ព័ត៌មានអន្ដរជាតិ

តៃវ៉ាន់៖ ចិនដាក់ពង្រាយកងកម្លាំងជើងទឹកដ៏ធំបំផុតមិនធ្លាប់មាន ក្នុងពេលជិត៣០ឆ្នាំ

បានផុស

២ years មុន

នៅ

ថ្ងៃអង្គារ ១០ ធ្នូ ២០២៤

ដោយ

Chheang

ក្នុងរយៈពេលជិត៣ទសវត្សរ៍មកនេះ គ្មានពេលណាណាដែលប្រទេសចិនបានដាក់ពង្រាយកងកម្លាំងជើងទឹកក្នុងចំនួនដ៏ច្រើនបំផុតដូចជាពេលនេះទេ ពោលគឺចំនួនកងទ័ពចិននៅក្នុងដែនទឹកជម្លោះមានច្រើនជាងការធ្វើសមយុទ្ធទ្រង់ទ្រាយធំពីមុនៗទៅទៀត។ នេះបើយោងតាមការប្រកាសរបស់ក្រសួងការពារជាតិតៃវ៉ាន់នៅថ្ងៃអង្គារទី១០ខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងទីក្រុងតៃប៉ិ អ្នកនាំពាក្យក្រសួងការពារជាតិ លោក Sun Li-fang បានឲ្យដឹងថា ទំហំនៃការដាក់ពង្រាយកងទ័ពជើងទឹកចិនបច្ចុប្បន្ននៅក្នុងតំបន់ ដែលលាតសន្ធឹងពីកោះភាគខាងត្បូងរបស់ជប៉ុនចុះទៅកាន់សមុទ្រចិនខាងត្បូង គឺជាទំហំដ៏ធំបំផុត គិតចាប់តាំងពីមហាយក្សអាស៊ីនេះបានរៀបចំសមយុទ្ធសង្គ្រាមជុំវិញកោះតៃវ៉ាន់ មុនការបោះឆ្នោតប្រធានាធិបតីតៃវ៉ាន់ឆ្នាំ១៩៩៦។

មកទល់នឹងពេលនេះ យោធាចិនមិនទាន់ធ្វើអត្ថាធិប្បាយទេ ហើយក៏មិនបានបញ្ជាក់ថា ខ្លួនកំពុងធ្វើសមយុទ្ធណាមួយដែរ។

យោធាតៃវ៉ាន់ បានបង្កើនការប្រុងប្រយ័ត្នរបស់ខ្លួនកាលពីថ្ងៃចន្ទ បន្ទាប់ពីបាននិយាយថា ចិនបានបម្រុងទុកដែនអាកាស និងដាក់ពង្រាយនាវាកងទ័ពជើងទឹក ព្រមទាំងនាវាឆ្មាំសមុទ្រ។

លោក Sun បានបន្តថា៖ «មាត្រដ្ឋានបច្ចុប្បន្នគឺធំបំផុតបើធៀបនឹងបួនមុន។ មិនថាពួកគេបានប្រកាសធ្វើសមយុទ្ធឬអត់នោះទេ ពួកគេកំពុងបង្កការគំរាមកំហែងយ៉ាងខ្លាំងដល់យើង»។

សូមបញ្ជាក់ថា ចិន ដែលតែងចាត់ទុកតៃវ៉ាន់ជាទឹកដីរបស់ខ្លួន ត្រូវបានគេរំពឹងថានឹងចាប់ផ្តើមសមយុទ្ធ ដើម្បីបង្ហាញការខឹងសម្បារចំពោះដំណើរទស្សនកិច្ចរបស់លោកប្រធានាធិបតី Lai Ching-te ទៅកាន់តំបន់ប៉ាស៊ីហ្វិក ដែលទើបបញ្ចប់កាលពីថ្ងៃសុក្រសប្ដាហ៍មុន៕

ដោយ៖ ឈាង