ក្រុមការងារ អ.ដ.ក. ត្រៀមចុះមូលដ្ឋានដោះ​ស្រាយវិវាទជូនប្រជាពលរដ្ឋឱ្យបានលឿន

លោក ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ និងជាអនុប្រធានប្រចាំការនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) កាលពីថ្ងៃទី​១៧ ខែមិថុនា ឆ្នាំ ២០២៤ បានអញ្ជើញដឹកនាំកិច្ចប្រជុំក្រុមបច្ចេកទេសស្នូល ពិនិត្យលើការរៀបចំគម្រោងឆ្ពោះទៅមូលដ្ឋានក្នុងការដោះស្រាយវិវាទជូនប្រជាពលរដ្ឋ។

កិច្ចប្រជុំនេះ​បានពិភាក្សាលើចំណុចសំខាន់ៗចំនួន ៥​រួមមាន ១-ការកំណត់ទិសដៅយុទ្ធសាស្ត្រការងារក្នុងការអនុវត្តគម្រោង ២-ការៀបចំគម្រោងថវិកាសម្រាប់គាំទ្រដល់ការអនុវត្តគម្រោង ៣-ការរៀបចំផែនការសកម្មភាពការងារក្នុងការអនុវត្តគម្រោង ៤-ការធ្វើកិច្ចសហការជាមួយគ្រប់តួអង្គពាក់ព័ន្ធដើម្បីគាំទ្រដល់ការអនុវត្តគម្រោង និង៥-ការរៀបចំយន្តការ និងរបៀបរបបការងារក្នុងការអនុវត្តគម្រោង។

ក្រសួងយុត្តិធម៌ បានបញ្ជាក់ថា ក្រៅតែពីគម្រោងចុះដោះស្រាយវិវាទជូនប្រជាពលរដ្ឋរស់នៅតំបន់ដាច់ស្រយាល និងតំបន់ជនជាតិដើមភាគតិច,​គម្រោងឆ្ពោះទៅមូលដ្ឋានក្នុងការដោះស្រាយវិវាទ​ជូនប្រជាពលរដ្ឋ​ ក៏ជាគម្រោងសំខាន់មួយទៀត​ក្នុងក្របខ័ណ្ឌនៃ អ.ដ.ក. ។

គម្រោងទាំងនេះ ដែលគិតគូររៀបចំទ្បើង​ពីសំណាក់លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ដ.ក. ដើម្បីអនុវត្តឱ្យបានជោគជ័យនូវវិធានការគន្លឹះរបស់ សម្តេចធិបតីនាយករដ្ឋមន្ត្រី  ហ៊ុន ម៉ាណែត ក្នុងការជំរុញ និងលើកកម្ពស់យន្តការដោះស្រាយវិវាទក្រៅប្រព័ន្ធតុលាការ ដើម្បីជួយសម្រុះសម្រួលដោះស្រាយវិវាទឱ្យបានឆាប់រហ័ស ជាពិសេស វិវាទរបស់ប្រជាពលរដ្ឋនៅមូលដ្ឋាន។

ជុំវិញរឿងនេះ សហភាពអង្គការសង្គមស៊ីវិល និងបណ្តាអង្គការ-សមាគម បានសម្តែងការគាំទ្រយ៉ាងពេញទំហឹងចំពោះយន្តការកំណែទម្រង់ប្រព័ន្ធយុត្តិធម៌ ដែលបានដាក់ចេញក្នុងរាជរដ្ឋាភិបាលនីតិកាលទី​៧នេះ។ សហភាពអង្គការសង្គមស៊ីវិល បានលើកឡើងថា៖«ការបង្កើតឱ្យមាននូវ យន្តការដោះស្រាយវិវាទក្រៅប្រព័ន្ធតុលាការ គឺមានបេសកកម្មដោះស្រាយនូវវិវាទជាច្រើន មិនត្រឹមតែអាចកាត់បន្ថយការកកស្ទះសំណុំរឿងនៅតុលាការ ថែមទាំងជាប្រយោជន៍ដល់បងប្អូនប្រជាពលរដ្ឋចំនេញពេលវេលា និងថវិកា»។

សូមជម្រាបថា កិច្ចប្រជុំខាងលើ មានការអញ្ជើញចូលរួមពីសំណាក់លោក ប៉ូច សោភ័ណ សមាជិក អ.ដ.ក. លោក យ៉ម ផារ៉ូត អគ្គលេខាធិការនៃ អ.ដ.ក. និងថ្នាក់ដឹកនាំ និងមន្ត្រីនៃអគ្គលេខាធិការដ្ឋាននៃ អ.ដ.ក. ជាច្រើនរូប។

ជាមួយគ្នានេះដែរ ដើម្បីមានភាពងាយស្រួលក្នុងការដាក់បណ្តឹងក្នុងក្របខ័ណ្ឌនៃ យុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និង យុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ ពលរដ្ឋអាចដាក់ពាក្យបណ្តឹងតាមរយៈក្រុមការងារទទួលពាក្យបណ្តឹង តាមលេខទូរស័ព្ទ​ 099 444 181  ៕
អត្ថបទ៖ ឡាយ សាមាន