រដ្ឋតម្រូវឱ្យអ្នកដែលប្រើប្រាស់ដ្រូន​ដែលអាចផ្ទុកទម្ងន់ចាប់ពី២គីឡូឡើងត្រូវទៅធ្វើស្វ័យប្រកាស

រដ្ឋាភិបាលបានកំណត់វិធានការសន្ដិសុខថ្មីមួយដោយតម្រូវឱ្យអ្នកដែលកំពុងគ្រប់គ្រង កាន់កាប់ ឬប្រើប្រាស់ដ្រូនដែលមានទម្ងន់ផ្ទុកចាប់ពី២គីឡូក្រាមឡើង ត្រូវទៅធ្វើស្វ័យប្រកាសនៅអធិការដ្ឋាននគរបាល ក្រុង ស្រុក ខណ្ឌ។

តាមសេចក្ដីប្រកាសអន្តរក្រសួងចំនួន៣ចុះថ្ងៃទី១៤ ខែកុម្ភៈ ក្រសួងមហាផ្ទៃ ក្រសួងកសិកម្ម និងរដ្ឋលេខាធិការដ្ឋានអាកាសចរណ៍ស៊ីវិល​ បានបញ្ជាក់ថាការតម្រូវនេះមិនអនុវត្តន៍ទៅលើដ្រូនដែលប្រើប្រាស់សម្រាប់វិស័យការពារជាតិ និងសន្ដិសុខជាតិនោះទេ។

ដោយឡែកចំពោះការបង្ហោះដ្រូនដែលអាចផ្ទុកទម្ងន់ចាប់ពី២គីឡូក្រាមឡើងក្រៅពីត្រូវប្រកាសនៅតាមអធិការដ្ឋាននគរបាលហើយ ក៏ត្រូវរាយការណ៍រាល់ពេលដែលត្រូវការបង្ហោះដ្រូនរបស់ខ្លួនទៅកាន់​ប៉ុស្ដិ៍នគរបាលឃុំសង្កាត់ទីកន្លែងដែលបង្ហោះផងដែរ និងមិនត្រូវហោះលើសពី១២០ម៉ែត្រនោះទេ។

មានទីតាំងមួយចំនួនដែលបានហាមឃាត់បង្ហោះដ្រូនក្នុងប្រកាសអន្តរក្រសួងនេះក្នុងនោះក៏មានលំនៅដ្ឋានប្រធានព្រឹទ្ធសភា ប្រធានរដ្ឋសភា និងនាយករដ្ឋមន្ត្រី។

សេចក្ដីប្រកាសនេះក៏ព្រមានពីវិធានការផ្លូវច្បាប់ចំពោះអ្នកដែលមិនគោរពតាមបទប្បញ្ញាត្តិដែលបានចែងផងដែរ។

ជាការកត់សម្គាល់សេចក្ដីប្រកាសអន្តរក្រសួងនេះចេញតែប៉ុន្មានថ្ងៃប៉ុណ្ណោះបន្ទាប់ពីប្រធានព្រឹទ្ធសភាសម្ដេចតេជោ ហ៊ុន សែន បានទម្លាយពីការចាប់បានគម្រោងរបស់ក្រុមនិយមជ្រុលចង់យកដ្រូនកសិកម្មធ្វើឃាតលើសម្ដេច និងក្រុមគ្រួសារ។ សម្ដេចតេជោថា បានដឹងថាមេខ្លោងនៃគម្រោងធ្វើឃាតសម្ដេចជាអ្នកណាហើយ តែថាពេលនេះ «ត្រូវកំចាត់ពួកជ្រុលនិយមនិងហិង្សាឱ្យអស់សិន»៕

អត្ថបទដោយ ហ៊ុន សិរីវឌ្ឍន៍