កម្ពុជានឹងធ្វើជាម្ចាស់ផ្ទះកិច្ចប្រជុំគណៈកម្មាធិការចម្រុះកម្ពុជា-សហភាពអឺរ៉ុប ក្នុងខែមីនានេះ​

កម្ពុជានឹងធ្វើជាម្ចាស់ផ្ទះក្នុងការរៀបចំនូវកិច្ចប្រជុំគណៈកម្មាធិការចម្រុះកម្ពុជា-សហភាពអឺរ៉ុប លើកទី១៣ នៅចុងខែមីនា ឆ្នាំ២០២៦។ កិច្ចប្រជុំប្រចាំឆ្នាំនេះ ធ្វើឡើងសំដៅពង្រឹងពង្រីកបន្ថែមទៀតនូវទំនាក់ទំនង និងកិច្ចសហប្រតិបត្តិការទ្វេភាគី កម្ពុជា-សហភាពអឺរ៉ុប ដោយផ្អែកលើភាពជាដៃគូល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើមិនមានការប្រែប្រួល កិច្ចប្រជុំគណៈកម្មាធិការចម្រុះកម្ពុជា-សហភាពអឺរ៉ុប លើកទី១៣ នឹងប្រព្រឹត្តទៅចាប់ពីថ្ងៃទី២៤ ដល់ថ្ងៃទី២៦ ខែមីនា ឆ្នាំ២០២៦ខាងមុខ ដែលនឹងរៀបចំឡើងនៅរាជធានីភ្នំពេញ។

លោក កាន់ ផារិទ្ធ រដ្ឋលេខាធិការក្រសួងការបរទេសកម្ពុជា កាលពីរសៀលថ្ងៃទី៣ ខែមីនា ឆ្នាំ២០២៦ បានជួបពិភាក្សាការងារជាមួយលោក Igor Driesmans ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា ដោយបានប្រាប់ភាគីសហភាពអឺរ៉ុបអំពីដំណើរការនៃការត្រៀមរៀបចំកិច្ចប្រជុំខាងលើ នៅរាជធានីភ្នំពេញ។

ក្នុងជំនួបនោះ ភាគីទាំងពីរ ក៏បានផ្លាស់ប្ដូរទស្សនៈផងដែរលើការពង្រឹងកិច្ចសហប្រតិបត្តិការទ្វេភាគីរវាងកម្ពុជា-សហភាពអឺរ៉ុបឱ្យកាន់តែស៊ីជម្រៅ។

សូមជម្រាបថា កិច្ចប្រជុំគណៈកម្មាធិការចម្រុះកម្ពុជា–សហភាពអឺរ៉ុប គឺជាកិច្ចប្រជុំផ្លូវការដ៏មានសារៈសំខាន់មួយរវាងរាជរដ្ឋាភិបាលកម្ពុជា និងសហភាពអឺរ៉ុប (EU) ដែលធ្វើឡើងជាប្រចាំ ដើម្បីពិនិត្យ និងពង្រឹងកិច្ចសហប្រតិបត្តិការរវាងភាគីទាំងពីរ។ កិច្ចប្រជុំនេះមានគោលបំណង ដើម្បីពិភាក្សា និងវាយតម្លៃចំពោះកិច្ចសហប្រតិបត្តិការទ្វេភាគីរវាងកម្ពុជា និងសហភាពអឺរ៉ុប ការកំណត់អាទិភាពសម្រាប់គម្រោងអភិវឌ្ឍន៍ និងជំនួយ ពង្រឹងទំនាក់ទំនងនយោបាយ សេដ្ឋកិច្ច និងពាណិជ្ជកម្ម ក៏ដូចជាការពិភាក្សាទៅលើបញ្ហាអន្តរជាតិ និងតំបន់ដែលមានការចាប់អារម្មណ៍រួម៕