វៀតណាម​ក្លាយជាមជ្ឈមណ្ឌលសំខាន់សម្រាប់ក្រុមហ៊ុនផលិតវាយនភ័ណ្ឌអន្តរជាតិ

អ្នកជំនាញ​លើកឡើងថា​ ទីតាំងយុទ្ធសាស្ត្ររបស់វៀតណាម ការប្តេជ្ញាចិត្តចំពោះនិរន្តរភាព និងការច្នៃប្រឌិតរបស់ប្រទេស​នេះ បានធ្វើឱ្យវៀតណាម​ក្លាយជាទិសដៅដ៏គួរឱ្យទាក់ទាញសម្រាប់ក្រុមហ៊ុន​ផលិតវាយនភ័ណ្ឌអន្តរជាតិ ដែលកំពុងស្វែងរកការធ្វើពិពិធកម្មខ្សែចង្វាក់ផ្គត់ផ្គង់ពិភពលោក។ នេះបើតាម​ការ​ចុះ​ផ្សាយ​របស់​ទីភ្នាក់ងារសារព័ត៌មាន​វៀតណាម​ VNA។

ការលើកឡើង​បែប​នេះ ធ្វើឡើងក្នុង​ពិព័រណ៍ពាណិជ្ជកម្មអន្តរជាតិវៀតណាមសម្រាប់សម្លៀកបំពាក់ វាយនភ័ណ្ឌ និងបច្ចេកវិទ្យា​វាយនភ័ណ្ឌឆ្នាំ ២០២៥ (VIATT 2025) នៅទីក្រុងហូជីមិញ កាលពីពេល​ថ្មីៗនេះ​។

អ្នកជំនាញបានកត់សម្គាល់ថា ឧស្សាហកម្មវាយនភ័ណ្ឌរបស់វៀតណាមឈានចូលឆ្នាំ ២០២៥​ ជាមួយនឹងសន្ទុះពីចំណុចសំខាន់ៗដែលសម្រេចបានក្នុងឆ្នាំ ២០២៤​។ ប្រទេសនេះ រំពឹងថានឹងវ៉ាដាច់បង់ក្លាដែសដោយ​ក្លាយ​ជាអ្នកនាំចេញសម្លៀកបំពាក់ធំជាងគេទី២​ របស់ពិភពលោកបន្ទាប់ពីប្រទេសចិន។

វិស័យវាយនភ័ណ្ឌរបស់វៀតណាម រួមមានក្រុមហ៊ុនប្រមាណ ៧០០០ និងកម្មករជាង ៣ លាននាក់ ធ្វើ​ការនាំចេញ​ប្រមាណ ៨០ ភាគរយ នៃ​ផលិតកម្មសរុប និងប្រើប្រាស់ក្នុងស្រុក​ប្រមាណ ២០ ភាគរយ​។ ការរីកចម្រើននៃឧស្សាហកម្មនេះ ត្រូវបានគាំទ្រដោយបណ្តាញភស្តុភារ កម្លាំងពលកម្មជំនាញ និងបរិយាកាសនយោបាយដែលមានស្ថិរភាព។

ទីផ្សារវាយនភ័ណ្ឌ​ក្នុងស្រុក​របស់វៀតណាម រំពឹង​ថា​នឹងកើនឡើងក្នុងអត្រាកំណើនប្រចាំឆ្នាំ (CAGR) ២,៤ ភាគរយ ពីឆ្នាំ ២០២៤​ ដល់ឆ្នាំ ២០៣២​ ដែលជំរុញដោយកំណើន​តម្រូវការវាយនភណ្ឌ ការពង្រីកពាណិជ្ជកម្មតាមប្រព័ន្ធអេឡិចត្រូនិក និងគោលនយោបាយរដ្ឋាភិបាល។

អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្ម លោក Phan Thi Thang បានគូសបញ្ជាក់អំពីការអភិវឌ្ឍដ៏រឹងមាំរបស់វិស័យនេះ និងតួនាទីសំខាន់វា​ក្នុងកំណើនសេដ្ឋកិច្ចរបស់វៀតណាម។ នៅឆ្នាំ ២០២៤​ ការនាំចេញវាយនភ័ណ្ឌ និងសម្លៀកបំពាក់សម្រេចបានជិត ៤៤ ប៊ីលានដុល្លារ កើនឡើង ១១,២៦ ភាគរយ ពីឆ្នាំ ២០២៣ ដែលស្មើ​នឹង ១២-១៦ ភាគរយ នៃចំណូលនាំចេញ​សរុប​របស់​ប្រទេស៕