មេផ្សាហ៊ុនលើកទឹកចិត្តដល់សាធារណជនចាប់ផ្តើម​វិនិយោគលើផ្សារហ៊ុននៅពេលតម្លៃ​ហ៊ុនកំពុងធ្លាក់

លោក ហុង សុហួរ អគ្គនាយកនៃផ្សារមូលបត្រកម្ពុជា(csx) បានលើកឡើងថាខណៈពេល​សេដ្ឋកិច្ចពិភពលោកធ្លាក់ចុះ ការមានសង្គ្រាម និងវិបត្តិអតិផរណា​ជាដើម ដែលនាំឱ្យថ្លៃភាគហ៊ុនភាគច្រើនមានការធ្លាក់ចុះ បង្កើតជាឪកាសសម្រាប់វិនិយោគសាធារណក្នុងការវិនិយោគលើផ្សារហ៊ុនដើម្បីទទួលបានផលចំណេញនៅពេលហ៊ុនឡើងថ្លៃនាពេលខាងមុខ។

ការលើកឡើងរបស់លោក សុហួរធ្វើឡើងក្នុងកម្មវិធីពិធីពិព័រណ៍ផ្សារភាគហ៊ុនកម្ពុជា «My First STOCK »ដែលធ្វើឡើងកាលពីថ្ងៃទី២៥ខែតុលានៅផ្សារទំនើបអ៊ីអនភ្នំពេញ​ដែលធ្វើឡើងរយៈពេល៣ថ្ងៃចាប់ពីថ្ងៃទី២៥ដល់២៧ខែតុលា។

លោកបានថ្លែងថា៖«សេដ្ឋកិច្ចពិភពលោកធ្លាក់ចុះ ការមានសង្គ្រាម និងវិបត្តិអតិផរណា​ជាដើម ដែលនាំឱ្យថ្លៃភាគហ៊ុនភាគច្រើនមានការធ្លាក់ចុះ ដោយសារអ្នកលក់មានចំនួនច្រើនជាងអ្នកទិញ ដែលការធ្លាក់ថ្លៃនេះ មិនមែនមូលហេតុធំ មកពីបញ្ហាអាជីវកម្មធ្លាក់ចុះរបស់ក្រុមហ៊ុនយើងឡើយ»។  

«នេះគឺជាឱកាសមាសរបស់ភ្ញៀវកិត្តិយសរបស់យើងនៅទីនេះ និងវិនិយោគិនទាំងអស់គ្នា ព្រោះថ្លៃ​ភាគហ៊ុនអាចនឹងឡើងថ្លៃវិញក្នុងពេលខាងមុខ ដូចខ្ញុំធ្លាប់បានិយាយថា ទិញហ៊ុន ក៏អាចក្លាយជាអ្នកមាន​បានដែរ។ ឱកាសមាសនៅផ្សារមូលបត្រកម្ពុជានេះ មិនមែនចេះតែមានជារៀងរាល់ឆ្នាំទេ ហើយវិនិយោគិន ដែលចាប់យកឱកាសនេះបាន ខ្ញុំជឿជាក់ថា អត្រាចំណេញពីការវិនិយោគក្នុងរយៈពេលប៉ុន្នានឆ្នាំទៀត​អាចដល់ ជាមធ្យម២០% ឬលើសពីនេះក្នុងមួយឆ្នាំ»។ នេះបើតាមការគូសបញ្ជាក់របស់លោក។

​​ជាមួយគ្នានេះដែរ លោក សុហួរក៏បានលើកទឹកចិត្តដលើវិនិយោគចាស់ ដែលកន្លងមក ធ្លាប់បានលើកឡើងថា អត់ចំណេញ ឬខាតថាកុំទាន់បាក់ទឹកចិត្ត។

លោកថា៖«ខ្ញុំសូមលើកទឹកចិត្ត​ឱ្យពួកគាត់អត់ធ្មត់បន្តិចទៀត ក្នុងបរិបទនៃស្ថានភាពទីផ្សារបច្ចុប្បន្ន ព្រោះភាគហ៊ុនរបស់យើងភាគច្រើន​នៅធូរថ្លៃ និងមិនទាន់អាចរកប្រាក់ចំណេញពីទីផ្សាររបស់យើងបាន ប៉ុន្តែវិនិយោគិន ដែលអាចអត់ធ្មត់បាន នឹងទទួលបានផលចំណេញច្រើននាពេលខាងមុខ ដូចពាក្យមួយឃ្លាថា “ទីផ្សារភាគហ៊ុនជាឧបករណ៍​ក្នុងការផ្ទេរប្រាក់ពីអ្នក ដែលគ្មានភាពអត់ធ្មត់ ទៅកាន់អ្នក​ដែលមានភាពអត់ធ្មត់” (Warren Buffett)».

