អាមេរិក និងជប៉ុន លាតត្រដាងផែនការមេជាច្រើន រួមទាំងមហិច្ឆតាចុះចត​នៅឋានព្រះច័ន្ទ

ប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្ត្រីជប៉ុនលោក Fumio Kishida កាលពីថ្ងៃពុធ បានលាតត្រដាងផែនការមេសម្រាប់កិច្ចសហប្រតិបត្តិការយោធា និងគម្រោងផ្សេងទៀតរាប់ចាប់ពីមីស៊ីលរហូតដល់មហិច្ឆតានៃការចុះចតនៅឋានព្រះច័ន្ទ ដើម្បីពង្រឹងសម្ព័ន្ធភាពប្រឆាំងចិន និងរុស្ស៊ី ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters កាលពីថ្ងៃទី១០ ខែមេសាកន្លងទៅ ។

ថ្លែងបន្ទាប់ពីកិច្ចពិភាក្សាជាមួយលោក Kishida អស់រយៈពេលប្រហែល ២ ម៉ោងនៅឯសេតវិមានដែលផ្ដោតលើតំបន់ឥណ្ឌូប៉ាស៊ីហ្វិក និងសកម្មភាពរបស់ចិន, លោក Biden បានលើកឡើងថា “នេះគឺជាការធ្វើបច្ចុប្បន្នភាពយោធាដ៏ល្អប្រសើរ និងសំខាន់បំផុតនៅក្នុងសម្ព័ន្ធភាពរបស់យើង ចាប់តាំងពីត្រូវបានបង្កើតឡើងមក” ។

ចំណែកលោក Kishida ក៏បានបញ្ជាក់ផងដែរថា “រាល់ការចិញ្ចឹមចិត្តជាឯកតោភាគីក្នុងការផ្លាស់ប្តូរស្ថានភាពដោយការប្រើកម្លាំង ឬការបង្ខិតបង្ខំគឺពិតជាមិនអាចទទួលយកបាននោះទេ ទោះនៅទីកន្លែងណាក៏ដោយ ហើយអាមេរិក និងជប៉ុននឹងបន្តឆ្លើយតបចំពោះសកម្មភាពបែបនេះ រួមទាំងបញ្ហាប្រឈមពីប្រទេសចិនផងដែរ” ។

សហរដ្ឋអាមេរិក និងសម្ព័ន្ធមិត្តរបស់ខ្លួន រួមទាំងប្រទេសជប៉ុនផងដែរនោះ បាននឹងកំពុងពង្រឹងកម្លាំងយោធារបស់ពួកគេ ដើម្បីប្រឆាំងនឹងការសម្លុតគំរាមកាន់តែខ្លាំងឡើងពីសំណាក់ប្រទេសចិននៅក្នុងសមុទ្រចិនខាងត្បូង និងសមុទ្រចិនខាងកើត ជាពិសេសគឺបញ្ឈប់រាល់ការប៉ុនប៉ងណាមួយដើម្បីដណ្តើមយកកោះតៃវ៉ាន់ ដែលចិនចាត់ទុកជាខេត្តមួយរបស់ខ្លួន ។

គួរបញ្ជាក់ថា កិច្ចប្រជុំរវាងលោក Biden និងលោក Kishida នៅសេតវិមាននាពេលនេះគឺឆ្លុះបញ្ចាំងពីសារៈសំខាន់កាន់តែខ្លាំងឡើងថែមមួយកម្រិតទៀតរបស់ជប៉ុននៅលើឆាកអន្តរជាតិ និងចំពោះសហរដ្ឋអាមេរិកតែម្ដង ខណៈមេដឹកនាំទាំងពីរក៏ពិភាក្សាពីបញ្ហាជម្លោះរវាងអ៊ីស្រាអែល-ក្រុមហាម៉ាសនៅតំបន់ហ្គាហ្សា ភ្លើងសង្គ្រាមរុស្ស៊ី-អ៊ុយក្រែន ក៏ដូចជារឿងរ៉ាវនៅកូរ៉េខាងជើង និងចំណុចក្ដៅផ្សេងទៀតរបស់ពិភពលោកផងដែរ ៕

ដោយ ៖ សុខ ជីវ័ន្ត

ចុចអាន ៖ អ៊ីស្រាអែល បញ្ជាក់ពេលវេលាដែល អ៊ីរ៉ង់ នឹងឲ្យខ្លួនភ្លក់រសជាតិវាយប្រហារ សងសឹក