ម៉ោងនេះស្ថានភាពហ៊ុំព័ទ្ធភូមិវាលធំនៅល្វាឯមយ៉ាងណាហើយ

កងកម្លាំងអាជ្ញាធរស្រុកល្វាឯម នៅថ្ងៃទី១០ ខែមីនា បានចុះហ៊ុំព័ទ្ធបិទភូមិវាលធំ ឃុំពាមឧក​ញ៉ា​អុង ដែលមានផ្ទះ ៣០០ ខ្នងក្នុងភូមិមានផ្ទុះជំងឺកូវីដ១៩។ កងកម្លាំងចម្រុះ​បានធ្វើ​ការហ៊ុំព័ទ្ធ​មិន​ឲ្យអ្នកភូមិចេញក្រៅ ហើយបញ្ជូនគ្រូពេទ្យចុះយកសំណាក។

អភិបាលស្រុកល្វាឯម លោក កន សុកាយ បានប្រាប់កម្ពុជាថ្មីនៅល្ងាចថ្ងៃទី ១១ ខែមីនា នេះថាស្ថានភាពហ៊ុំព័ទ្ធបិទភូមិមកដល់ម៉ោងនេះ គឺនៅតែបន្តការបិទនៅឡើយ​ដោយសារអាជ្ញាធររងចាំ​លទ្ធផលនៃការធ្វើតេស្តសំណាកលើប្រជាពលរដ្ឋនៅក្នុងភូមិផ្ទុះជំងឺ។

លោកប្រាប់ថា កាលពីថ្ងៃទី ១០ ក្រុមគ្រូពេទ្យបានចុះយកសំណាកអ្នកភូមិចំនួន ៨៥៦ នាក់ ហើយថ្ងៃទី១១ ខែមីនានេះបន្តយកសំណាកបន្ថែមទៀតចំនួន ៣៥ប៉ុន្តែលទ្ធផលមិនទាន់ចេញនោះទេ។

លោក កន សុកាយ បញ្ជាក់ថា “ពាក់ព័ន្ធនិងទីតាំងភូមិគឺសមត្ថកិច្ចនៅបិទនៅឡើយមិនទាន់បានបើកទេ គឺនៅរង់ចាំលទ្ធផលសំណាក ហើយបន្តឲ្យប្រជាពលរដ្ឋធ្វើចត្តាឡីស័ករយៈពេល ១៤ ថ្ងៃ ដោយសារតែក្នុងភូមិនេះផ្ទុះកូវីដ១៩”។

លោកអភិបាលស្រុករូបនេះ ឲ្យដឹងទៀតថា អាជ្ញាធរមិនទាន់ដឹងថា ប្រភពនៃការរីករាល​នៅក្នុងភូមិ​ទៅ​ដល់ណាខ្លះទេ លុះត្រាតែពួកគាត់ឆ្លងកាត់ការធ្វើតេស្ត២ដង ក៏ប៉ុន្តែប្រសិនបើលទ្ធផលសំណាកលើកទី១បានល្អប្រសើរ នោះអាជ្ញាធរនឹងសុំគោលការណ៍​ថ្នាក់លើឲ្យបន្ធូបន្ថយដល់អ្នកភូមិខ្លះក្នុងការទិញម្ហូបអាហារនៅក្បែរទីនោះ ចំណែកទីតាំងផ្សារនៅតំបន់ក្បែរទីនោះគឺ អាជ្ញាធរបានបិទអស់ហើយ៕

អត្ថបទ៖ ឡេង ដេត