ធនាគារកណ្ដាលថៃព្យាករពីការធ្លាក់ចុះ ៣០% នៃភ្ញៀវទេសចរពីចិន ឆ្នាំនេះ

ធនាគារកណ្ដាលថៃ បានព្យាករពីការធ្លាក់ចុះ ៣០ ភាគរយ នៃភ្ញៀវទេសចរពីប្រទេសចិននៅឆ្នាំ ២០២៥ នេះ មកនៅត្រឹម ៥ លាននាក់ ធៀប​នឹង ៦,៧ លាន​នាក់ កាលពីឆ្នាំមុន និង ១១ លាននាក់ នៅមុនវិបត្តិកូវីដក្នុងឆ្នាំ ២០១៩។ នេះបើតាមការចុះផ្សាយរបស់សារព័ត៌មាន Thailand Business News កាលពីថ្ងៃព្រហស្បតិ៍។

ការធ្លាក់ចុះនេះ ធ្វើ​ឱ្យធនាគារកណ្ដាលទម្លាក់ការព្យាករចំនួនទេសចរបរទេសសរុបនៅឆ្នាំនេះរបស់ខ្លួន មកនៅត្រឹម ៣៧,៥ លាននាក់ ពីការព្យាករចាស់ ៣៩,៥ លាននាក់។

ការព្រួយបារម្ភផ្នែកសេដ្ឋកិច្ច ក៏មានឥទ្ធិពលផងដែរលើការព្យាករ ជាពិសេសលទ្ធភាពនៃពន្ធពាណិជ្ជកម្មរបស់សហរដ្ឋអាមេរិក។ ធនាគារកណ្តាលថៃ កំពុងថ្លឹងថ្លែងលើសេណារីយ៉ូ២ រួមមានពន្ធទាប និងខ្ពស់ ដែលអាចមានឥទ្ធិពលលើវិស័យទេសចរណ៍។

ទោះបីជាបញ្ហាសុវត្ថិភាពនៅក្នុងប្រទេសថៃ អាចជះឥទ្ធិពលខ្លះក៏ដោយ ប៉ុន្តែការធ្លាក់ចុះនៃភ្ញៀវទេសចរចិន ហាក់ដូចជាទាក់ទងនឹងការផ្លាស់ប្តូរចំណូលចិត្តការធ្វើដំណើរ ដោយប្រជាជនចិនជាច្រើនជ្រើសរើសការធ្វើដំណើរក្នុងស្រុកខ្លួន ទៅជប៉ុន ឬប្រទេសផ្សេងទៀតក្រៅពីថៃ។

ថ្វីបើមានការខិតខំប្រឹងប្រែងជំរុញវិស័យទេសចរណ៍ក៏ដោយ ក៏សេដ្ឋកិច្ចរបស់ថៃត្រូវបានគេរំពឹងថានឹងធ្លាក់ចុះ។ ក្រុមស្រាវជ្រាវដូចជា KKP Research និងមជ្ឈមណ្ឌលស្រាវជ្រាវ Kasikorn បាននិយាយថា វិស័យទេសចរណ៍ ការផលិត និងការនាំចេញ នឹងកាន់តែខ្សោយជាងមុនលើការជំរុញកំណើនសេដ្ឋកិច្ច។

ដើម្បីប៉ះប៉ូវនឹងកម្សោយនៃផលិតកម្ម​ ប្រទេសថៃអាចត្រូវការទាក់ទាញភ្ញៀវទេសចររហូតដល់ ៧០ លាននាក់/ឆ្នាំ នៅឆ្នាំ ២០៣០។ យ៉ាងណាមិញ ទោះបីជាចំនួនអ្នកទេសចរកើនឡើងក៏ដោយ ការចំណាយសម្រាប់ភ្ញៀវម្នាក់ ក៏បាន​ធ្លាក់ចុះដែរ ​ដែលនេះនៅតែអាច​ជាបញ្ហា​សម្រាប់ចំណូលពីវិស័យទេសចរណ៍៕