ត្រាំ ប្រកាសថា អាចនឹងលែងជួយបញ្ចប់សង្គ្រាមរុស្ស៊ី-អ៊ុយក្រែន បើមើលទៅ ពិបាកពេក

ជុំវិញរឿងដែលថា សហរដ្ឋអាមេរិកនឹងដកខ្លួនឈប់ដើរតួនាទីជាអ្នកសម្របសម្រួល ស្វែងរកសន្តិភាពឲ្យរុស្ស៊ីនិងអ៊ុយក្រែននោះ ពេលនេះប្រមុខសេតវិមានលោក ដូណាល់ ត្រាំ បានចេញមុខបញ្ជាក់យ៉ាងច្បាស់ថា ពិតជាដូច្នោះមែន ទីក្រុងវ៉ាស៊ីនតោន នឹងមិនបន្តទៀតឡើយ បើមើលទៅរឿងនេះពិបាកពេក ដោះស្រាយមិនបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកត្រាំ បានប្រាប់ទៅអ្នកសារព័ត៌មានកាលពីថ្ងៃសុក្រទី១៨ខែមេសាឆ្នាំ២០២៥ថា ទីក្រុងវ៉ាស៊ីនតោន នឹងលែងប្រឹងស្វែងរកដំណោះស្រាយសន្តិភាពក្នុងសង្គ្រាមរុស្ស៊ី-អ៊ុយក្រែនទៀតហើយ បើភាគីទាំងពីរមិនព្រមចូលតុចរចាគ្នាទេនោះ។

លោកត្រាំនិយាយថា បើភាគីណាមួយបន្តធ្វើរឿងដែលលំបាកខ្លាំង យើងនឹងដកខ្លួន។ សហរដ្ឋអាមេរិក នឹងមិនបន្តធ្វើជាអ្នកសម្របសម្រួលទៀតឡើយ។ យ៉ាងណា ទីក្រុងវ៉ាស៊ីនតោន នៅតែចង់ឃើញសង្គ្រាមនេះ មានពន្លឺនៃទីបញ្ចប់។

ការលើកឡើងរបស់លោកត្រាំ គឺស្របជាមួយនឹងសម្តីរដ្ឋមន្ត្រីការបរទេសអាមេរិក Marco Rubio ដែលថ្លែងចេញពីទីក្រុងប៉ារីសនៃប្រទេសបារាំងថា ប៉ុន្មានថ្ងៃទៀត ទីក្រុងវ៉ាស៊ីនតោនប្រហែលជាដកខ្លួន ឈប់ធ្វើជាអ្នកសម្របសម្រួលនាំសន្តិភាពមកឲ្យរុស្ស៊ីនិងអ៊ុយក្រែនទៀត ប្រសិនបើមើលទៅ រឿងនេះមិនអាចទៅរួច។

លោក Rubio និយាយថា «សហរដ្ឋអាមេរិកនឹងដើរចេញពីកិច្ចខិតខំប្រឹងប្រែងដើម្បីនាំសន្តិភាពជូនរុស្ស៊ីនិងអ៊ុយក្រែនក្នុងរយៈពេលប៉ុន្មានថ្ងៃខាងមុខនេះ លុះត្រាតែមានសញ្ញាច្បាស់ថា ការខិតខំរបស់ខ្លួនពិតជាបានផលយ៉ាងគាប់ប្រសើរមែន។ ឥឡូវយើងត្រូវស្វែងយល់នៅទីនេះ ថាតើកិច្ចព្រមព្រៀងសន្តិភាពអាចសម្រេចបានក្នុងរយៈពេលដ៏ខ្លីឬក៏អត់ ពីព្រោះប្រសិនបើវាមិនអាចទេ ខ្ញុំគិតថា យើងមិនបន្តទៅមុខទៀតឡើយ»។

ពាក់ព័ន្ធដំណោះស្រាយជម្លោះនេះ ទីក្រុងមូស្គូ បានប្រកាសហើយថា ខ្លួនបើកចិត្តជានិច្ចចំពោះកិច្ចចរចាសន្តិភាព ប្រសិនបើមានការបំពេញតាមលក្ខខណ្ឌដែលខ្លួនបានដាក់។

គេដឹងយ៉ាងច្បាស់ថា រុស្ស៊ីគឺប្រឆាំងយ៉ាងដាច់អហង្ការចំពោះរាល់វត្តមានណាតូនៅលើទឹកដីអ៊ុយក្រែន ហើយទាមទារឲ្យទីក្រុងកៀវ ទទួលស្គាល់ព្រំដែនថ្មីរបស់រុស្ស៊ី និងបោះបង់គំនិតចូលរួមជាមួយណាតូ ឬទទួលបានអាវុធនុយក្លេអ៊ែរទៀតទៅ៕

អត្ថបទ៖ សុខ សុវណ្ណ

ចុចអាន៖ អាមេរិក គំរាមឈប់ធ្វើជាអ្នកសម្របសម្រួល បញ្ចប់សង្គ្រាមរុស្ស៊ី-អ៊ុយក្រែន នៅប៉ុន្មានថ្ងៃខាងមុខ