សុខ រក្សា រំលឹកស្នាដៃនិពន្ធបទភ្លេង សម្រាប់កំពូលតារាចម្រៀងល្បីៗ

ទស្សនិកជននិងអ្នកគាំទ្រមួយចំនួន ទំនងមិនទាន់ដឹងទេថា តារាប្រុសលោក សុខ រក្សា មិនត្រឹមតែមានសមត្ថភាពច្រៀងបានពិរោះនោះទេ គឺលោកក៏មានស្នាដៃនិពន្ធបទចម្រៀងបទភ្លេងបានយ៉ាងស្ទាត់ជំនាញទៀតផង ខណ:មានតារាល្បីៗខ្លះទទួលបានស្នាដៃនិពន្ធរបស់លោកយកទៅច្រៀងផងដែរ។

ជាក់ស្តែងថ្មីៗនេះ លោក សុខ រក្សា បានបង្ហោះរំលឹកស្នាដៃរបស់ខ្លួនតាមរយ:ការនិពន្ធបទភ្លេងច្រៀងដោយតារាចម្រៀងល្បីៗ ដែលមានដូចជា លោក ព្រាប សុវត្ថិ, លោក ខេមរ: សិរីមន្ត, កញ្ញា សុខ ពិសី និងតារាចម្រៀងសម្លេងស្រទន់អ្នកនាង សុគន្ធ និសា ជាដើម។

លោក សុខ រក្សា បានសរសេរភ្ជាប់ខ្លឹមសារអមនឹងចំណងជើងបទចម្រៀងថា “នេះជាស្នាដៃនិពន្ធបទភ្លេងរបស់ខ្ញុំខ្លះៗកន្លងមកដែលខ្ញុំបាននិពន្ធជូនបងប្អូនតារាចម្រៀងរួមអាជីពនៅមានច្រើនទៀត”។ ចំណែកអ្នកនាង កុល ដាវី ដែលជាភរិយាក៏បានលើកសរសើរស្វាមីរបស់ខ្លួន និងប្រាប់ឱ្យបន្សល់ទុកស្នាដៃបន្ថែមទៀត។

គួរម្លឹកថា តារាចម្រៀងលោក សុខ រក្សា និងតារាសម្ដែងសិចស៊ី កុល ដាវី បានរៀបមង្គលការជាមួយគ្នាកាលពីថ្ងៃទី០៨ ខែមីនា ឆ្នាំ២០១៩ កន្លងទៅ។ ចាប់តាំងពីរៀបមង្គលការរួចមក មហាជនបានសង្កេតឃើញថា អ្នកទាំងពីរបានឃ្លាតឆ្ងាយពីការងារសិល្បៈស្ទើរតែទាំងស្រុងដោយបានងាកទៅពង្រឹងលើការងារជំនួញរកស៊ី និងការបើកវង់តន្រ្តីផ្ទាល់ខ្លួន៕ អត្ថបទ៖ ចាន់រ៉ា