«សូមស្នើសុំភ្ញៀវកិត្តិយសទាំងអស់ និងទស្សនិកជននៅតាមប្រព័ន្ធអនឡាញ សាកល្បងបើកគណនី​ជូញដូរ ហើយតេស្តទីផ្សារទាំងអស់គ្នា ជាមួយនឹងទឹកប្រាក់តិចតួច ក៏ដូចជាចូលរួមធ្វើជាសាក្ខីភាពជាមួយខ្ញុំ​នូវការរីកចម្រើនរបស់ទីផ្សារមូលបត្រនៅកម្ពុជា ក៏ដូចជាចូលរួមតាមដានជាមួយខ្ញុំថា ការវិនិយោគនៅថ្ងៃនេះ ជាមួយនឹងការធ្វើពិពិធកម្មលើភាគហ៊ុនមួយចំនួន នឹងអាចផ្តល់ផលចំណេញប៉ុន្នានភាគរយ នៅ៣ ឬ៥ឆ្នាំ​ក្រោយ។ ខ្ញុំជឿជាក់យ៉ាងមុតមាំថា ការវិនិយោគភាគហ៊ុននឹងអាចធ្វើឱ្យយើងទាំងអស់គ្នាមានប្រភព​ចំណូល​មួយថ្មី សម្រាប់សង្គមកម្ពុជាទាំងមូល» ។ នេះបើតាមលោក ហុង សុហួរ។

លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (SERC) បានថ្លែង តាមរយៈពិធីពិព័រណ៍ផ្សារភាគហ៊ុនកម្ពុជា “M My First STOCK ប្រចាំ២០២៤ SERC នឹងផ្តល់លេខអត្តសញ្ញាណវិនិយោគិនដោយឥតគិតថ្លៃ សម្រាប់អ្នកដែលស្នើសុំបើកលេខ អត្តសញ្ញាណវិនិយោគិនក្នុងរយៈពេល ៣ ថ្ងៃនេះ ដែលនេះ ជាឱកាសល្អមួយសម្រាប់បងប្អូន ដែល មានបំណងចង់សិក្សាស្វែងយល់ និងចូលរួមវិនិយោគក្នុងទីផ្សារមូលបត្រកម្ពុជា។

​លោកថា៖«តាមរយៈកម្មវិធីយើងនាថ្ងៃនេះ ខ្ញុំជឿជាក់ថា យើងនឹងអាចបំបែកនូវកំណត់ត្រាថ្មីម្តង ទៀត នៃការកើនឡើងចំនួនវិនិយោគិននៅក្នុងទីផ្សារ និងសកម្មភាពជួញដូរយ៉ាងសកម្មនៅក្នុងទីផ្សារ នេះ។ បន្ថែមពីនេះ យើងក៏មានការកម្សាន្តបែបចំណេះដឹង តាមរយៈការប្រកួតប្រជែងឆ្លើយសំណួរខ្លីៗ ដើម្បីទទួលបាននូវវត្ថុអនុស្សាវរីយ៍ថែមទៀតផង»។

លោកបានថ្លែងពន្យល់ថា ការវិនិយោគទៅលើភាគហ៊ុន គឺជាជម្រើសមួយ ដ៏ល្អប្រសើរសម្រាប់អ្នកដែលទើបចាប់ផ្តើមរៀនវិនិយោគដំបូង ដោយចាប់ផ្តើមពីដើមទុនតិច ប៉ុន្តែ ទទួលបាននូវអត្ថប្រយោជន៍ច្រើន និងអាចពង្រីកនូវសំណុំវិនិយោគ ដើម្បីបង្កើតចំណូលអកម្ម របស់ខ្លួនបន្ថែមទៀតតាមរយៈទីផ្សារមូលបត្រនេះ។

« ដូច្នេះ បងប្អូនគួរតែចាប់ផ្តើមវិនិយោគឱ្យបានលឿន និងអនុវត្តឱ្យបានខ្ជាប់ខ្ជួន ដោយការយកសាច់ប្រាក់ដែលសល់ពីការចំណាយចាំបាច់យកមកវិនិយោគ ដើម្បីសម្រេចបាននូវគោលដៅហិរញ្ញវត្ថុផ្ទាល់ខ្លួននាពេលអនាគត»។ នេះបើតាមលោក ស៊ូ សុជាតិ៕