វៀតណាមនឹងរឹតបន្តឹងការយកពន្ធលើការលក់ផលិតផលតាមអនឡាញរបស់តារាល្បី

​អាជ្ញាធរ​ពន្ធដារ​កំពុង​ចងក្រង​បញ្ជី​តារា​ល្បី​ៗ​ដែល​បង្កើត​ប្រាក់​ចំណូល​យ៉ាង​ច្រើន​ពី​ការ​លក់​ផ្សាយ​បន្ត​ផ្ទាល់ និង​ផ្សាយបន្តតាមភ្នាក់ងាររបស់ខ្លួន​លើ​ផ្លេតហ្វម​ពាណិជ្ជកម្ម​អនឡាញនានាចាប់ពីឆ្នាំ២០២៥នេះតទៅ។

យោងតាមអគ្គនាយកដ្ឋានពន្ធដារបានឱ្យដឹងថា រាល់បុគ្គល និងតារាល្បីៗមួយចំនួនដែលចូលរួមក្នុងអាជីវកម្ម ឬភាពជាដៃគូជាមួយម៉ាកនៅលើផ្លេតហ្វមពាណិជ្ជកម្មអនឡាញ នឹងត្រូវទទួលការត្រួតពិនិត្យពន្ធចាប់ពីដើមឆ្នាំ ២០២៥ នេះតទៅ។ នេះបើយោងតាមអគ្គនាយកដ្ឋានពន្ធដារ។

អគ្គនាយករងនៃនាយកដ្ឋាន លោក Mai Sơn បានសង្កត់ធ្ងន់ថា តាមបទប្បញ្ញត្តិបច្ចុប្បន្ន គ្រប់អាជីវកម្ម ស្ថាប័ន និងបុគ្គលទាំងអស់ មិនថាល្បី ឬមិនល្បីនោះទេ ត្រូវមានកាតព្វកិច្ចប្រកាសពន្ធដោយខ្លួនឯង បង់លុយដោយខ្លួនឯង និងទទួលខុសត្រូវក្នុងការបំពេញកាតព្វកិច្ចពន្ធរបស់ខ្លួន។

អាជ្ញាធរពន្ធដារមានភារកិច្ចផ្តល់ការណែនាំ និងការគាំទ្រ ក៏ដូចជាការអនុវត្តដំណោះស្រាយសម្រាប់សវនកម្ម អធិការកិច្ច និងការអនុវត្ត ដើម្បីធានាបាននូវភាពត្រឹមត្រូវ និងតម្លាភាព។

​លោក Sơn បាននិយាយថា៖«សម្រាប់តារាល្បីៗ ឬអ្នកមានឥទ្ធិពលដែលពាក់ព័ន្ធនឹងការលក់តាមរយៈការផ្សាយ​បន្តផ្ទាល់ ឬទីផ្សារសម្ព័ន្ធតាមអនឡាញ យើងបានណែនាំអាជ្ញាធរពន្ធដារឱ្យពង្រឹងការត្រួតពិនិត្យ»។

សម្រាប់វិធានការនេះរួមបញ្ចូលទាំងការគាំទ្រដល់អ្នកជាប់ពន្ធ ការបង្កើតវិបផតថលពាណិជ្ជកម្មអេឡិចត្រូនិកសម្រាប់បុគ្គល ការផ្តល់ការណែនាំ និងការកសាងមូលដ្ឋានទិន្នន័យតាមរយៈការចែករំលែកព័ត៌មានក្នុងចំណោមក្រសួង វិស័យ និងផ្លេតហ្វមពាណិជ្ជកម្មអេឡិចត្រូនិកនានា។

អាជ្ញាធរពន្ធក៏កំពុងត្រួតពិនិត្យ និងបង្កើនវិធានការគ្រប់គ្រងពន្ធសម្រាប់តារាល្បី និងអ្នកមានឥទ្ធិពលដែលចូលរួមក្នុងការលក់បន្តផ្ទាល់ និងទីផ្សារសម្ព័ន្ធរបស់។ បញ្ជីឈ្មោះតារាល្បីៗដែលមានចំណូលពីការផ្សាយផ្ទាល់សំខាន់ៗនឹងត្រូវបានស្រង់ដើម្បីឆ្លងកាត់ការវាយតម្លៃហានិភ័យ និងស្ថិតនៅក្រោមការត្រួតពិនិត្យ។

ថ្មីៗនេះ អាជ្ញាធរពន្ធដារបានផ្តោតលើកិច្ចខិតខំប្រឹងប្រែងនៅទីក្រុងហាណូយ និងទីក្រុងហូជីមិញ ដែលជាមជ្ឈមណ្ឌលកម្សាន្តដ៏ធំចំនួនពីរ ដែលមានទាំអវប្បធម៌ សិល្បៈ និងអាជីវកម្ម ដោយមានតារាល្បីៗជាច្រើនចូលរួមនៅក្នុងផ្លេតហ្វម​ឌីជីថល និងសកម្មភាពពាណិជ្ជកម្មអេឡិចត្រូនិកនានា។

នៅទូទាំងប្រទេស បុគ្គលចំនួន ៧៦​ ៤០០ ត្រូវបានចូលរួមនៅក្នុងសកម្មភាពពាណិជ្ជកម្មតាមអនឡាញ។ ករណីរំលោភបំពានជាង ៣ម៉ឺន ត្រូវបានដោះស្រាយរួចហើយ ដែលបានពិន័យជាទឹកប្រាក់សរុបចំនួន ​៥២ លានដុល្លារអាមេរិក។

​លោក Sơn បានបន្ថែមថា៖«សម្រាប់ផ្លេតហ្វមធំៗ រួមមាន Grab, Sendo, Lazada, Shopee និង TikTok យើងបានស្រង់ទិន្នន័យពន្ធទាំងអស់សម្រាប់ការត្រួតពិនិត្យ និងការអនុវត្តជាក់ស្តែង ក្នុងករណីចាំបាច់»។ ​