ត្រាំ ព្រមានថា បើអ៊ីរ៉ង់មិនព្រមចុះកិច្ចព្រមព្រៀងនុយក្លេអ៊ែរ ប្រទេសនេះនឹងខ្ទេចហ្មត់

ជាប្រតិកម្មលើកដំបូងចាប់តាំងពីអ៊ីស្រាអែលនិងអ៊ីរ៉ង់ បាញ់គ្នាយ៉ាងកក្រើក ប្រធានាធិបតីអាមេរិក ដូណាល់ ត្រាំ បានព្រមានថា អ៊ីរ៉ង់ ត្រូវតែចុះកិច្ចព្រមព្រៀងនុយក្លេអ៊ែរ បើមិនដូច្នោះទេប្រទេសនេះត្រូវខ្ទេចហ្មត់។ លោកថែមទាំងបញ្ជាក់ដែរថា លោកធ្លាប់ទុកឱកាសឲ្យទីក្រុងតេហេរ៉ង់ដែរ ប៉ុន្តែពួកគេមិនព្រមចាប់យកសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកត្រាំព្រមានបែបនេះនៅក្នុងសារដែលបង្ហោះលើបណ្តាញសង្គម Truth Social កាលពីថ្ងៃសុក្រទី១៣ខែមិថុនាឆ្នាំ២០២៥ ក្រោយពេលអ៊ីស្រាអែល បើកប្រតិបត្តិការ «Rising Lion» វាយប្រហារអ៊ីរ៉ង់ ឈានដល់ការសម្លាប់មេទ័ពនិងមន្ត្រីកំពូលៗជាច្រើនរូប រីឯអ៊ីរ៉ង់ឯណោះក៏បើកការសងសឹកវិញក្តៅៗផងដែរ។

លោកត្រាំសរសេរថា ការវាយប្រហារលើកក្រោយរបស់អ៊ីស្រាអែលនឹងខ្លាំងជាងនេះទៀត។ នៅក្នុងដៃអ៊ីស្រាអែល កំពុងមានអាវុធល្អនិងគ្រោះថ្នាក់បំផុតលើលោកដែលផលិតដោយអាមេរិក។ អ៊ីរ៉ង់នឹងប្រឈមជាមួយរឿងដែលអាក្រក់បំផុតពុំធ្លាប់មាន បើបដិសេធកិច្ចព្រមព្រៀង។

ការព្រមានរបស់លោកត្រាំកើតឡើងមុនពេល បេសកជនពិសេសរបស់សហរដ្ឋអាមេរិក Steve Witkoff គ្រោងជួបជាមួយរដ្ឋមន្ត្រីការបរទេសអ៊ីរ៉ង់ Abbas Araghchi នៅ​ទីក្រុង Muscat ប្រទេសអូម៉ង់ នាថ្ងៃ​អាទិត្យ​ទី១៥​ខែមិថុនា ដើម្បីពិភាក្សារឿងនុយក្លេអ៊ែរ។

យោង​តាម​ការ​ចុះផ្សាយ​របស់​ទីភ្នាក់ងារព័ត៌មាន Reuters ដែល​ដក​ស្រង់​ប្រភពពី​មន្ត្រី​អាមេរិក កិច្ចប្រជុំនេះនឹងផ្តោតលើការឆ្លើយតបនាពេលខាងមុខរបស់អ៊ីរ៉ង់ ចំពោះសំណើរបស់អាមេរិក​សម្រាប់កិច្ចព្រមព្រៀងនុយក្លេអ៊ែរថ្មី។

មុនជំនួប​នេះ ទីក្រុងតេហេរ៉ង់ ធ្លាប់​បាន​លើក​ឡើង​ថា​ សំណើ​របស់​​អាមេរិក​គឺ​«មិនអាចទទួលយកបានទេ» ហើយបាន​ប្រាប់​ថា ខ្លួនគ្រោងនឹងបង្ហាញសំណើតបតក្នុងពេលឆាប់ៗ៕

អត្ថបទ៖ សុខ សុវណ្ណ

ចុចអាន៖ មេដឹកនាំ​​​នានា​​​​ឲ្យ​ភាគី​ជម្លោះ​​អ៊ីស្រាអែល​​​និង​ ​អ៊ីរ៉ង់​​ចរចា​គ្នា​ ខុស​គេ​តែ ​ដូណាល់ ត្រាំ​