ព័ត៌មានអន្ដរជាតិ

ជំនួបកំពូល ត្រាំ-ពូទីននឹងផ្សព្វផ្សាយភ្លាម ពេលកំណត់ជាក់លាក់

បានផុស

១ year មុន

នៅ

ថ្ងៃសៅរ៍ ២២ កុម្ភៈ ២០២៥

ដោយ

រដ្ឋមន្ត្រីការបរទេសរុស្ស៊ី លោក Sergey Lavrov ក៏ដូចជាសមភាគីសហរដ្ឋអាមេរិក លោក Marco Rubio បានបញ្ជាក់ជំហរដូចគ្នាថា ជំនួបកំពូលប្រមុខរដ្ឋមហាអំណាចនុយក្លេអ៊ែររុស្ស៊ីនិងអាមេរិក នឹងត្រូវផ្សព្វផ្សាយភ្លាមពេលកំណត់ជាក់លាក់។

កាលបរិច្ឆេទនៃជំនួបកំពូលរវាងប្រទេសមហាអំណាចទាំងពីរនៅតែលាក់យ៉ាងជិតរហូតដល់ពេលនេះ បើទោះបីជាប្រធានាធិបតីសហរដ្ឋអាមេរិកលោក ដូណាល់ ត្រាំ ធ្លាប់បានលើកឡើងថា ជំនួបកំពូលរវាងលោកនិងលោកពូទីនអាចធ្វើឡើងនៅមុនដំណាច់ខែនេះ។

រដ្ឋមន្ត្រីការបរទេសរុស្ស៊ី លោក Sergey Lavrov និងសមភាគីអាមេរិក លោក Marco Rubio។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេសរុស្ស៊ី លោក Sergey Lavrov បានប្រាប់អ្នកសារព័ត៌មាននៅទីក្រុង JOHANNESBURG ប្រទេសអាហ្វ្រិកខាងត្បូង ជាទីដែលលោកចូលរួមប្រជុំរដ្ឋមន្ត្រីការបរទេសនៃក្រុមប្រទេស G20 កាលកថ្ងៃទី២១ខែកុម្ភៈ ថា នៅពេលដែលជំនួបរវាងប្រធានាធិបតីរុស្ស៊ី និងសហរដ្ឋអាមេរិក លោក វ្ល៉ាឌីមៀ ពូទីន និងលោក ដូណាល់ ត្រាំ ត្រូវបានបញ្ជាក់ ព័ត៌មាននេះនឹងត្រូវបានផ្សព្វផ្សាយជាសាធារណៈភ្លាមៗ។

ទីភ្នាក់ងារព័ត៌មានរុស្ស៊ី TASS បានស្រង់សម្តីលោក Lavrov ដូចបាននិយាយថា៖«នៅពេលដែលវាកើតឡើង អ្នកនឹងត្រូវបានគេជូនដំណឹង។ ចំពោះបញ្ហាដែលកំពុងពិភាក្សា ការរក្សាការសម្ងាត់គឺជាផ្នែកសំខាន់មួយនៃដំណើរការការទូត។ ខ្ញុំប្រាកដថា យើងនឹងជូនដំណឹងដល់អ្នកក្នុងពេលសមស្រប។ ជាដំបូង វានឹងធ្វើឡើងដោយអង្គភាពសារព័ត៌មានរបស់វិមានក្រឹមឡាំង»។

អ្នកនាំពាក្យរដ្ឋាភិបាលរុស្ស៊ីដែលគេស្គាល់ថា វិមានក្រឹមឡាំង លោក Dmitry Peskov បាននិយាយមុននេះថា ក្នុងអំឡុងពេលហៅទូរស័ព្ទរបស់ប្រធានាធិបតីរុស្ស៊ីនិងអាមេរិក ប្រមុខរដ្ឋទាំងពីរបានយល់ព្រមបន្តការទំនាក់ទំនងផ្ទាល់ខ្លួន និងរៀបចំកិច្ចប្រជុំដោយផ្ទាល់។

សារព័ត៌មានរ៉យទ័រកាលថ្ងៃទី២១ខែកុម្ភៈ បានផ្សាយថា រដ្ឋមន្ត្រីការបរទេសសហរដ្ឋអាមេរិក លោគ Marco Rubio បានអះអាងថា ជំនួបរវាងមេដឹកនាំកំពូលនៃប្រទេសមហាអំណាចទាំងពីរកើតមាន នៅពេលណាមានការរីកចម្រើនលើការចរចាបញ្ចប់សង្គ្រាមនៅអ៊ុយក្រែន។

ក្រោយជំនួបលើកដំបូងកម្រិតរដ្ឋមន្ត្រីការបរទេសរវាងសហរដ្ឋអាមេរិកនិងរុស្ស៊ីកាលថ្ងៃទី១៨ខែកុម្ភៈនៅទីក្រុងរីយ៉ាដប្រទេសអារ៉ាប៊ីសាអូឌីត ភាគីទាំងពីរបានជជែកគ្នាជិត៥ម៉ោង ដោយផ្តោតលើការស្តារទំនាក់ទំនងការទូតនឹងគ្នាទៅរកភាពប្រក្រតីឡើងវិញ កំណត់របៀបវារៈសេដ្ឋកិច្ច ការទទួលស្គាល់ផលប្រយោជន៍គ្នាទៅវិញទៅមក ហើយការជជែករឿងរ៉ាវសន្តិភាពនៅអ៊ុយក្រែនត្រូវកំណត់ធ្វើឡើងដោយឡែក៕

ព័ត៌មានអន្ដរជាតិ២៣ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា