ពូទីន៖ តាម​សំណើ​លោក ត្រាំ រុស្ស៊ី​នឹង​ទុក​ជីវិត​ទាហាន​អ៊ុយក្រែន​នៅ Kursk បើ​​ពួកគេចុះ​ចាញ់

ជាការឆ្លើយតបទៅនឹងការអំពាវនាវរបស់ប្រធានាធិបតីអាមេរិក លោក ដូណាល់ ត្រាំ, មេ​ដឹក​រុស្ស៊ី លោក វ្ល៉ាឌីមៀរ ពូទីន បាននិយាយ​ថា​ លោក​នឹង​​មិន​យក​ជីវិតរបស់ទាហានអ៊ុយក្រែនដែលឡោមព័ទ្ធនៅតំបន់ Kursk របស់រុស្ស៊ី​នោះ​ទេ ប្រសិន​បើ​ពួកគេ​​​​យល់​ព្រម​​​ចុះចាញ់។

លោក ពូទីន បានបញ្ជាក់​កាល​ពី​ថ្ងៃ​សុក្រ​ទី​១៤​ខែ​មីនា​ថា លោកនឹងគោរពសំណើមនុស្សធម៌របស់លោក ត្រាំ ក្នុងលក្ខខណ្ឌដែលកងទ័ពអ៊ុយក្រែន​ទម្លាក់​អាវុធ​ចុះ ដើម្បី​ជៀស​វាង«ការ​សម្លាប់​រង្គាល»។

ស្ថានភាពនៅ​តំបន់ Kursk បានក្លាយជាចំណុចស្នូលនៃជម្លោះដែលកំពុងបន្ត។ កងកម្លាំង​អ៊ុយក្រែន​ បាន​វាយលុក​ចូល​ក្នុង​តំបន់​នេះ​​កាល​ពី​​ខែ​សីហា​ឆ្នាំ​២០២៤ ដោយ​ដណ្តើម​បាន​ការ​កាន់កាប់​ទី​តាំង​​ជា​ច្រើន។ ទោះបីជាយ៉ាងណាក៏ដោយ តាមសេចក្តីរាយការណ៍ ការវាយលុករបស់រុស្ស៊ីនាពេលថ្មីៗនេះ បានឡោមព័ទ្ធកងទ័ពអ៊ុយក្រែនប្រមាណ ១០ ០០០នាក់ ដែលធ្វើឲ្យពួកគេប្រឈមនឹងហានិភ័យនៃការកាត់ផ្តាច់ការផ្គត់ផ្គង់ និងការពង្រឹង​កង​កម្លាំង។

អ៊ុយក្រែនបានបដិសេធថា កងកម្លាំងរបស់ខ្លួននៅក្នុង​តំបន់ Kursk ត្រូវបានឡោមព័ទ្ធ ដោយពណ៌នាការអះអាងនេះថាជាការប្រឌិតរបស់រុស្ស៊ី ប៉ុន្តែប្រធានាធិបតី​អ៊ុយក្រែន​ លោក វ៉ូឡូឌីមៀរ ហ្សេលេនស្គី កាលពីថ្ងៃសុក្របាន​ប្រាប់​ថា​ ស្ថានភាពសម្រាប់កងកម្លាំងអ៊ុយក្រែននៅទីនោះមាន​ភាព«លំបាកខ្លាំងណាស់»។

លោក ត្រាំ បានសរសេរនៅលើប្រព័ន្ធផ្សព្វផ្សាយសង្គមថា លោកបានស្នើសុំ​ឲ្យ​ប្រធានាធិបតីរុស្ស៊ីជួយ​ទុក​ជីវិត​ជនជាតិ​អ៊ុយក្រែនរាប់ពាន់នាក់ ដែល«ត្រូវបានឡោមព័ទ្ធទាំងស្រុង» និងងាយរងគ្រោះ។

លោក ត្រាំ បាន​រៀបរាប់​ថា៖ «ខ្ញុំបានស្នើសុំយ៉ាងខ្លាំងទៅកាន់ប្រធានាធិបតី ពូទីន ឲ្យរួចជីវិតពួកគេ។ នេះ​នឹង​​ក្លាយ​ជា​ការ​សម្លាប់​រង្គាល​ដ៏​អាក្រក់​មួយ ដែល​មិន​ធ្លាប់​មាន​ចាប់​តាំង​ពី​សង្គ្រាម​លោក​លើក​ទី​ពីរ»។

លោក ពូទីន ថ្លែងទៅកាន់ក្រុមប្រឹក្សាសន្តិសុខរបស់លោក​ថា លោកបានអាន​និង​យល់​ពី​ការអំពាវនាវរបស់លោក ត្រាំ ជុំវិញ​ការ​ពិចារណាលើផ្នែកមនុស្សធម៌។

លោក ពូទីន បាននិយាយថា៖ «ក្នុងន័យនេះ ខ្ញុំចង់សង្កត់ធ្ងន់ថា បើ[កងទ័ពអ៊ុយក្រែន]ដាក់អាវុធចុះចាញ់ ពួកគេនឹងត្រូវបានធានាជីវិត និងការព្យាបាលសមរម្យ ស្របតាមច្បាប់អន្តរជាតិ និងច្បាប់នៃសហព័ន្ធរុស្ស៊ី»។

សូម​បញ្ជាក់​ថា កាល​ពី​ពេល​ថ្មីៗ​នេះ ប្រធានាធិបតី​អាមេរិក បានស្នើបទឈប់បាញ់រយៈពេល ៣០​ថ្ងៃ ដើម្បីកាត់បន្ថយស្ថានការណ៍ ដែលជាវិធានការមួយ​ទទួលបានសុទិដ្ឋិនិយម​ដ៏​ខ្លាំង​ពីមន្ត្រីរុស្ស៊ី និងអ៊ុយក្រែន។ លោក ហ្សេលេនស្គី បានអំពាវនាវ​ឲ្យ​អាមេរិកបង្កើនឥទ្ធិពលរបស់ខ្លួន ដើម្បីដាក់សម្ពាធលើប្រទេសរុស្ស៊ី​ឲ្យ​យល់ព្រមបទឈប់បាញ់ ដោយសង្កត់ធ្ងន់លើតម្រូវការដើម្បីជៀសវាងការបង្ហូរឈាមបន្ថែមទៀត។

ខណៈពេលដែលលោក ពូទីន បានយល់ព្រមជាគោលការណ៍ចំពោះបទឈប់បាញ់ លោកបានបង្ហាញថា ការពិភាក្សាបន្ថែមទៀតគឺចាំបាច់ដើម្បីបញ្ចប់លក្ខខណ្ឌ។ សហគមន៍អន្តរជាតិបន្តតាមដានការវិវឌ្ឍ​នេះ​យ៉ាងដិតដល់ ដោយសង្ឃឹមថា កិច្ចខិតខំប្រឹងប្រែងការទូត​នឹងនាំទៅរកដំណោះស្រាយដោយសន្តិវិធីនៃជម្លោះនៅក្នុងតំបន់៕

ដោយ៖ ឈាង