សន្តិសុខសង្គម
៤ថ្ងៃនៃបុណ្យចូលឆ្នាំ សមត្ថកិច្ចក្រសួងមហាផ្ទៃបង្ក្រាបបទល្មើសទូទៅសរុប ៧៩ករណី ឃាត់ខ្លួន ១៥០នាក់
ក្នុងអំឡុងពិធីបុណ្យចូលឆ្នាំថ្មីប្រពៃណីជាតិ រយៈពេល ៤ថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ កន្លងទៅនេះ សមត្ថកិច្ចក្រសួងមហាផ្ទៃបានបង្ក្រាបបទល្មើសទូទៅសរុបចំនួន ៧៩ករណី និងឃាត់ខ្លួនមនុស្សពាក់ព័ន្ធចំនួន ១៥០នាក់ នៅទូទាំងប្រទេស។ នេះបើតាមលោក ទូច សុខៈ អ្នកនាំពាក្យរងក្រសួងមហាផ្ទៃ។
រយៈពេល ៤ថ្ងៃកន្លងទៅនេះ អ្នកនាំពាក្យរងក្រសួងមហាផ្ទៃ បានកត់សម្គាល់ឃើញថា ការគ្រប់គ្រងបញ្ហាសន្តិសុខសង្គមទូទៅមានលក្ខណៈល្អប្រសើរ ពោលគឺពុំមានអ្វីប៉ះពាល់ដល់សន្តិសុខ សណ្តាប់ធ្នាប់ និងសុវត្ថិភាពសង្គមធ្ងន់ធ្ងរគួរឱ្យបារម្ភនោះទេ។ អ្នកនាំពាក្យរងក្រសួងមហាផ្ទៃ បានឱ្យដឹងថា អំឡុងពិធីបុណ្យចូលឆ្នាំថ្មីប្រពៃណីជាតិនេះ សមត្ថកិច្ចក្រសួងមហាផ្ទៃបានបង្ក្រាបបទល្មើសទូទៅសរុបចំនួន ៧៩ករណី និងឃាត់ខ្លួនមនុស្សពាក់ព័ន្ធចំនួន ១៥០នាក់ ដែលបទល្មើសទូទៅទាំងនោះមានចរិតលក្ខណៈជាសភាពការណ៍សង្គមធម្មតាទូទៅប្រចាំថ្ងៃតែប៉ុណ្ណោះ។
បើតាមលោក ទូច សុខៈ ក្នុងឱកាសពិធីបុណ្យចូលឆ្នាំថ្ងៃទីមួយ គឺថ្ងៃទី១៣ ខែមេសា សមត្ថកិច្ចក្នុងក្របខណ្ឌនៃក្រសួងមហាផ្ទៃបានបង្ក្រាបបទល្មើសចំនួន ២៣ករណី ក្នុងនោះឃាត់ខ្លួនមនុស្សចំនួន ៤៤នាក់។ ចំណែក នៅថ្ងៃទី១៤ ខែមេសា អាជ្ញាធរមានសមត្ថកិច្ចបង្ក្រាបបានចំនួន ២៣ករណី ដោយឃាត់ខ្លួនមនុស្សចំនួន ៥០នាក់។ ថ្ងៃទី១៥ ខែមេសា បង្ក្រាបបានចំនួន ១៩ករណីដោយឃាត់ខ្លួនមនុស្សចំនួន ៣៣នាក់ និងថ្ងៃចុងក្រោយ គឺថ្ងៃទី១៦ ខែមេសា បង្ក្រាបបាន ១៤ករណី ដោយបានឃាត់ខ្លួនមនុស្សចំនួន ២៧នាក់។
អ្នកនាំពាក្យរងក្រសួងមហាផ្ទៃ បានបន្ថែមថា សមត្ថកិច្ចបានបង្ក្រាបបទល្មើសទូទៅបានទាន់ពេលវេលា មានប្រសិទ្ធភាព និងសុវត្ថិភាពខ្ពស់ ដោយសារសមត្ថកិច្ចបានរៀបចំផែនការការពារ ផែនការអន្តរាគមន៍ និងផែនការសង្គ្រោះយ៉ាងច្បាស់លាស់តាមគោលដៅនីមួយៗនៅទូទាំងប្រទេស ដើម្បីថែរក្សាការពារសន្តិសុខ សណ្តាប់ធ្នាប់ និងសុវត្ថិភាពជូនប្រជាជនខ្មែរកម្សាន្តសប្បាយរីករាយក្នុងឱកាសពិធីបុណ្យចូលឆ្នាំប្រពៃណីជាតិ។ លោក ទូច សុខៈ បានបញ្ជាក់ថា សមត្ថកិច្ចបានលះបង់កម្លាំងកាយចិត្ត ពេលវេលាពីក្រុមគ្រួសារប្រកបដោយការទទួលខុសត្រូវខ្ពស់ចំពោះសភាពការណ៍នៃសង្គមប្រចាំថ្ងៃ។ សមត្ថកិច្ចជំនាញបង្ក្រាបបទល្មើសមានប្រសិទ្ធភាពរហូតដល់ ៩៩ភាគរយ។
