ត្រាំ ព្រមានថា បើ ពូទីន ចង់លេបយកប្រទេសអ៊ុយក្រែនទាំងមូល រុស្ស៊ីនឹងដួលរលំ 

តាមរយៈសារបង្ហោះលើបណ្តាញសង្គម Truth Social កាលពីថ្ងៃអាទិត្យដែលព្រមានចំៗទៅប្រមុខរដ្ឋាភិបាលទីក្រុងមូស្គូ វ្ល៉ាឌីមៀរ ពូទីន, ប្រធានាធិបតីអាមេរិក ដូណាល់ ត្រាំ បានបញ្ជាក់យ៉ាងច្បាស់ថា ប្រសិនបើលោកពូទីន ចង់លេបយកប្រទេសអ៊ុយក្រែនទាំងមូលមែននោះ រុស្ស៊ីនឹងដួលរលំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកត្រាំ បានបង្ហោះសារយ៉ាងវែងបន្លាយបន្ទាប់ពីពូទីន បើកការវាយប្រហារទ្រង់ទ្រាយធំលើតំបន់នានាទូទាំងប្រទេសអ៊ុយក្រែន ដោយមិនញញើតដៃសោះឡើយ។ ក្នុងសារនោះលោកត្រាំ សរសេរថា «ខ្ញុំតែងនិយាយថា គាត់ចង់បានអ៊ុយក្រែនទាំងមូល មិនមែនមួយផ្នែកទេ ហើយឥឡូវនេះ រឿងប្រហែលដូចខ្ញុំនិយាយមែនហើយ ប៉ុន្តែបើគាត់ចង់បានប្រទេសអ៊ុយក្រែនទាំងមូលមែននោះ រុស្ស៊ីនឹងដួលរលំជាក់ជាមិនខានឡើយ»។

សារនេះត្រូវគេមើលឃើញថា ជាប្រតិកម្មខ្លាំងៗចំពោះលោកពូទីន ដែលនៅតែមិនព្រមបន្ថយដៃវាយប្រហារអ៊ុយក្រែន។ ជាក់ស្តែងកាលពីថ្ងៃអាទិត្យ កងកម្លាំងរុស្ស៊ី បានបាញ់ដ្រូននិងមីស៊ីល ៣៦៧គ្រឿង/គ្រាប់ វាយសន្ធាប់លើប្រទេសអ៊ុយក្រែន សម្លាប់មនុស្ស១២នាក់ ក្នុងនោះមានទាំងកុមារ៣នាក់ផងដែរ ព្រមទាំងបណ្តាលឲ្យរាប់សិបនាក់ទៀតរងរបួស ក្នុងប្រតិបត្តិការលុកលុយទ្រង់ទ្រាយធំបំផុត ចាប់តាំងពីការវាយលុកឆ្នាំ២០២២មក។ 

តំបន់ចំនួន១៣ ត្រូវរងការវាយប្រហារដូចជាទីក្រុង Kyiv និងតំបន់ធំមួយទៀតនៅជាប់នោះ ក៏ដូចជាតំបន់ Zhytomyr, Khmelnytskyi, Ternopil, Dnipropetrovsk, Mykolaiv, Odesa, Kharkiv, Chernihiv, Cherkasy, Sumy និង Poltava ផងដែរ។

ក្នុងបណ្តាញសង្គម Truth Social នោះ លោកត្រាំ ក៏ស្តីបន្ទោសខ្លាំងៗទៅប្រធានាធិបតីរុស្ស៊ីផងដែរ ដោយនិយាយថា «មេដឹកនាំវិមានក្រឹមឡាំង វ្ល៉ាឌីមៀរ ពូទីន ឆ្កួតមែនទែនហើយ!»។

លោកបង្ហោះថា «ខ្ញុំមានទំនាក់ទំនងល្អជាមួយលោកពូទីននៃប្រទេសរុស្ស៊ីជានិច្ច ប៉ុន្តែមានអ្វីកើតឡើងចំពោះគាត់។ គាត់កំពុងសម្លាប់ជនមិនដឹងអីជាច្រើននាក់ មិនមែនត្រឹមតែទាហាននោះទេ។ មីស៊ីលនិងត្រូវដ្រូនបានបាញ់ស្រោចលើទីក្រុងនានាក្នុងប្រទេសអ៊ុយក្រែន ទាំងដែលគ្មានហេតុផលអ្វីសោះ»៕

អត្ថបទ៖ សុខ សុវណ្ណ

ចុចអាន៖ ត្រាំ៖ «ពូទីន ឆ្កួតមែនទែនហើយ!»