លោកស្រី គង់ បញ្ញា ទទួលងារជា«លោកអ្នកឧកញ៉ាមហាភក្តី»និងត្រូវទទួលបន្ទុកកិច្ចការទូទៅអមក្រសួងព្រះបរមរាជវាំង

លោកស្រី គង់ បញ្ញា ទទួលបានងារជា«លោកអ្នកឧកញ៉ា មហាភក្តី» និងត្រូវបានតែងតាំងមុខតំណែងជាទេសរដ្ឋមន្ត្រី ទទួលបន្ទុកកិច្ចការទូទៅអមក្រសួងព្រះបរមរាជវាំង។ នេះបើតាមព្រះរាជក្រឹត្យរបស់ព្រះករុណាព្រះមហាក្សត្រនៃកម្ពុជា នៅថ្ងៃទី០២ ខែកញ្ញា ឆ្នាំ២០២៤នេះ។

តំណែងជាទេសរដ្ឋមន្ត្រី ទទួលបន្ទុកកិច្ចការទូទៅអមក្រសួងព្រះបរមរាជវាំង របស់លោកអ្នកឧកញ៉ា មហាភក្តី គង់ បញ្ញា គឺជាតំណែងចាស់របស់សម្ដេច មហាមន្ត្រី គុយ សុផល មុនពេលតែងតាំងជាឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ជំនួសសម្ដេចចៅហ្វាវាំង គង់ សំអុល ដែលបានទទួលមរណភាព។

ព្រះរាជក្រឹត្យរបស់ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា នៅថ្ងៃទី០២ ខែកញ្ញា ឆ្នាំ២០២៤នេះ បានប្រោសព្រះរាជទានគោរមងារជូនលោកស្រី គង់ បញ្ញា ជា «លោកអ្នកឧកញ៉ា មហាភក្តី គង់ បញ្ញា»។ ដោយឡែក ព្រះរាជក្រឹត្យរបស់ព្រះករុណាព្រះមហាក្សត្រមួយច្បាប់ទៀត នៅថ្ងៃដដែលនេះ គឺតែងតាំងមុខតំណែង លោកអ្នកឧកញ៉ា មហាភក្តី គង់ បញ្ញា ជាទេសរដ្ឋមន្ត្រី ទទួលបន្ទុកកិច្ចការទូទៅអមក្រសួងព្រះបរមរាជវាំង។

ការប្រោសព្រះរាជទាន និងការត្រាស់បង្គាប់តែងតាំងនេះ បានធ្វើឡើងបន្ទាប់ពីមានសំណើក្រាបបង្គំទូលថ្វាយរបស់សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ៕