អ៊ីស្រាអែល​មិនបន្ធូរ​ដៃ​​​​នៅ​តំបន់​ហ្គាហ្សា សូម្បី​បន្ថែម​មុខ​ព្រួញសង្គ្រាម​ជាមួយ​​អ៊ីរ៉ង់

យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២០ខែមិថុនានេះ ​នៅពេលដែលការយកចិត្តទុកដាក់ជាសកលផ្លាស់ប្តូរឆ្ពោះទៅរកជម្លោះកាន់តែខ្លាំងឡើងរបស់អ៊ីស្រាអែលជាមួយអ៊ីរ៉ង់ វិបត្តិមនុស្សធម៌នៅហ្គាហ្សាកាន់តែអាក្រក់ទៅៗ។ ក្នុងរយៈពេលមួយសប្តាហ៍កន្លងមកនេះ កងកម្លាំងអ៊ីស្រាអែលបានសម្លាប់ជនជាតិប៉ាឡេស្ទីនជាង ១៧០ នាក់ ដែលភាគច្រើននៃពួកគេបានស្លាប់ពេលកំពុងចាំបើកជំនួយនៅឯកន្លែងចែកចាយជំនួយមនុស្ស​ធម៌​​ហ្គាហ្សា (​​Gaza Humanitarian Foundation (GHF))។

អ្នករស់រានមានជីវិតពីការវាយប្រហារបានរាយការណ៍ថាពួកគេត្រូវបានអ៊ីស្រាអែលកំណត់គោលដៅដោយប្រើយន្តហោះគ្មានមនុស្សបើក រថក្រោះ និងកាំភ្លើងយន្ត។ GHF ដែលជាស្ថាប័នចម្រូងចម្រាសរបស់អ៊ីស្រាអែល និងគាំទ្រដោយសហរដ្ឋអាមេរិក បង្កើតឡើងដើម្បីជំនួសប្រតិបត្តិការជំនួយរបស់អង្គការសហប្រជាជាតិ បានទទួលរងការរិះគន់ចំពោះវិធីសាស្រ្តយោធារបស់អ៊ីស្រាអែលដែលសម្លាប់អ្នកទៅយកជំនួយ ប៉ុន្តែទោះបីជាមានការកើនឡើងចំនួនអ្នកស្លាប់ក៏ដោយ ក៏ប្រជាជនប៉ាឡេស្ទីននៅតែបន្តប្រថុយជីវិតរបស់ពួកគេទៅបើកជំនួយ ដោយសារតែការខ្វះខាតជាចាំបាច់។

ក្នុងពេលជាមួយគ្នានេះ អ៊ីស្រាអែលបានបិទខ្ទប់តំបន់ វេសបែង(West Bank) ជាច្រើន ដោយបិទផ្លូវ និងធ្វើឱ្យមនុស្សពិបាកផ្លាស់ទីរវាងទីក្រុង បណ្តាលឱ្យមានការខ្វះខាតប្រេងឥន្ធនៈ និងការភ័យខ្លាចថាអ្វីៗនឹងកាន់តែអាក្រក់ទៅៗ។ កងកម្លាំង​អ៊ីស្រាអែល​ក៏​កំពុង​បន្ត​ប្រតិបត្តិការ​វាយឆ្មក់​ចាប់ខ្លួន​មនុស្ស​ជាច្រើន​នាក់ និង​បំផ្លាញ​ផ្ទះសម្បែងផងដែរ។

អ្នកជំនាញនិយាយថា សង្គ្រាមរបស់អ៊ីស្រាអែលជាមួយអ៊ីរ៉ង់កំពុងត្រូវបានប្រើប្រាស់ជាការរំខាន ដែលអនុញ្ញាតឱ្យវាបង្កើនការវាយប្រហារលើប៉ាឡេស្ទីនដោយមិនមានការចាប់អារម្មណ៍ពីអន្តរជាតិច្រើនឡើយ។ ពួកគេ​ព្រមាន​ថា រឿងនេះ​អាច​នាំ​ឱ្យ​មាន​ដី​កាន់​តែ​ច្រើន​ទៀត​ត្រូវ​បាន​យក​ពី​ប៉ាឡេស្ទីន និង​ព្យាយាម​រុញ​ប្រជាជនប៉ាឡេស្ទីន​ចេញ​ទាំង​ស្រុង៕

អត្ថបទ៖ ប៊ុន សុភាព