កីឡា

ក្លឹបបណ្ដុះធនធានចំបាប់របស់ជើងខ្លាំងកីឡាករ ហេង វុទ្ធី ប្រកាសបើកជាផ្លូវការនៅខេត្តពោធិ៍សាត់

បានផុស

២ ថ្ងៃ មុន

នៅ

ថ្ងៃសុក្រ ៥ មិថុនា ២០២៦

ដោយ

នៅព្រឹកថ្ងៃទី៥ ខែមិថុនា ឆ្នាំ២០២៦ នេះក្លឹបចំបាប់ព្រះធាតុដែលបង្កើតឡើងដោយម្ចាស់មេដាយមាសស៊ីហ្គេម កីឡាករ ហេង វុទ្ធី នៅឯខេត្តពោធិ៍សាត់បានប្រកាសបើកដំណើរការជាផ្លូវការហើយក្រោមអធិបតីភាពលោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខេស៊ី បាណេត

នេះបើតាមការឲ្យដឹងពីកីឡាករ ហេង វុទ្ធី បញ្ជាក់ថាក្លឹបចំបាប់ព្រះធាតុនេះគឺជាការឧតប្ថម្ភគាំទ្រទាំងស្រុងពីលោក ខេស៊ី បាណេត ដែលចំណាយថវិកាអស់រាប់ម៉ឺនដុល្លាររហូតបញ្ចប់ការសាងសង់ និងបំពាក់សម្ភារហ្វឹកហាត់រួចរាល់ដូចនៅពេលនេះ។

ការប្រកួតមិត្តភាព

ម្ចាស់មេដាយមាសស៊ីហ្គេម ២០២៣ រូបនេះពិតជាអរគុណខ្លាំងណាស់ចំពោះការស្រឡាញ់ និងលើកស្ទួយវិស័យកីឡាចំបាប់ និងការចំណាយធនធានទ្រព្យសម្បត្តិរបស់លោក ខេស៊ី បាណេត ដើម្បីអភិវឌ្ឍន៍កីឡាមួយនេះឲ្យកាន់តែរីកចម្រើនបន្ថែមទៀត។ ក្លឹបចំបាប់នេះនឹងចូលរួមបណ្ដុះធនធានដែលជាកូនខ្មែរគ្មានលទ្ធភាព និងមានទេពកោលនៅតាមបណ្ដាស្រុកភូមិក្នុងខេត្តពោធិ៍សាត់នេះឲ្យមានសមត្ថភាពខ្លាំងពូកែបានចូលរួមប្រកួតតំណាងខេត្ត និងបណ្ដុះស្មារតីឈានដល់កម្រិតអន្តរជាតិនៅថ្ងៃខាងមុខ។

ការប្រកួតមិត្តភាព

បញ្ជាក់ដែរថា ក្នុងពិធីបើកសម្ពោធក្លឹបចំបាប់ព្រះធាតុនេះផងដែរក៏មានការប្រកួតមិត្តភាពពីបណ្ដាក្លឹប កីឡាករ កីឡាការិនីផ្សេងៗផងដែរដើម្បីបង្កភាពរីករាយ។ លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជាក៏បានចូលរួមជាអធិបតីភាព និងសម្ដែងការអបអរផងដែរក្នុងឱកាសសម្ពោធក្លឹបស្ដង់ដាមួយនេះ។ ក្លឹបចំបាប់ព្រះធាតុនេះគឺមានទីតាំងនៅភូមិឥន្ធ្យា ឃុំស្រែស្ដុក ស្រុកកណ្ដៀង ខេត្តពោធិ៍សាត់៕