អ្នកនាំពាក្យ៖ បុគ្គលិកដែលរត់ចេញពីអគារខ្ពស់ៗ ព្រោះខ្លាចករណីរញ្ជួយដីពេលនេះត្រឡប់ចូលអគារវិញធម្មតា

លោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍នៅរសៀលថ្ងៃទី២៨មីនានេះថារហូតមកទល់ពេលនេះស្ថានភាពបានវិលមករកធម្មតាឡើងវិញហើយមន្ត្រីធនាគារដែលបានផ្អើលនាំគ្នាចេញពីអគារធ្វើការដោយសារលើកឡើងតៗគ្នាថាមានការរង្គើរអគារបណ្តាលមកពីរញ្ជួយដីនៅទីក្រុងបាងកកប្រទេសថៃបានចូលទៅអគារវិញអស់ហើយ។

លោក សុទ្ធ គឹមកុលមុន្នី ថ្លែងដូច្នេះ « យើងឃើញបង្ហោះតាមហ្វេសប៊ុកដោយឃើញបុគ្គលិកធនាគារមួយចំនួនគាត់បានចេញពីធនាគារនៅក្បែរអគារ៤២ជាន់ និងផ្លូវព្រះនរោត្តមដោយសារថាមានការរង្គើរ អគារប៉ុន្តែជាក់ស្តែងយើងអត់ទាន់មានឃើញសញ្ញា មានការរង្គើរនៅរាជធានីភ្នំពេញនៅឡើយទេ។ ក្រុមការងារជំនាញបាននិងកំពុងបន្តចុះប្រមូលព័ត៍មានបន្ថែម ដើម្បីវាយតម្លៃអំពីស្ថានភាពដែលបានកើតឡើងតើវាមានការប៉ះពាល់ដល់កម្ពុជាឬយ៉ាងណា»។

លោកបានបន្តទៀតថា« មកដល់ពេលនេះសភាពការណ៍បានវិលមករកជាធម្មតាវិញហើយៗមន្ត្រីធនាគារដែលផ្អើលចេញបានចូលធ្វើការវិញហើយៗធនាគារខ្លះដល់ម៉ោងចេញក៏ទៅផ្ទះតែម្តង។ជារួមអត់ទាន់មានបញ្ហាអ្វីកើតឡើងទេហើយមកដល់ពេលនេះសភាពការណ៍បានវិលមករកភាពដើមឡើងវិញហើយ»។

ពាក់ព័ន្ធនឹងហេតុការណ៍នៃការរញ្ជួយដីនៅក្នុងប្រទេសថៃ និងមីយ៉ាន់ម៉ា នៅរសៀល ថ្ងៃទី២៨ ខែមីនា ឆ្នាំ២០២៥នេះ អ្នកនាំពាក្យក្រសួងការបរទេសកម្ពុជា លោក ជុំ សុន្ទរី អះអាងថា ក្រសួងកំពុងតាមដានយ៉ាងយកចិត្តទុកដាក់ និងបានណែនាំទៅស្ថានទូតកម្ពុជាប្រចាំនៅប្រទេសថៃ និងមីយ៉ាន់ម៉ា ដើម្បីប្រមូលព័ត៌មានអំពីសុវត្ថិភាពរបស់ពលរដ្ឋ និងពលករខ្មែរ ដែលកំពុងស្ថិតក្នុងប្រទេសទាំងពីរ។គិតត្រឹមរសៀលថ្ងៃដដែល ក្រសួងទទួលបានព័ត៌មានថាមានករណីរញ្ជួយដីកម្រិតខ្លាំងនៅទីក្រុងបាងកក ប្រទេសថៃ និងប្រទេសមីយ៉ាន់ម៉ារ ដែលបណ្តាលឱ្យមានការបាក់អគារ និងបង្កការខូចខាតទ្រព្យសម្បត្តិមួយចំនួនផងដែរ ប៉ុន្តែស្ថានទូត មិនទាន់ទទួលបានព័ត៌មានណាមួយថាមានពលករ ឬពលរដ្ឋខ្មែរ រងគ្រោះដោយសារហេតុការណ៍រញ្ជួយដីនៅប្រទេសទាំងពីរនេះនៅឡើយទេ។

ចំណែកក្រសួងការងារ និងបណ្តុះបណ្តាលវិជ្ជាជីវៈ និងស្ថានឯកអគ្គរាជទូតកម្ពុជាប្រចាំទីក្រុងបាងកក បានកំពុងតាមដានករណីនេះ និងបានធ្វើការទាក់ទងជាមួយស្ថាប័នពាក់ព័ន្ធថៃ ដើម្បីស្វែងរកព័ត៌មានលម្អិតអំពីផលប៉ះពាល់ និងជនរងគ្រោះនៅទីតាំងដែលមានការបាក់រលំ។ ព័ត៌មានបឋម គិតត្រឹមម៉ោង ៣៖១៥នាទីរសៀល ថ្ងៃទី២៨ ខែមីនា ឆ្នាំ២០២៥នេះ គឺនៅការដ្ឋានដែលបាក់រលំអាគារមួយកន្លែងមានពលករបរទេសចំនួនប្រមាណជា ៣០នាក់ អាចនៅជាប់គាំងក្នុងអាគារ ប៉ុន្តែមិនទាន់អាចបញ្ជាក់បានថាមានជនជាតិណាខ្លះ។ អាជ្ញាធរថៃកំពុងធ្វើការសង្រ្គោះ និងជន្លៀស។

ក្រសួង និងស្ថានទូតនឹងបន្តតាមដាន និងត្រៀមខ្លួនផ្តល់ការគាំពារក្នុងករណីចាំបាច់។ ក្រសួងសូមអំពាវនាវដល់បងប្អូនដែលកំពុងស្នាក់នៅទីក្រុងបាងកក សូមបង្កើនការប្រុងប្រយ័ត្ន និងសូមអនុវត្តតាមការណែនាំរបស់អាជ្ញាធរ និងមន្ត្រីបច្ចេកទេសរបស់ថៃ៕

អត្ថបទ៖សំអឿន