Man Utd ប្រជែងជាមួយ Bayern និង Leipzig ដើម្បីកីឡាករ Simons

ក្លិប Manchester United ចូលរួមប្រជែងជាមួយក្លិប Bayern Munich និង RB Leipzig ក្នុងការចុះហត្ថលេខានាំយក​ខ្សែបម្រើស្លាប កីឡាករ Xavi Simons របស់​ក្លិប​អ្នក​មាន Paris Saint-Germain។

កីឡាករ Xavi Simons ​ដែល​ត្រូវបានក្លិប RB Leipzig ខ្ចីជើងរដូវកាលមុន ធ្វើបានយ៉ាងល្អ ក្រោយស៊ុតបញ្ចូលទីបាន៨គ្រាប់ និងបញ្ចូលបាល់ឲ្យមិត្តរួមក្រុមបាន១៣លើក នៅក្នុងក្របខណ្ឌ Bundesliga។ នេះជាហេតុដែលធ្វើឲ្យក្លិប RB Leipzig ចង់ទិញផ្ដាច់ខ្សែបម្រើសញ្ជាតិហុល្លង់ពីក្លិប Paris Saint-Germain។

ក្លិប Bayern Munich ត្រូវបានរាយការណ៍​ថា បានចាប់អារម្មណ៍​លើ​ Xavi Simons ប៉ុន្តែថ្មីៗនេះក្លិប Manchester United របស់អង់គ្លេសក៏បាន​បង្ហាញ​ការចាប់អារម្មណ៍លើកីឡាករវ័យក្មេងសញ្ជាតិហុល្លង់រូបនេះដែរ។

បន្ទាប់ពីនាំយកខ្សែការពារវ័យក្មេង Leny Yoro កាល​ពី​សប្តាហ៍​មុន ក្លិប Manchester United ត្រូវបានគេរំពឹងអាចជាបេក្ខភាពឈានមុខក្នុងការនាំយកកីឡាករ Xavi Simons។ មូលហេតុគឺដោយសារគ្រូបង្វឹកក្លិបបិសាចក្រហមលោក Erik ten Hag ជាជនជាតិហុល្លង់ ហើយជំនួយការថ្មីរបស់​លោក​គឺ​ Ruud van Nistelrooy ក៏ជាជនជាតិហុល្លង់ ដូច្នេះការបញ្ចុះបញ្ចូលកីឡាករវ័យ២១ឆ្នាំអាចមានភាពងាយស្រួល។

តាម​ព័ត៌មាន ក្លិបបារាំង PSG បានដាក់តម្លៃ​លក់​ប្រមាណ១០០លានអឺរ៉ូ សម្រាប់ Xavi Simons។ នេះ​ជាតួលេខមួយដែលធ្វើឲ្យ​ក្លិប​ Bayern Munich និង Leipzig ពិបាក​ក្នុង​ការ​ចំណាយ។ កន្លងមក ក្លិប Bayern Munich បា​នដាក់តម្លៃត្រឹមតែ៧០លាន​អឺរ៉ូ​ប៉ុណ្ណោះ ប៉ុន្តែ​ពេល​នេះ​ Man Utd ​ចាប់​អារម្មណ៍​ដែរ ដូច្នេះ​អាច​មាន​ភាគ​រយ​ខ្ពស់​ក្នុង​ការ​ចំណាយ៕

ប្រែសម្រួល៖ ផា រតនា