បារាំង​បដិសេធ​អ្នក​ស្ម័គ្រ​ចិត្ត​រុស្ស៊ី​សម្រាប់កីឡាអូឡាំពិក២០២៤

ប្រទេសបារាំង បានច្រានចោលពាក្យស្នើ​សុំទទួលស្គាល់ពីពលរដ្ឋរុស្សីជាង​២០នាក់ ដែលចង់ទៅទីក្រុងប៉ារីសជាអ្នកស្ម័គ្រចិត្ដ សម្រាប់​ព្រឹត្តិការណ៍កីឡាអូឡាំពិក រដូវក្តៅខាងមុខនេះ។ 

អ្នកដាក់ពាក្យស្នើ​សុំការទទួលស្គាល់ពីរុស្សីម្នាក់បានប្រាប់សារព័ត៌មាន TASS បន្ទាប់ពីទទួលបានការបដិសេធជាលាយលក្ខណ៍អក្សរពីគណៈកម្មាធិការរៀបចំអូឡាំពិក ទីក្រុងប៉ារីសឆ្នាំ២០២៤។

ស្ត្រី​រូប​នេះ​​បាននិយាយថា ៖«កាលពីម្សិលមិញខ្ញុំបានទទួលសំបុត្រផ្លូវការមួយដែលអាជ្ញាធរបារាំងបានបដិសេធពាក្យ​ស្នើ​សុំស្ម័គ្រចិត្តក្នុងព្រឹត្តិការណ៍​កីឡាអូឡាំពិក។ ខ្ញុំបានទាក់ទងជនជាតិរុស្សី​​ផ្សេង​ទៀត​ជាង ២០នាក់ ដែលខ្ញុំបានធ្វើការនៅកីឡា អូឡាំពិកជាច្រើន ហើយដែលបានដាក់ពាក្យជាអ្នកស្ម័គ្រចិត្តផងដែរ។ មនុស្សទាំងអស់នេះដែលមានជំនាញច្រើនក៏ត្រូវបានបដិសេធដែរ»។

«គណៈកម្មាធិការរៀបចំបានសរសេរមកខ្ញុំថា ពួកគេមិនដឹងពីមូលហេតុដែលអាជ្ញាធរបារាំងបដិសេធពាក្យស្នើ​សុំរបស់ខ្ញុំទេ។ អនុលោមតាមក្រមសន្តិសុខផ្ទៃក្នុងរបស់បារាំង គណៈកម្មាធិការរៀបចំបានផ្ញើព័ត៌មានលម្អិតរបស់ខ្ញុំទៅអាជ្ញាធររដ្ឋបាលមានសមត្ថកិច្ចដើម្បីផ្ទៀងផ្ទាត់។ លុះត្រាតែមានការយល់ព្រមរបស់ពួកគេ។ ខ្ញុំត្រូវបានគេទទួលស្គាល់ហើយ ប៉ុន្តែជាអកុសលពាក្យស្នើ​សុំរបស់ខ្ញុំត្រូវបានច្រានចោល»។ នាងបានបន្ថែម។

នៅពេលសួរដោយអ្នកសារព័ត៌មានថាតើនឹងមានការរឹតបន្តឹងលើអ្នកស្ម័គ្រចិត្តរុស្ស៊ី និងបេឡារុសឬអត់នោះ  លោក  Alexandre Morenon-Conde នាយកកម្មវិធីស្ម័គ្រចិត្តរបស់ Paris 2024 បាននិយាយតាំងពីថ្ងៃទី២១ ខែមីនា ឆ្នាំ២០២៣ ថា កម្មវិធីស្ម័គ្រចិត្តគឺបើកចំហសម្រាប់ទាំងអស់គ្នាដោយគ្មានការលើកលែងណាមួយឡើយ។

ការប្រកួតកីឡាអូឡាំពិក នឹងប្រព្រឹត្តទៅនៅទីក្រុងប៉ារីស ពីថ្ងៃទី២៦ ខែកក្កដា ដល់ថ្ងៃទី១១ ខែសីហា។ អ្នកស្ម័គ្រចិត្តប្រហែល ៤៥,០០០នាក់មក​ពី​ជុំ​វិញ​ពិភព​លោក​ ត្រូវបានគេរំពឹងថានឹងចូលរួម៕

ប្រែសម្រួល៖ មន្នីរ័ត្ន