រដ្ឋមន្ត្រីក្រសួង​យុត្តិធម៌ ជំរុញឱ្យមន្ត្រីអ្នកច្បាប់ទាំងអស់ត្រូវប្រកាន់ភ្ជាប់នូវអភិក្រមទាំង៥

រដ្ឋមន្ត្រីក្រសួងយុត្តិធម៌ ណែនាំ​ចៅក្រម ព្រះរាជអាជ្ញា ក៏ដូចជាមន្ត្រីតុលាការ​ទាំងអស់​ត្រូវ​ប្រកាន់ភ្ជាប់នូវអភិក្រមទាំង៥ សំដៅ​ធ្វេី​យ៉ាង​ណា​ប្រកាន់​ខ្ជាប់​ក្នុង​ការ​អនុវត្តច្បាប់​ឱ្យបានត្រឹមត្រូវជូនប្រជាពលរដ្ឋ។

ការថ្លែងបែបនេះ​របស់​ លោក កើត រិទ្ធ ឧបនាយករដ្ឋមន្ត្រី​រដ្ឋមន្ត្រីក្រសួងយុត្តិធម៌ នាថ្ងៃទី​៤​ខែធ្នូ​ ឆ្នាំ​២០២៥​ ក្នុងពិធី​ប្រកាសផ្ទេរ​ និងចូលកាន់មុខតំណែង​ប្រធានសាលាដំបូងនិង​ព្រះរាជអាជ្ញានៃអយ្យការអមសាលាដំបូងខេត្តកំពង់ចាម​។ ឆ្លៀត​ក្នុង​ឱកាស​នោះដែរ​ លោក​ កើត រិទ្ធ ឧបនាយករដ្ឋមន្ត្រី​ រដ្ឋមន្ត្រី​ក្រសួង​យុត្តិធម៌​ ក៏បានផ្តាំផ្ញើថែមទៀតថា មន្រ្តីអ្នកអនុវត្តច្បាប់​ទាំងអស់​ត្រូវចូលរួមលើកកម្ពស់កិត្តិយស សេចក្តីថ្លៃថ្នូរ និងកិត្យានុភាពនៃអង្គចៅក្រម ព្រះរាជអាជ្ញា និងមន្ត្រីតុលាការ ដោយប្រកាន់ខ្ជាប់នូវវិន័យក្រមសីលធម៌ វិជ្ជាជីវៈ ទាំងពេលបំពេញការងារ និងក្នុងជីវភាពរស់នៅប្រចាំថ្ងៃ និងចូលរួម​ប្រកប​ដោយឆន្ទៈក្នុងស្មារតីទទួលខុសត្រូវខ្ពស់​ក្នុងការអនុវត្តយុទ្ធនាការ ដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត ដើម្បីធានាឱ្យការផ្តល់សេវាយុត្តិធម៌ជូនប្រជាពលរដ្ឋធ្វើឡើងបាន «លឿន ត្រឹមត្រូវ យុត្តិធម៌ និងមិនពុករលួយ»។

លេីសពីនេះទៀត​ លោក​ឧបនាយករដ្ឋមន្ត្រី​ រដ្ឋមន្ត្រី​ក្រសួង​យុត្តិធម៌​ ក៏បានជំរុញឱ្យថ្នាក់ដឹកនាំ និងមន្ត្រីរាជការ នៃសាលាជម្រះក្តីគ្រប់ជាន់ថ្នាក់ និងមន្ត្រីអនុវត្តច្បាប់ពាក់ព័ន្ធទាំងអស់ ឱ្យមានការយកចិត្តទុកដាក់ខ្ពស់ លើការកែទម្រង់ច្បាប់ និងប្រព័ន្ធយុត្តិធម៌ ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា សំដៅដល់យន្តការដោះស្រាយវិវាទក្រៅប្រព័ន្ធតុលាការ ពន្លឿនការដោះស្រាយសំណុំរឿង និងភាពមិនប្រក្រតីតាមតុលាការ។

គូសបញ្ជាក់​ថា ពិធី​ប្រកាសផ្ទេរ​ និងចូលកាន់មុខតំណែងប្រធានសាលាដំបូងខេត្តកំពង់ចាម​និងព្រះរាជអាជ្ញានៃអយ្យការអមសាលាដំបូងខេត្តកំពង់ចាម​ ដោយ​លោក​ កោ​ វណ្ឌី​ ដែលបានផ្ទេរមុខ​តំណែង​ពីប្រធានសាលាដំបូងខេត្តព្រះសីហនុ​ មកជា​ប្រធានសាលាដំបូងខេត្តកំពង់ចាមជំនួស លោក​ សួស​ ឡា​ ដែល​ត្រូវផ្ទេរមុខតំណែងទៅជាប្រធានសាលាដំបូងខេត្តព្រៃវែង​វិញ​ និង​លោក​ កែវ​ សុជាតិ​ ពីព្រះរាជអាជ្ញាខេត្តបាត់ដំបង​ មកជាព្រះរាជអាជ្ញាខេត្តកំពង់ចាមជំនួស លោក​ វង្ស​ ប៊ុនវិសុទ្ធ​ ដែលត្រូវផ្ទេរមុខតំណែងជាព្រះរាជអាជ្ញាខេត្តពោធិ៍សាត់វិញ៕

អត្ថបទ​និង​រូបភាព ​៖ ឡេក​ ចាន់ពេជ្រ​