ស្ពានមិត្តភាពកម្ពុជា-ថៃ គ្រោងដាក់ឱ្យប្រើប្រាស់ឆាប់ៗនេះ

សេចក្ដីព្រាងកិច្ចព្រមព្រៀង ស្ដីពីការគ្រប់គ្រង និងថែទាំស្ពានមិត្តភាពកម្ពុជា-ថៃ (ស្ទឹងបត់-បានណងអៀន) ត្រូវបានការរំពឹងទុកថា នឹងអាចនឹងចុះហត្ថលេខាដោយភាគីទាំងពីរ ក្នុងពេលឆាប់ៗខាងមុខ ក្នុងឆ្នាំ២០២៥ នេះ ហើយក៏ក្លាយជាសមិទ្ធផលមួយសម្រាប់ចូលរួមអបអរសាទររំលឹកខួបអនុស្សាវរីយ៍លើកទី៧៥ នៃចំណងការទូតរវាងប្រទេសទាំងពីរ កម្ពុជា-ថៃ ផងដែរ។

កម្ពុជា-ថៃ បានត្រៀមរៀបចំសម្ពោធបើកដំណើរការច្រកព្រំដែនបានណងអៀន-ស្ទឹងបត់ឆាប់ៗ ដើម្បីជំរុញ និងបង្កើនពាណិជ្ជកម្ម ពិសេសជួយកាត់បន្ថយការកកស្ទះនៅច្រកត្រួតពិនិត្យព្រំដែនរវាងប្រទេសទាំងពីរ។

លោក ហេង រត្នពិសិដ្ឋ អគ្គនាយកសាធារណការ បានដឹកនាំគណៈប្រតិភូកម្ពុជា ចូលរួមកិច្ចប្រជុំពិនិត្យពិភា​ក្សា និងចរ​ចា​លើសេចក្ដីព្រាងកិច្ចព្រមព្រៀងស្ដីពីការគ្រប់គ្រង និងថែទាំស្ពានមិត្តភាពកម្ពុជា-ថៃ រយៈពេល ២ ថ្ងៃ គឺនៅថ្ងៃទី ២០ ដល់​ថ្ងៃទី ២១ ខែកុម្ភៈ ឆ្នាំ ២០២៥ ជាមួយគណៈប្រ​តិភូថៃ នៅខេត្តជលបុរី ប្រទេសថៃ ដែលមានការចូលរួមពីតំណាងក្រសួងមហាផ្ទៃ ក្រសួងការបរទេស​ និងភាគីពាក់ព័ន្ធ។

កិច្ចប្រជុំបានពិនិត្យ ពិភាក្សា និងចរចាលើសេចក្ដីព្រាងកិច្ចព្រមព្រៀងនេះ ដោយឈរលើស្មារតីភាពជាអ្នកជិតខាងល្អ និងភាពជាដៃគូយុទ្ធសាស្រ្ត រហូតឈានទៅរកការឯកភាពរួមគ្នាលើការប្រើប្រាស់ពាក្យពេចន៍ទៅតាមមាត្រានីមួយៗ ជាពិសេ​ស​គឺបានសម្រេចបញ្ចប់ការចរចាលើមាត្រាដែលកំណត់អំពីការមិនប្រមូលយកកម្រៃសេវាឆ្លងកាត់ស្ពានមិត្តភាពកម្ពុជា-ថៃ(ស្ទឹងបត់-បានណងអៀន)។ ភាគីទាំងពីរនឹងពិភាក្សា ប្រឹក្សាយោបល់ និងឯកភាពលើការប្រមូលកម្រៃសេវាឆ្លងកាត់ស្ពាននាពេលអនាគត។

រដ្ឋាភិបាលកម្ពុជា និងថៃ បានសម្រេចសាងសង់គម្រោងច្រកទ្វារព្រំដែនអន្តរជាតិកម្ពុជា-ថៃ (ស្ទឹងបត់-បានណងអៀន) នេះ ក្រោមឥណទានសម្បទានក្នុងទំហំ​ទឹកប្រាក់ប្រមាណ ២៦.៥លានដុល្លារអាមេរិក កាលពីខែ កញ្ញាឆ្នាំ ២០២៣៕