កម្ពុជាពង្រីកបានទីផ្សារនាំចេញដំឡូងមីទៅចិន អំឡុងពេលអនុវត្តគោលនយោបាយជាតិ

កម្ពុជា សម្រេចបានទីផ្សារនាំចេញដំឡូងមីទៅប្រទេសចិន អំឡុងពេលអនុវត្តគោលន​យោបា​យ​ជាតិ​ស្ដីពីដំឡូងមី ២០២០-២០២៥ ជាពិសេស បានលើកកម្ពស់ផលិតភាព និងការប្រែក្លាយកម្ពុជាពីប្រទេសផលិតសម្រាប់លក្ខណៈគ្រួសារ ទៅជាប្រទេសនាំចេញ។

លោក អិល ឈិញ ប្រធានសមា​គមកសិករដំឡូងមីខ្មែរ មានប្រសាសន៍ថា គោលនយោបាយ​ជាតិស្ដីពី​ដំឡូងមី ដែលរដ្ឋាភិបាលបានដាក់ចេញកាលពីខែសីហា ឆ្នាំ ២០២០ មានគោល​ដៅ​កាត់បន្ថយភាពក្រីក្រ ខណៈដំឡូងមីងាយនឹងដាំ មិនត្រូវការទឹកច្រើន ដែលគោលនយោបាយនេះ សមស្រប ប្រសិនបើមានក្រសួង ឬមន្ទីរពាក់ព័ន្ធចូលរួមគាំទ្រ។

លោកបានបញ្ជាក់ថា៖ «ការនាំចេញយើងបានរីកចម្រើន មានទំនាក់ទំនងទៅ​ចិនអាច​នាំផ្ទាល់​ទៅចិនមួយចំនួនត្បិតវាតិចតែយើងទើបចាប់ផ្ដើម។ ភាគច្រើនយើងនាំ​ចេញទៅ​វៀតណាម និងថៃ ឥឡូវនេះ យើងអាចនាំចេញទៅចិន បានមួយចំនួន អញ្ចឹងបានន័យថា យើងកើនការពង្រីកទីផ្សាររបស់យើង អំឡុងពេលដែលអនុវត្តគោលនយោបាយហ្នឹង យើងអាចនាំចេញទៅចិនត្រង់បាន»។

បើតាមលោក អិល ឈិញ ចាប់តាំងពីរដ្ឋាភិបាលបានដាក់ចេញគោលនយោបាយដំឡូងមី (២០២០-២០២៥) ក្រសួង និងមន្ទីរបានសហការក្នុងការបណ្ដុះបណ្ដាលបច្ចេកទេស ស្របទៅនឹងគោលនយោបាយ ជា​ពិសេសយើងបានបង្កើតសមាគម និងសហគមន៍ជួយ​គាំទ្រកសិករក្នុងតំបន់ ត្បិតក្រសួង ឬមន្ទីរអាចទៅមិនដល់ ប៉ុន្តែមានសមាគម សហគមន៍គាត់ជួយ។

លោកបានបន្ថែមថា អំឡុងពេលដែលអនុវត្តគោលនយោបាយដំបូង គឺកសិករ បានយល់ដឹងច្រើន ជាពិសេសគឺពូជដំឡូងមី អំពីបច្ចេកទេស នៃការដាំដុះ ហើយប្រភេទដី គាត់​ចេះមើល ហើយអ្វីដែលសំខាន់ គឺគាត់ស្គាល់​អំពី​ពូជឱ្យសមស្របទៅនឹងដី ដែលស្រប​ទៅនឹងគោលនយោបាយ។

លោក អិល ឈិញ លើកឡើងថា៖«ជាពិសេសគឺឱ្យកសិករយល់ដឹង អំពីការប្រើប្រាស់ជី ឱ្យស្របទៅនឹងដំណាក់កាល​នៃការ​លូតលាស់របស់ដំឡូង ហើយរឿងសំខាន់គឺថ្នាំស្មៅដែលគាត់ប្រើប្រាស់ កាលពីមុន​គាត់ប្រើថ្នាំមិនល្អ វាអាចប៉ះពាល់ដល់មើម និងដើមដំឡូង កាលណាដែលយើង​ប្រើសារ​ធាតុ​ថ្នាំ​ដែលអត់ត្រូវ វាធ្វើឱ្យដំឡូងវាក្រិនលឿងស្លឹក»។

ប្រធានសមាគមដដែលបញ្ជាក់ថា ៖«នៅពេលដែលយើងណែនាំមួយរយៈកន្លងមក គាត់​បាន​យល់​ដឹងអំពីថ្នាំ អញ្ចឹងការប្រើប្រាស់​របស់គាត់ប្រយ័ត្នប្រយែង ខណៈថ្នាំដែលយើងណែនាំ​បាន​សុះ​សាយ​ទូទាំងប្រទេសហើយ។ ដើមឡើយ ថ្នាំដែលយើងណែនាំឱ្យគាត់ប្រើមានតិចតួច ហើយ​តម្លៃខ្ពស់ រហូតមកដល់ពេលនេះ សារធាតុថ្នាំដែលយើងត្រូវការប្រើប្រាស់ កុំឱ្យប៉ះពាល់​ដល់​ដំឡូង​ មានការរីកចម្រើន ហើយតម្លៃក៏ទាបជាងមុន»។

រដ្ឋាភិបាលកម្ពុជា កំពុងរៀបចំស្តង់ដាដំឡូងមីក្រៀម និងដំឡូងមីស្រស់ ដើម្បី​បង្កភាពងាយស្រួល​ដល់កិច្ចសម្រួលពាណិជ្ជកម្មទិញ-លក់ដំឡូងមី ការ​កំណត់​តម្លៃ​ ដោយផ្អែក​តាមស្តង់ដា ដែលបានដាក់ចេញតាម​ប្រភេទដំឡូងមីស្រស់ ឬក្រៀម និងទៅតាមកម្រិតជាតិម្សៅ។ គិតត្រឹមឆ្នាំ ២០២៥ កម្ពុជាមានផ្ទៃដីដាំដុះដំឡូងមីប្រមាណ ៧០ ម៉ឺន ហិកតា៕

អត្ថបទ៖ ឡេង ដេត