ អាចដាក់មេមាន់ចំនួន ៣០០ ក្បាល និងឈ្មោល​បង្កាត់ពូជ​ចំនួន ៤០ក្បាល ដែលវាផលិតបានស៊ុតជាង ២.០០០ ស៊ុត និងកូនជាង១.០០០ក្បាល ក្នុង១ខែ ការ​ថែរក្សា​កូនមាន់ បន្ទាប់ពីញាស់ក្នុងទូរភ្ញាស់រួចយកទៅដាក់ក្នុងទ្រុង ថែរក្សាកូនមាន់ ដោយដាក់​អំពូលកម្ដៅ ផ្តល់ទឹក និងចំណី១ថ្ងៃ ពី៣ទៅ៤ដង នៅពេលវាអាយុបាន៦ថ្ងៃ ត្រូវដាក់វ៉ាក់សាំង អាយ​ធូ ដោយបន្តក់ភ្នែក និងច្រមុះ អាយុបាន១២ថ្ងៃ វ៉ាក់សាំង អុត ដុះស្លាប អាយុ​២១ថ្ងៃបន្តក់រំលឹក អាយធូ ឡើងវិញ។

កូនមាន់មានអាយុ២១ថ្ងៃ អាចលក់បាន ដោយក្នុង១ក្បាលតម្លៃ ៦០០០រៀល លក់រាយ និងស៊ុត១​គ្រាប់ ២.០០០ រៀល ហើយមានអ្នកទិញច្រើន សព្វថ្ងៃនេះ មានទីផ្សារល្អ ការភ្ញាស់​លក់សឹងតែ​ភ្ញាស់​មិនទាន់តម្រូវការរបស់ប្រជាកសិករយើង​ផង។ ​

​ប៉ុន្តែឆ្នាំ២០២៤នេះ លក់មិនសូវដាច់ ដូចឆ្នាំ២០២៣នោះទេ ចំពោះប្រាក់ចំណូល​អាច​ដោះស្រាយ​ជីវភាពគ្រួសារមិនលំបាកទេ។​

​លោកស្រីបានបញ្ជាក់ពីលក្ខណៈបច្ចេកទេសទៀតថា កូនមាន់ល្អ ដោយសារការជ្រើស​រើសមេដែល​មានមាឌធំ សុខភាពល្អ មិនធ្លាប់ឆ្លងជំងឺ ផ្តល់ស៊ុតច្រើន ដូចគ្នាដែរ ឈ្មោល ទុកជាន់មេ ត្រូវរើសបា​មាឌធំ សុខភាពល្អ មិនធ្លាប់ឆ្លងជំងឺ ពូកែជាន់មេ ហើយយើងចាក់វ៉ាក់សាំងដល់វាឲ្យបានត្រឹមត្រូវដែរ។

​ការថែទាំទ្រុង ត្រូវសំអាតទ្រុង ២ទី៣ថ្ងៃម្តង បាញ់ថ្នាំ ឬបាចកំបោរស សម្លាប់​មេរោគ ១សប្តាហ៍ម្តង ត្រូវផ្ដល់ចំណីឲ្យ វា១ថ្ងៃ ២ដង ព្រឹកម្តង និងល្ងាចម្តងទៀត ដោយប្រើចំណីផ្សំដោយខ្លួនឯង ក្នុងនោះ​យើងប្រើវត្ថុធាតុដើមក្នុងស្រុក រួមមាន ពោតក្រហម កន្ទក់ ចុងអង្ករ ម្សៅដំឡូងម៉ី ម្សៅព្រីម៉ិច ម្សៅ​សំបកខ្យង អំបិល បន្លែបៃតង និងម្សៅត្រី៕​

អត្ថបទ៖ សាន វិឡែម