អាស៊ីអាគ្នេយ៍ច្រើនប្រទេសជួបរញ្ជួយដី ប៉ុន្តែ ថៃនិងមីយ៉ាន់ម៉ា ធ្ងន់ជាងគេ 

តាមការចុះផ្សាយរបស់ AP នៅថ្ងៃសុក្រទី២៨ខែមីនាឆ្នាំ២០២៥ រាជធានីបាងកក នៃប្រទេសថៃ បានជួបគ្រោះរញ្ជួយដីកម្រិតធ្ងន់ ដែលជះឥទ្ធិពលមកពីប្រទេសមីយ៉ាន់ម៉ា ដោយបង្កការភ័យស្លន់ស្លោ ខណៈប្រទេសអាស៊ីអាគ្នេយ៍ផ្សេងទៀត ក៏រងឥទ្ធិពលផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរញ្ជួយដីនេះ មានកម្រិត៧.៧រ៉ិចទ័រមានចំណុចកណ្តាលនៅទីក្រុង Sagaing នៃប្រទេសមីយ៉ាន់ម៉ា ជាមួយជម្រៅ ១០គីឡូម៉ែត្រ ចំណែកនៅថៃឯណោះ មនុស្សមួយចំនួនត្រូវជម្លៀសនិងរត់ចេញពីអគារ ទៅកាន់កន្លែងសុវត្ថិភាព។

មានសេចក្តីរាយការណ៍ថា នៅប្រទេសថៃ អគារកម្ពស់ប្រហែល៥០ជាន់បានបាក់រលំ និងមានកម្មកររាប់សិបនាក់ជាប់នៅក្នុងនោះ ដោយសារម៉ោងដែលរលំគឺជាម៉ោងធ្វើការ។ ជាមួយគ្នានោះ ប្រភពនៅប្រទេសថៃបានអះអាងថា សូម្បីអគាររដ្ឋាភិបាល អគារសភាក៏ញ័រដែរ។

ប្រទេសអាស៊ីអាគ្នេយ៍ផ្សេងទៀតដែលរងឥទ្ធិពលដោយសាររញ្ជួយដីនេះមានដូចជាវៀតណាមនិងឡាវ ខណៈនៅឯចិននិងឥណ្ឌា ឯណោះ ក៏រង្គើតិចៗដែរ ប៉ុន្តែមិនធ្ងន់ដូចនៅថៃនិងមីយ៉ាន់ម៉ាទេ។

ភ្លាមៗមិនទាន់មានសេចក្តីរាយការណ៍ច្បាស់លាស់អំពីការខូចខាតឬជនរងគ្រោះនោះទេ៕

អត្ថបទ៖ សុខ សុវណ្ណ

ចុចអាន៖ ការ​ខូចខាត​បឋម ព្រោះ​គ្រោះរញ្ជួយដីដ៏ខ្លាំងក្លា​ដែល​វាយប្រហារអាស៊ីអាគ្នេយ៍