ចំពោះករណីក្មេងទំនើងវិញ អ្នកនាំពាក្យរងក្រសួងមហាផ្ទៃ បានកត់សម្គាល់ផងដែរថា មានសញ្ញាណល្អប្រសើរដែលយុវជន យុវតីខ្មែរមានស្មារតីជាខ្មែរ ចេះយោគយល់អធ្យាស្រ័យអត់ឱនឱ្យគ្នាទៅវិញទៅមក ទោះបីជាមានសកម្មភាពប្រមូលផ្តុំចូលរួមកម្សាន្តរីករាយ រាំ ជះទឹក និងប៉ាតម៉្សៅគ្នាទៅវិញទៅមកក្នុងតំបន់សង្ក្រាន្តនៅតាមបណ្តាខេត្តទូទាំងប្រទេសក្តី។
អ្នកនាំពាក្យរងក្រសួងមហាផ្ទៃ សង្ឃឹមយ៉ាងមុតមាំថា ប្រជាជនខ្មែរនឹងបន្តថែរក្សាស្មារតីខាងលើនេះបន្ថែមទៀត ដើម្បីចូលរួមថែរក្សាសន្តិសុខសង្គមកាន់តែល្អប្រសើរដោយរក្សាបាននូវស្មារតីសាមគ្គីភាព ភាតរភាព ទទួលខុសត្រូវ គុណធម៌ល្អ សីលធម៌ល្អ និងខិតខំប្រឹងប្រែងស្វែងរកចំណេះវិជ្ជា សមត្ថភាពជំនាញ ដើម្បីអភិវឌ្ឍខ្លួន ក្រុមគ្រួសារ និងសង្គមជាតិឱ្យកាន់តែរឹងមាំ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕
-
ចរាចរណ៍៣ ថ្ងៃ ago
បើករថយន្តវ៉ាជែងក្នុងស្ថានភាពគ្រោះថ្នាក់ ក្រឡាប់របួសធ្ងន់ស្រាលជាង១០នាក់
-
ព័ត៌មានជាតិ២ ថ្ងៃ ago
កម្ពុជា អាចនឹងមានភ្លៀងធ្លាក់លាយឡំជាមួយខ្យល់កន្ត្រាក់ចាប់ពីថ្ងៃទី១៨ ដល់២០មេសា
-
ព័ត៌មានជាតិ៣ ថ្ងៃ ago
តួលេខផ្លូវការ ទេសចរដើរលេងចូលឆ្នាំមានជាង ២១ លាននាក់ និងខេត្តចំនួន ៥ ឈានមុខគេ
-
សន្តិសុខសង្គម២៣ ម៉ោង ago
មកដឹងពីចម្លើយសារភាពរបស់ជនដៃដល់ដែលចាក់សម្លាប់នារីរងគ្រោះក្នុងបុរីឈូកវ៉ា២
-
សន្តិសុខសង្គម២ ថ្ងៃ ago
ព័ត៌មានបឋម៖ ចូលចាក់សម្លាប់ស្ត្រីម្នាក់ដល់ក្នុងផ្ទះ រួចអារកសម្លាប់ខ្លួនឯងតាមក្រោយ
-
ព័ត៌មានអន្ដរជាតិ១ សប្តាហ៍ ago
តើប្រទេស អាស៊ាន ណាខ្លះរៀបចំពិធីបុណ្យចូលឆ្នាំថ្មីក្នុងខែមេសាដូច កម្ពុជា ដែរ?
-
ព័ត៌មានជាតិ៣ ថ្ងៃ ago
រយៈពេល៣ថ្ងៃសង្ក្រាន្តបាត់ដំបងទទួលបានភ្ញៀវទេសចរជាង១លាននាក់
-
ព័ត៌មានអន្ដរជាតិ៦ ថ្ងៃ ago
យប់មិញ អ៉ីរ៉ង់សងសឹកអ៉ីស្រាអែលដោយមីស៊ីល-យន្តហោះគ្មានមនុស្សជាង២០០គ្រាប់