លោក Starmer ប្រាប់ សេដ្ឋី​អាមេរិក​ Elon Musk កុំជ្រៀត​ជ្រែកកិច្ច​ការ​​​ផ្ទៃក្នុង​របស់​អង់គ្លេស

នាយករដ្ឋមន្ត្រី​ដែលរងសម្ពាធ​​​ឲ្យ​លាលែងពីអំណាច​របស់​​អង់គ្លេស លោក Keir Starmer បាន​ប្រាប់​ លោក Elon Musk ឈប់ជ្រៀតជ្រែកចូលក្នុងកិច្ចការនយោបាយរបស់អង់គ្លេស ក្រោយមហាសេដ្ឋីបច្ចេកវិទ្យា​និង​ម្ចាស់​ម៉ាក​យីហោ​​​រថយន្ត​​ Tesla បានបង្ហោះសារលើប្រព័ន្ធផ្សព្វផ្សាយ ជុំវិញសំណុំរឿងឃាតកម្មមួយដែលបានបង្កឲ្យមានការផ្ទុះកំហឹង និងការធ្វើបាតុកម្មជាសាធារណៈ ពាក់ព័ន្ធនឹងករណីមរណភាពរបស់និស្សិតប្រុសម្នាក់ឈ្មោះ Henry Nowak។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Reuters ​ផ្សាយ​​នៅ​ថ្ងៃទី៥ ខែមិថុនា ឲ្យ​ដឹង​ថា នៅក្នុងការថ្លែងបន្ទាប់ពីកិច្ចប្រជុំជាមួយក្រុមអភិបាលក្រុង លោក Keir Starmer បាននិយាយថា ប្រទេសជាតិចាំបាច់ត្រូវបង្ហាញពីអត្តសញ្ញាណរបស់ខ្លួនឲ្យបានច្បាស់លាស់ ក្នុងពេលដែល លោក Elon Musk ព្យាយាមជ្រៀតជ្រែកចូលក្នុងឆាកនយោបាយ និងញុះញង់ឲ្យមានការបែកបាក់ជាតិ។

មេដឹកនាំអង់គ្លេសរូបនេះបានសង្កត់ធ្ងន់ថា ប្រជាជនអង់គ្លេសគឺជាមនុស្សមានហេតុផល និងមានការយោគយល់ខ្ពស់ ព្រមទាំងបានអំពាវនាវឲ្យមានការឆ្លើយតបដោយភាពស្ងប់ស្ងាត់ចំពោះឧប្បត្តិហេតុរបស់​និស្សិត​​ Henry Nowak។

លោក Starmer ក៏បាន​លើក​ឡើង​ដែរថា ខ្លួនបានជួបពិភាក្សាផ្ទាល់ជាមួយក្រុមគ្រួសាររបស់ Henry Nowak នៅក្នុងទីក្រុងឡុងដ៍ ដើម្បីពិភាក្សាអំពីនីតិវិធីចាត់វិធានការលើការរំលោភបំពានរបស់ប៉ូលិសប្រចាំតំបន់ Hampshire។ លោកបានសម្តែងក្តីរំជួលចិត្តយ៉ាងខ្លាំងបន្ទាប់ពីជំនួបនោះ និងបានប្តេជ្ញានឹងចាត់រាល់វិធានការចាំបាច់ទាំងអស់ ដើម្បីកែតម្រូវកំហុសឆ្គងទាំងឡាយដែលពាក់ព័ន្ធនឹងព្រឹត្តិការណ៍នេះ។

បន្ទាប់មក អ្នកនាំពាក្យរបស់នាយករដ្ឋមន្ត្រីបានបញ្ជាក់បន្ថែមថា រដ្ឋាភិបាលមិនបានតម្រង់គោលដៅលើការបង្ហោះជាក់លាក់ណាមួយរបស់លោក Elon Musk នោះទេ ប៉ុន្តែមានការព្រួយបារម្ភយ៉ាងខ្លាំងចំពោះខ្លឹមសារជារួមដែលពាក់ព័ន្ធនឹងសំណុំរឿងនេះ។

លោក Musk បានបង្ហោះសារអំពីសំណុំរឿងយុវជន Henry Nowak អាយុ ១៨ ឆ្នាំ ត្រូវបានប៉ូលិសអង់គ្លេសដាក់ខ្នោះដៃ ក្នុងខណៈពេលដែលរូបគេកំពុងដេកដង្ហក់ជិតស្លាប់ ដោយសារមុខរបួសចាក់សម្លាប់ បន្ទាប់ពីឃាតកបានទម្លាក់កំហុសដោយកុហកថា ជាការវាយប្រហារបែបប្រកាន់ពូជសាសន៍។ ឃាតកនោះ គឺជាបុរសជនជាតិស៊ីក (Sikh) ត្រូវបានតុលាការកាត់ទោសកាលពីថ្ងៃចន្ទ។

នៅលើបណ្តាញសង្គម X លោក Musk បានបង្ហាញការយល់ឃើញថា ប៉ូលិសមានការរើសអើងប្រឆាំងនឹងជនជាតិស្បែកស និងបានចែករំលែកបន្ត នូវមតិរិះគន់របស់អ្នកប្រើប្រាស់ដទៃទៀតអំពីរបៀបចាត់ចែងលើឧប្បត្តិហេតុនេះ ។

ទោះជាយ៉ាងណាក៏ដោយ នេះក៏មិនមែនជាលើកទីមួយទេ ដែលលោក Musk ជាប់ពាក់ព័ន្ធនឹងជម្លោះវាយប្រហារពាក្យសម្តីនៅអង់គ្លេស។ កាលពីឆ្នាំមុន មហាសេដ្ឋីអាមេរិករូបនេះ បានរិះគន់រដ្ឋាភិបាលអង់គ្លេសជាសាធារណៈ ជុំវិញបញ្ហាក្រុមទំនើងបំពានលើកុមារ និងបានចេញមុខគាំទ្រសកម្មជនស្តាំនិយមជ្រុល Tommy Robinson ដែលកាលណោះ លោក Starmer ក៏បានចោទប្រកាន់លោក Elon Musk ថា បានផ្សព្វផ្សាយព័ត៌មានមិនពិតផងដែរ។

អត្ថបទ ៖ សាង ស្រីល័ក្ខ