ក្រុម​ជម្រើសជាតិ ៦ ប៉ុណ្ណោះ ធ្លាប់ឈ្នះមេដាយក្នុងព្រឹត្តិការណ៍បាល់ទះពិភពលោក Nations League

ព្រឹត្តិការណ៍បាល់ទះពិភពលោកផ្នែកបុរស FIVB Men’s Volleyball Nations League បានបង្កើតឡើងអស់រយៈពេល ៧ ឆ្នាំហើយ ខណៈមានក្រុមជម្រើសជាតិ ៦ ប៉ុណ្ណោះ ធ្លាប់ឈ្នះមេដាយក្នុងព្រឹត្តិការណ៍នេះ។

ព្រឹត្តិការណ៍ FIVB Men’s Volleyball Nations League នេះ បានផ្តួចផ្តើមឡើងនៅឆ្នាំ ២០១៧ ប៉ុន្តែត្រូវបានរៀបចំការប្រកួតជាផ្លូវនៅឆ្នាំ ២០១៨ ដែលពេលនោះ បារាំង ធ្វើជាម្ចាស់ផ្ទះ។

ក្នុងប្រវត្តិសាស្ត្រនៃព្រឹត្តិការណ៍ VNL នេះ ដែលគិតពីឆ្នាំ ២០១៨ ដល់ឆ្នាំ ២០២៥ ក្រុមបាល់ទះជម្រើសជាតិ បារាំង គឺជាក្រុម​ជោគជ័យជាងគេ ដោយ​បាន​ឈ្នះមេដាយសរុបដល់ទៅ ៤ គ្រឿង​គឺ មេដាយមាស ២ គ្រឿង ប្រាក់ ១ គ្រឿង និងសំរឹទ្ធ ១ គ្រឿង។

បន្ទាប់មក រុស្ស៊ី គឺជាក្រុម ជោគជ័យទី ២ ក្នុងនោះពួកគេឈ្នះមេដាយសរុបចំនួន ២ គ្រឿង ពោលគឺមេដាយមាសទាំង ២ គ្រឿង។ ប្រការ​នេះ​មាន​ន័យ​ថា រុស្ស៊ី​ បាន​ឡើង​វគ្គ​ផ្តាច់​ព្រ័ត្រ​២​លើកគឺ​ឈ្នះ​មេដាយ​មាស​ទាំង​ពីរ​លើក ប៉ុន្តែ​ដោយសារ​ប្រទេស​នេះ​មាន​សង្គ្រាម​ជា​មួយ​ អ៊ុយក្រែន ទើប​មិន​បាន​ចូល​រួម​ប្រកួត​នៅ​ឆ្នាំ​បន្ត​បន្ទាប់។ ចំពោះ ប៉ូឡូញ ឈរនៅលេខ ៣ ក្នុងនោះពួកគេធ្លាប់ឈ្នះមេដាយ ៥ គ្រឿង រួមមានមេដាយមាស ១ គ្រឿង ប្រាក់ ១ គ្រឿង និងសំរឹទ្ធ ៣ គ្រឿង។

ប្រេស៊ីល ឈរនៅលេខរៀងទី ៤ ក្នុងនោះពួកគេឈ្នះមេដាយសរុប ១ គ្រឿង គឺជាមេដាយមាស។ ចំណែក សហរដ្ឋអាមេរិក ឈរនៅលេខរៀងទី ៥ ដោយពួកគេធ្លាប់ឈ្នះមេដាយសរុបចំនួន ៤ គ្រឿង ក្នុងនោះមាន ប្រាក់ ៣ និងសំរឹទ្ធ ១។ ចុងក្រោយក្រុមជម្រើសជាតិ ជប៉ុន គឺជាក្រុម អាស៊ី តែមួយគត់ ដែលធ្លាប់ឈ្នះមេដាយក្នុងព្រឹត្តិការណ៍នេះ ក្នុងនោះពួកគេឈ្នះសរុបចំនួន ២ គ្រឿង រួមមានប្រាក់ ១ គ្រឿង និងសំរឹទ្ធ ១ គ្រឿង។

គួរបញ្ជាក់ថា ព្រឹត្តិការណ៍ VNL ផ្នែកបុរសសម្រាប់ឆ្នាំ ២០២៥ បានបញ្ចប់ការប្រកួតសប្តាហ៍ទី ១ នៃជុំដំបូងហើយ ខណៈសប្តាហ៍ទី ២ នឹងធ្វើឡើងពីថ្ងៃទី ២៥ ដល់ថ្ងៃទី ២៩ ខែ មិថុនា ឆ្នាំ ២០២៥៕

អត្ថបទ៖ សេម កុសល