ព័ត៌មានអន្ដរជាតិ

មនុស្សស្លាប់២០នាក់ ក្នុងការបំផ្ទុះរថយន្តនៅស៊ីរី

បានផុស

១ year មុន

នៅ

ថ្ងៃអង្គារ ៤ កុម្ភៈ ២០២៥

ដោយ

Chheang

ហេតុការណ៍បំផ្ទុះរថយន្ត បានសម្លាប់មនុស្សយ៉ាងតិចណាស់ ២០នាក់នៅជាយក្រុងភាគខាងត្បូងនៃទីក្រុង Manbij ប្រទេសស៊ីរី កាលពីថ្ងៃចន្ទទី៣ខែកុម្ភៈឆ្នាំ២០២៥ ដែលជាការវាយប្រហារលើកទី២នៅទីនោះក្នុងរយៈពេលត្រឹម៣ថ្ងៃ និងជាការវាយប្រហារដ៏សាហាវបំផុតរបស់ប្រទេសស៊ីរី ចាប់តាំងពីលោក Bashar al-Assad ត្រូវបានទម្លាក់ពីអំណាចក្នុងខែធ្នូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងការពារជនស៊ីវិលស៊ីរី ដែលគេស្គាល់ថាជាកងកម្លាំងមួក ស បាននិយាយថា រថយន្តដែលផ្ទុកទៅដោយសារធាតុផ្ទុះ បានផ្ទុះឡើងនៅលើផ្លូវធំមួយកន្លែង ខណៈដែលឡានដឹកកសិករប្រហែល ៣០នាក់បានបើកឆ្លងកាត់។

ទីភ្នាក់ងារនេះបានដាក់ចំនួនអ្នកស្លាប់នៅមុននេះ ១៥នាក់ ក្នុងនោះមានស្ត្រី ១៤នាក់ និងបុរសម្នាក់។ ស្ត្រីនិងកុមារី១៥នាក់ផ្សេងទៀតបានរងរបួសធ្ងន់ស្រាល។

ប្រធានាធិបតីស៊ីរី បានប្រកាសប្តេជ្ញាថានឹងចាប់ជនល្មើសដាក់ទោសធ្ងន់ធ្ងរបំផុត ហើយបានហៅទង្វើនេះថាជាការវាយប្រហារភេរវកម្ម។

មិនមានការអះអាងភ្លាមៗពីក្រុមប្រដាប់អាវុធណាមួយសម្រាប់ការបំផ្ទុះរថយន្តនោះទេ។

មេបញ្ជាការកងកម្លាំងប្រជាធិបតេយ្យស៊ីរី (SDF) ដែលជាសម្ព័ន្ធមិត្តដឹកនាំដោយជនជាតិឃឺដ គាំទ្រដោយសហរដ្ឋអាមេរិក ហើយគ្រប់គ្រងភាគច្រើននៃភាគឦសានស៊ីរី បានថ្កោលទោសការវាយប្រហារនេះថាជា «អំពើឧក្រិដ្ឋកម្ម» គំរាមកំហែងដល់ការរួបរួមជាតិ។

គួរបញ្ជាក់ថា ការបំផ្ទុះគ្រាប់បែកក្នុងរថយន្តកាលពីថ្ងៃចន្ទ គឺជាការវាយប្រហារលើកទី២នៅក្នុងតំបន់ Manbij ក្នុងរយៈពេលត្រឹមតែ៣ថ្ងៃប៉ុណ្ណោះ។

កងការពារជនស៊ីវិលស៊ីរី បាននិយាយថា កាលពីថ្ងៃសៅរ៍ មនុស្សចំនួន ៤នាក់ ក្នុងនោះមានទាំងកុមារ២នាក់ និងស្ត្រីម្នាក់ ត្រូវបានសម្លាប់ដោយការបំផ្ទុះនៅលើផ្លូវមួយកន្លែងក្នុងកណ្តាលទីក្រុង៕

ដោយ៖ ឈាង

ចុចអាន៖ កងកម្លាំងស៊ីរី ១៤នាក់បានស្លាប់ ក្រោមការវាយឆ្មក់របស់ក្រុមអ្នកស្មោះត្រង់នឹងលោក Assad

Related Topics:ប្រទេសស៊ីរី