សហភាពអឺរ៉ុប សរសើរជំហរកម្ពុជាចំពោះសង្គ្រាមនៅអ៊ុយក្រែន និងថា«បើសង្គ្រាមកើតឡើងហើយ  យើងមិនដឹងថា វានឹងបញ្ចប់នៅពេលណាទេ»

ប្រធានក្រុមប្រឹក្សាអឺរ៉ុប António Costa កោតសរសើរជំហររបស់កម្ពុជាចំពោះសង្គ្រាមរវាងអ៊ុយក្រែន និងរុស្ស៊ី និងសង្កត់ធ្ងន់ថា «បើសង្គ្រាមកើតឡើងហើយ យើងមិនដឹងថា វានឹងបញ្ចប់នៅពេលណាទេ»។ ប្រធានក្រុមប្រឹក្សាអឺរ៉ុប កោតសរសើរកម្ពុជា ដូច្នេះ នៅក្នុងជំនួបជាមួយសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នាថ្ងៃទី៩ ខែមិថុនា ឆ្នាំ២០២៥ នៅក្រៅសន្និសីទលើកទី៣ របស់អង្គការសហប្រជាជាតិ ស្ដីពីមហាសមុទ្រ (UNOC3) រៀបចំឡើងនៅទីក្រុងនីស ប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការឆ្លើយតប សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា  បានគូសបញ្ជាក់ថា ស្របពេលដែលពិភពលោកកំពុងជួបប្រទះនឹងភាពមិនប្រាកដប្រជា កម្ពុជានៅតែរក្សាជំហរប្រកាន់ខ្ជាប់ពហុភាគីនិយម។ សម្ដេច ហ៊ុន ម៉ាណែត អះអាងថា កម្ពុជាធ្លាប់រងគ្រោះសង្គ្រាមស៊ីវិលជាច្រើនទសវត្សរ៍ និងយល់ច្បាស់អំពីផលវិបាកនៃសង្គ្រាម ជាពិសេសគ្រាប់មីន និងយុទ្ធភណ្ឌមិនទាន់ផ្ទុះ។

គួរឱ្យដឹងថា សង្គ្រាមអ៊ុយក្រែន-រុស្ស៊ី បានផ្ទុះឡើងនៅថ្ងៃទី២៤ ខែកុម្ភៈ ឆ្នាំ២០២២ ដែលគិតមកដល់បច្ចុប្បន្នគឺមានរយៈពេលជាង៣ឆ្នាំមកហើយ ដែលកងទ័ពរុស្ស៊ី ក្រោមបញ្ជារបស់ប្រធានាធិ​បតរុស្ស៊ី បានឈ្លានពានវាយប្រហារទៅលើប្រទេសអ៊៊ុយក្រែនដែលមានប្រជាជនតិចជាង៣ដង បើធៀបនឹងប្រជាជនរុស្ស៊ីសរុប។

បន្ទាប់ពីសង្គ្រាមផ្ទុះឡើង នៅយប់ថ្ងៃទី២ ខែមីនា ឆ្នាំ២០២២ រដ្ឋាភិបាលកម្ពុជាក្រោមការដឹកនាំរបស់សម្ដេច​តេជោ ហ៊ុន សែន  បាន​បោះឆ្នោត​គាំទ្រ​សេចក្តី​សម្រេច​របស់​មហាសន្និបាត​អង្គការ​សហប្រជាជាតិ​ដែល​ទាមទារ​ឱ្យ​រុស្ស៊ី​បញ្ចប់​ប្រតិបត្តិការ​យោធា​របស់​ខ្លួន​ជាបន្ទាន់​នៅ​ប្រទេស​អ៊ុយក្រែន ហើយ​កម្ពុជា​ក៏បាន​សម្តែង​ការព្រួយបារម្ភ​យ៉ាងខ្លាំង​ចំពោះ​ស្ថានភាព​ធ្ងន់ធ្ងរ​នៃ​សង្គ្រាម​នៅ​ប្រទេស​នេះ​។

បន្ទាប់មក នៅថ្ងៃទី២៣ ខែកុម្ភៈ ឆ្នាំ២០២៣ កម្ពុជា ក៏បានបោះឆ្នោតគាំទ្រសេចក្ដីសម្រេចរបស់មហាសន្និបាតអង្គការសហប្រជាជាតិ (UNGA) ទាមទារឱ្យរុស្ស៊ីដកទ័ពចេញពីអ៊ុយក្រែន។

នៅថ្ងៃទី២៤ ខែកុម្ភៈ ឆ្នាំ២០២៤ កម្ពុជា ក៏បោះឆ្នោតគាំទ្របោះឆ្នោតគាំទ្រលើសេចក្តីសម្រេចរបស់អង្គការសហប្រជាជាតិ ថ្កោលទោសនិងទាមទាររុស្ស៊ីដកទ័ពចេញពីទឹកដីអ៊ុយក្រែនសម្រាប់ការលើកកម្ពស់យុត្តិធម៌ និងសេរីភាពយូរអង្វែងនៅប្រទេសអ៊ុយក្រែន។

នៅក្នុងឆ្នាំ២០២៤ កន្លងទៅ សម្ដេចតេជោ ហ៊ុន សែន  ធ្លាប់បានស្នើទៅកាន់សមេដឹកនាំប្រទេសនៅលើពិភពលោកគាំទ្រនិងលើកទឹកចិត្តរុស្ស៊ី-អ៊ុយក្រែនដែលកំពុងតែអូសបន្លាយការប្រយុទ្ធគ្នាចូលតុចរចាជាជាងរារាំង និងជំរុញឱ្យប្រយុទ្ធគ្នាដោយគ្មានទីបញ្ចប់៕

ដោយ៖ ង៉ិល ណារ៉ាត់