ឯកអគ្គរដ្ឋទូតអឺរ៉ុប៖ សហភាពអឺរ៉ុបនឹងបន្តជាដៃគូដែលអាចទុកចិត្តបានរបស់កម្ពុជា

លោក Lgor DRIESMANS ឯកអគ្គរដ្ឋទូតវិសាមញ្ញ និងពេញសមត្ថភាពនៃសហភាពអឺរ៉ុបប្រចាំព្រះរាជាណាចក្រកម្ពុជា បានអះអាងថា សហភាពអឺរ៉ុបនឹងបន្តជាដៃគូដែលអាចទុកចិត្តបាន និងធ្វើការរួមគ្នាដើម្បីភាពរុងរឿងនិងសន្តិសុខរបស់ប្រជាជនទាំងពីរ។

ការលើកឡើងរបស់ទូតអឺរ៉ុបនេះ បានធ្វើឡើងក្នុងឱកាសទិវាអឺរ៉ុបឆ្នាំ២០២៥ នៅស្ថានប្រតិភូសហភាពអឺរ៉ុបដោយមានការចូលរួមពីលោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា។ ទិវាអឺរ៉ុប ត្រូវបានប្រារព្ធឡើងជារៀងរាល់ឆ្នាំនៅថ្ងៃទី៩ ខែឧសភា ដើម្បីអបអរសារទរសន្តិភាព សុវត្ថិភាព និងការរួបរួមគ្នានៅអឺរ៉ុប ហើយការប្រារព្ធខួបទិវា​អឺរ៉ុប​ឆ្នាំ ២០២៥នេះ ក៏ជាឱកាស​ដ៏​សំខាន់​ក្នុងការពង្រឹង​កិច្ច​សហប្រតិបត្តិការ​រវាង​សហភាព​អឺរ៉ុប និង​ព្រះរាជាណាចក្រ​កម្ពុជាលើគ្រប់វិស័យផងដែរ។

ក្នុងឱកាសនេះ លោក Lgor DRIESMANS បានលើកឡើងពីកិច្ចសហប្រតិបត្តិការដែលកំពុងបន្ត រួមទាំងកម្មវិធីថ្មីៗដែលផ្តោតលើវិស័យសំខាន់ៗជាច្រើនដូចជាវិស័យអប់រំផងដែរ។ បន្ថែមលើនេះ លោក បានគូសបញ្ជាក់ពីទំនាក់ទំនងយូរអង្វែង និងផ្តល់ផលប្រយោជន៍ទៅវិញទៅមករវាងសហភាពអឺរ៉ុប និងកម្ពុជា តាមរយៈកម្មវិធីថ្មីៗ ការផ្តល់នូវការអនុគ្រោះពន្ធ និងការទាក់ទាញវិនិយោគពីអឺរ៉ុបព្រមទាំងកិច្ចសហប្រតិបត្តិការលើឆាកអន្តរជាតិ ដើម្បីការពារប្រព័ន្ធពាណិជ្ជកម្មអន្តរជាតិ និងអធិបតេយ្យភាពនៃគ្រប់ប្រទេសទាំងអស់ ព្រមទាំងបានបញ្ជាក់ថា សហភាពអឺរ៉ុបនឹងបន្តជាដៃគូដែលអាចទុកចិត្តបាន និងធ្វើការរួមគ្នាដើម្បីភាពរុងរឿង និងសន្តិសុខរបស់ប្រជាជនទាំងពីរ។

ជាមួយគ្នានេះ លោកបណ្ឌិតសភាចារ្យ ឧបនាយករដ្ឋមន្ត្រី ហង់ជួន ណារ៉ុន បានចាត់ទុកទិវានេះ បង្ហាញពីសារៈសំខាន់នៃការសហការ ភាពរួបរួម និងសន្តិភាព ដែលជាកត្តាជំរុញដ៏សំខាន់ក្នុងការកសាងអឺរ៉ុបក្រោយសង្គ្រាម។ ជាមួយនេះដែរ លោកបណ្ឌិតសភាចារ្យ បានគូសបញ្ជាក់ពីចំណងមិត្តភាពដ៏យូរអង្វែង និងពង្រឹងឥតឈប់ឈររវាងកម្ពុជា និងសហភាពអឺរ៉ុប ដោយកត់សម្គាល់ពីការប្តេជ្ញាចិត្តរបស់សហភាពអឺរ៉ុបក្នុងការគាំទ្រដល់ការអភិវឌ្ឍរបស់កម្ពុជា និងការបង្ហាញពីការរួបរួមគ្នាក្នុងគ្រាលំបាក ដែលជាសក្ខីភាពនៃភាពជាដៃគូដ៏រឹងមាំដែលផ្អែកលើការគោរពគ្នាទៅវិញទៅមក។

លោកឧបនាយករដ្ឋមន្ត្រី ក៏លើកឡើងពីតួនាទីដ៏សំខាន់របស់សហភាពអឺរ៉ុបក្នុងការជួយលើកកម្ពស់វិស័យអប់រំក្នុងប្រទេសកម្ពុជា តាមរយៈគំនិតផ្តួចផ្តើមនានាដូចជាកម្មវិធី Erasmus Plus និងGlobal Gateway របស់សហភាពអឺរ៉ុប ដែលរួមចំណែកដល់ការផ្លាស់ប្តូរចំណេះដឹង ការអភិវឌ្ឍជំនាញ និងការបណ្តុះបណ្តាលបច្ចេកទេស ជាពិសេសការគាំទ្រដល់ "Transforming Technical Education EU-Cambodia Partnership 2024-2027" ដើម្បីលើកកម្ពស់សមភាពយេនឌ័រក្នុងការអប់រំ និងការអប់រំ STEM។

រដ្ឋមន្ត្រីអប់រំ បានថ្លែងអំណរគុណយ៉ាងជ្រាលជ្រៅដល់សហភាពអឺរ៉ុប ដែលបានជួយគាំទ្រមកកាន់ប្រទេសកម្ពុជាលើគ្រប់វិស័យនាពេលកន្លង ជាពិសេសលើវិស័យអប់រំផ្ទាល់ និងបានសង្ឃឹមជឿជាក់ថា ទំនាក់ទំនងដ៏ល្អប្រសើរ និងកិច្ចសហប្រតិបត្តិការរវាងកម្ពុជា និងសហភាពអឺរ៉ុប នឹងបន្តពង្រឹង និងពង្រីកបន្ថែមទៀត ដើម្បីផលប្រយោជន៍រួមនៃប្រជាជាតិទាំងពីរ ជាពិសេសក្នុងការជំរុញការអភិវឌ្ឍប្រកបដោយចីរភាព និងវិបុលភាពសម្រាប់កម្ពុជានាពេលអនាគត៕

អត្ថបទ៖សំអឿន