ប៉ាឡេស្ទីន រំពឹងទទួលបានកាតពិសេសសម្រាប់ការចូលរួមអូឡាំពិកឆ្នាំ២០២៤

ប្រធានគណៈកម្មាធិការអូឡាំពិកប៉ាឡេស្ទីន លោក Jibril Rajoub កំពុងពឹងផ្អែកលើកាតពិសេសពីគណៈកម្មាធិការអូឡាំពិកអន្តរជាតិ (IOC) ដើម្បីចូលរួមក្នុងការប្រកួតកីឡា​អូឡាំពិក នៅទីក្រុងប៉ារីស ចំពេលមានសង្រ្គាម​កំពុងបន្តនៅហ្គាហ្សា។

កាតពិសេសគឺជាផ្នែកមួយនៃច្បាប់សកលរបស់ IOC សម្រាប់សមាជិក​ជា​គណៈកម្មាធិការជាតិអូឡាំពិកទាំងអស់ដែលមានវត្តមាននៅក្នុងហ្គេម។

លោក Jibril Rajoub បានប្រាប់សន្និសីទសារព័ត៌មានថា ៖«យើងមានអត្តពលិកម្នាក់ – ប្រភេទកីឡាតេក្វាន់ដូ ដែលមានសិទ្ធិរួចហើយ។ យើងនឹងមានយ៉ាងហោចណាស់ ៦-៨ អត្តពលិក បន្ថែមទៀត»។ លោកបាននិយាយថា អត្តពលិក ៣នាក់ទៀតទំនងជាមកពីតំបន់​ហ្គាហ្សា ក្នុងនោះមានស្ត្រីម្នាក់ ឬពីរនាក់។

លោកបានបន្ថែមទៀតថា ៖«យើងមានឱកាសផ្សេងទៀតនៅក្នុងប្រភេទកីឡាយូដូ ប្រដាល់ លើកទម្ងន់ និងហែលទឹក។ ពួកគេទាំងអស់ឥឡូវនេះនៅក្រៅប្រទេសប៉ាឡេស្ទីន។ ពួកគេកំពុង​ហ្វឹកហាត់ជុំវិញពិភពលោក នៅក្នុងប្រទេសមួយចំនួនដែលបានទទួលយើងនាមជាភ្ញៀវ»។

លោក Rajoub បាននិយាយថា ចាប់តាំងពីការចាប់ផ្តើម​ជម្លោះ​កាល​ពី​ខែតុលា ឆ្នាំ២០២៣ អត្តពលិក អាជ្ញាកណ្តាល និងមន្ត្រីកីឡាជាង ៣០០នាក់ត្រូវបានសម្លាប់ ហើយ​ទីលាន​កីឡាស្ទើរ​ទាំងអស់នៅ​តំបន់​ហ្គាហ្សា​ត្រូវបានបំផ្លាញ។

តាមការរាប់របស់អ៊ីស្រាអែល មនុស្សជាង ១,២០០នាក់ត្រូវបានសម្លាប់ និងជាង ២៥០នាក់ត្រូវបានចាប់ធ្វើជាចំណាប់ខ្មាំងនៅក្នុងការវាយប្រហារឆ្លងព្រំដែនកាលពីថ្ងៃទី​៧ ខែតុលា ដោយក្រុមហាម៉ាស់ ដែលបានបង្កឱ្យមានការសងសឹកយោធានៅក្នុងតំបន់ហ្គាហ្សា ហើយបានសម្លាប់មនុស្សជាង ៣៧,០០០នាក់ ពីចំនួនប្រជាជនប៉ាឡេស្ទីន។

លោក Rajoub បាននិយាយថា អត្តពលិកប៉ាឡេស្ទីនត្រូវបានផ្តល់ការគាំទ្រដោយរដ្ឋអារ៉ាប់រួម ទាំងគុយវ៉ែត កាតា លីប៊ី និងអេហ្ស៊ីប ក្នុងចំណោមប្រទេសដទៃទៀតដើម្បីអនុញ្ញាតឱ្យមានការហ្វឹកហាត់នៅក្នុងប្រទេសទាំងនោះ។

លោក Rajoub បាននិយាយថា ៖«នៅកីឡា​អូឡាំពិក​ នាទីក្រុងប៉ារីស យើងនឹងមានវត្តមាន។ យើងនឹងតំណាងឱ្យប្រទេសប៉ាឡេស្ទីន នៅក្នុងព្រឹត្តិការណ៍ពិភពលោកដ៏អស្ចារ្យនេះ»៕

ប្រែសម្រួល៖ មន្នីរ័ត្ន
ប្រភព៖ Reuters