មន្ត្រី​ជលផលកំពង់ចាម​ បន្តចុះបង្ក្រាបឧបករណ៍នេសាទខុសច្បាប់នៅភូមិសាស្ត្រស្រុកចំនួន៣

ដេីម្បីចូលរួមទប់ស្កាត់​ និងបង្ក្រាបបទល្មេីសនេសាទខុសច្បាប់​នៅតាមព្រែក​ បឹង​ និងទន្លេ​ ក្នុងភូមិសាស្ត្រខេត្តកំពង់ចាម​ មន្ត្រីខណ្ឌរដ្ឋបាលជលផលកំពង់ចាម បានបន្តចុះ​បង្ក្រាបឧបករណ៍នេសាទខុសច្បាប់នៅក្នុងស្រុកស្ទឹងត្រង់​ ស្រុកព្រៃឈរ​ និងស្រុកកងមាស​។

នៅថ្ងៃទី១២ ខែកញ្ញា​ ឆ្នាំ២០២៤នេះ​ ខណ្ឌរដ្ឋបាលជលផលកំពង់ចាម សហការ​ជាមួយអាជ្ញាធរស្រុកស្ទឹងត្រង់​ ស្រុកព្រៃឈរ​ និងស្រុកកងមាស​ និងដោយមានការសម្របសម្រួលពីលោក វង្ស ប៊ុនវិសុទ្ធ ព្រះរាជអាជ្ញានៃអយ្យការអមសាលាដំបូងខេត្តកំពង់ចាម បានចុះប្រតិបត្តិការត្រួតពិនិត្យ និងបង្រ្កាបបទល្មើសជលផលបានចំនួនប្រាំទីតាំង​ផ្សេងគ្នា​ ក្នុងនោះភូមិសាស្ត្រស្រុកទាំង៣នោះ ដោយកសាងសំណុំរឿងតាមនិតិវិធីច្បាប់ស្តីពីជលផល និងរុះរើកាប់បំផ្លាញចោលវត្ថុតាងនៃបទល្មើសជលផលនៅនឹងកន្លែង។

បេីតាមការបញ្ជាក់ពី​លោក​ លី​ ស្រ៉ី​ នាយខណ្ឌស្តីទី​ជលផលកំពង់ចាម​ បានឲ្យដឹងថា​ ប្រតិបត្តិការចុះបង្រ្កាបបទល្មើសជលផលនេះដែរ​ ក្រុមការងារ​បានរុះរើកាប់បំផ្លាញចោលវត្ថុតាងនៅចំណុចផ្ទៃបឹង​កេះ បឹងសាម​ និងព្រែក​ពាមកោះស្នា ជារួមមាន ​ឧបករណ៍លូស្បៃមុងចំនួន៣៣មាត់, របាំងស្បៃមុងប្រវែង១២២០ម៉ែត្រ, បង្គោលចម្រឹងចំនួន៥៤០ដើម​និងបានចាក់លែងកូនត្រីចម្រុះទម្ងន់ ៥៧គីឡូក្រាម។

ទន្ទឹមនឹងនេះដែរ​​ លោក​ លី​ ស្រ៉ី​ នាយខណ្ឌស្តីទី​ជលផលកំពង់ចាម​ ដែលដឹកនាំផ្ទាល់​​ បានបន្តចុះអប់រំផ្សព្វផ្សាយដល់ប្រជានេសាទឈប់នេសាទនៅតំបន់​ កុំប្រើប្រាស់ឧបករណ៍ល្មើសច្បាប់​ និងស្នេីសុំឲ្យអាជ្ញាធរមូលដ្ឋានចូលរួមសហការ​រាយការណ៍និងបង្ក្រាប​ អ្វីដែលមន្ត្រីជំនាញស្នេីសុំទៀតនោះ​ គឺសូមឲ្យបងប្អូនប្រជាពលរដ្ឋចូលរួមសហការទប់ស្កាត់​ការនេសាទខុសច្បាប់​ ដេីម្បីរក្សាពូជត្រីបានច្រេីន​៕​

អត្ថបទ​៖​ ឡេក​ ចាន់ពេជ្រ