ក្រុមហ៊ុនហូលឌីងត្រូវបានអនុញ្ញាតឱ្យ​ធ្វើការបោះផ្សាយមូលប​ត្រកម្មសិទ្ធិនៅកម្ពុជា

និយ័តករមូលបត្រកម្ពុជា (SERC) បានប្រកាសដាក់ឱ្យ​ផ្លូវការសម្រាប់ការបើកផ្លូវដល់ប​ណ្តាក្រុមហ៊ុនហូលឌីង ដែលជាប្រភេទក្រុមហ៊ុនកាន់កាប់ភាគហ៊ុនតាមបណ្តាក្រុមហ៊ុន​នានាទាំងក្នុងស្រុកនិងក្រៅប្រទេសអាចធ្វើការបោះផ្សាយលក់មូលបត្រកម្មសិទ្ធិនៅផ្សារមូលបត្រកម្ពុជា (CSX) ចាប់ពីពេលនេះតទៅ។​

យោងតាមសេចក្តីជូនដំណឹងរបស់ SER ចេញផ្សាយកាលពីថ្ងៃទី២៣ ខែមករា ចាប់ពីការ​ជូនដំណឹងនេះតទៅ បណ្តាក្រុមហ៊ុនហូលឌីងដែលមាន​បំណងចង់​បោះផ្សាយលក់មូលបត្រ​កម្មសិទ្ធិនៅលើផ្សារមូលបត្រ​កម្ពុជា អាចធ្វើការចុះបញ្ជីបើកអាជីវកម្មរបស់ខ្លួននៅ​កម្ពុជាមុន​នឹងឈានទៅដល់ការអនុញ្ញាត្តឱ្យបោះផ្សាយ។

សេចក្ដីជូនដំណឹងដដែលបានឱ្យ​ដឹងទៀតថា៖«និយ័តករមូលបត្រកម្ពុជា ​សូមជម្រាបជូនដំណឹងដល់សាធារណជនទាំងអស់ ជ្រាបថា SERC បានអនុម័តដាក់ឱ្យប្រើប្រាស់នូវប្រកាស ចុះថ្ងៃទី២០ ខែមករា ឆ្នាំ២០២៥ ស្តីពីការបោះផ្សាយលក់មូលបត្រកម្មសិទ្ធិជាសាធារណៈរបស់ក្រុមហ៊ុនហូលឌីង។ ដូចនេះ ក្រុមហ៊ុនហូលឌីងដែលមានបំណងធ្វើការបោះផ្សាយលក់មូលបត្រកម្មសិទ្ធិជាសាធារណៈ ត្រូវអនុវត្តតាមប្រកាសស្តីពីការបោះផ្សាយលក់មូលបត្រកម្មសិទ្ធិជាសាធារណៈរបស់ក្រុមហ៊ុនហូលឌីង និងបទប្បញ្ញត្តិដែលមានជាធរមាន~។

ស៊ូ សុជាតិ អគ្គនាយក SERC ថ្លែងមកកាន់កម្ពុជាថ្មីថា​ក្រុមហ៊ុនហូលឌីងជាប្រភេទក្រុមហ៊ុន​ដែលមិនធ្វើប្រតិបត្តិការផ្ទាល់ គាត់ជាក្រុមហ៊ុនដែលកាន់កាប់ភាគហ៊ុននៅក្រុមហ៊ុនផ្សេងៗ។ ដោយលោកបានលើកជាឧទាហរណ៍ថា ក្រុមហ៊ុនេះកាន់កាប់ភាគហ៊ុនតាមបណ្តាក្រុមហ៊ុននានា ដូច្នេះខ្លួនក៏អាចធ្វើការបោះផ្សាយបានដែរទៅតាមបទបញ្ញត្តិថ្មី។

លោកថា៖«ការណ៍នេះក៏ជាឱកាសបើកច្រកផ្លូវមួយសម្រាប់ក្រុមហ៊ុនដែលនៅក្រៅប្រទេស​ក្នុងករណីដែលគាត់ចង់បោះផ្សាយ​ គាត់អាចមកបង្កើតក្រុមហ៊ុនហូលឌីងនៅកម្ពុជា ដូច្នេះគាត់អាចបោះផ្សាយនៅផ្សារមូលបត្រកម្ពុជាតែម្តង ប៉ុន្តែប្រតិបត្តិការក្រុមហ៊ុន​អាច​នៅក្រៅប្រទេសដែលកាន់កាប់ភាគហ៊ុនក្រុមហ៊ុននានា ហើយមកចុះបញ្ជីនៅកម្ពុជា ដែលនេះគឺជាចំនុចល្អមួយចំនួននៃការដំណើការបោះផ្សាយសម្រាប់ក្រុមហ៊ុនហូលឌីងនេះ។ វាគឺជាចំណុចសំខាន់ដែលយើងចេញបញ្ញិត្តបន្ថែម ដោយសារតែបញ្ញិត្តចាស់គឺពុំគ្របដណ្តប់ការបោះផ្សាយរបស់ក្រុមហ៊ុនហូលឌីងនេះឡើយ»។

ក្នុងឆ្នាំ ២០២៤កន្លងមកនេះ CSX បានស្វាគមន៍ក្រុមហ៊ុនចុះបញ្ជីលក់មូលបត្របំណុលចំនួន ២ក្រុមហ៊ុន រួមមាន  ក្រុមហ៊ុន តែល កូថេក និងក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត   ដែលជាក្រុមហ៊ុនចុះបញ្ជីលក់មូលបត្រកម្មសិទ្ធិ កាលពីឆ្នាំ២០១៦។

ចំពោះគណនីជួញដូរសរុបចំនួន ៥៨ ៣៩៤ ត្រូវបានបើកដំណើរការកាលពីឆ្នាំមុន ដែលក្នុងនោះមាន មានការកើនឡើងគណនីថ្មីចំនួន ១២ ៧៤៥ គណនី កើនឡើងជាង ២៦% បើធៀបនឹងចំនួនគណនីសរុបត្រឹមឆ្នាំ ២០២៣។

សម្រាប់តម្លៃជួញដូរជាមធ្យមក្នុងឆ្នាំ ២០២៤ មានជិត ១៣៤ ដុល្លារ ដែលមានការថយចុះប្រមាណ ៣៥% បើប្រៀបធៀបទៅនឹងឆ្នាំ ២០២៣ ​​ខណៈទំហំជួញដូរប្រចាំថ្ងៃជាមធ្យមស្មើនឹង ១០១ ៨៤៣​ ភាគហ៊ុន ដោយ​ ៩៣% ត្រូវបានជួញដូរដោយវិនិយោគិនក្នុងស្រុក។ ការដាក់បញ្ជាទិញលក់ជាមធ្យមប្រចាំថ្ងៃមានចំនួន ៣ ៦២៧ បញ្ជាក្នុងឆ្នាំ ២០២៤ កើនឡើង ២០% បើធៀបនឹងឆ្នាំ ២០២៣៕