PTT៖ ការផ្អាកនាំចូលប្រេងថៃរបស់កម្ពុជា មិនប៉ះពាល់ធ្ងន់ធ្ងរដល់ចំណូលក្រុមហ៊ុនទេ

ក្រុមហ៊ុនថាមពលថៃ OR (PTT Oil and Retail) ដែលជាក្រុមហ៊ុននាំចេញប្រេងឥន្ធនៈមកកាន់កម្ពុជា បាន​អះអាងថា ប្រាក់ចំណូលរបស់ក្រុមហ៊ុននឹង​មិនរងផលប៉ះពាល់ធ្ងន់ធ្ងរនោះទេ ពីចំណាត់ការរបស់កម្ពុជាដែលនឹង​ផ្អាកទាំងស្រុងលើការនាំចូលប្រេងឥន្ធនៈ និងឧស្ម័នឥន្ធនៈគ្រប់ប្រភេទពីប្រទេសថៃ។ នេះបើតាមការចុះផ្សាយរបស់កាសែត Khaosod នាយប់ថ្ងៃអាទិត្យ​នេះ។

មូលហេតុដែលផលប៉ះពាល់មិនធ្ងន់ធ្ងរនោះ គឺថា នៅទូទាំងប្រទេសកម្ពុជា ក្រុមហ៊ុន PTT ដំណើរស្ថានីយប្រេងឥន្ធនៈត្រឹម ១៨៦ កន្លែង និងហាងកាហ្វេ ២៥៤ កន្លែង តែប៉ុណ្ណោះ ធៀប​នឹង​ស្ថានីយប្រមាណ ២ ០០០ កន្លែង នៅទូទាំងប្រទេសថៃ។

មកទល់ពេល​នេះ មិនមានរបាយការណ៍ណាមួយ ដែល​បង្ហាញថា​ PTT កើបចំណូលបាន​ប៉ុន្មានពីការលក់ប្រេងឱ្យ​កម្ពុជាក្នុងមួយឆ្នាំៗនោះទេ ប៉ុន្តែកាសែតថៃ The Nation បាន​រាយការណ៍កាលពីខែ កក្កដា ឆ្នាំមុន ថា PTT បាន​ចាត់ទុកកម្ពុជា «ជាផ្ទះទី ២» របស់ខ្លួន ព្រោះកម្ពុជាគឺជាទីផ្សារអន្តរជាតិដ៏ធំបំផុតរបស់ក្រុមហ៊ុន។

គួរគូសបញ្ជាក់ថា ការអះអាងចុងក្រោយរបស់ PTT ធ្វើឡើងបន្ទាប់ពីសម្ដេចធិបតី ហ៊ុន ម៉ាណែត នាយករដ្ឋមន្រ្តីនៃប្រទេសកម្ពុជា បាន​ប្រកាសនៅល្ងាចថ្ងៃអាទិត្យថា៖ «ចាប់ពីម៉ោង ១២យប់នេះទៅ ការនាំចូលប្រេងឥន្ធនៈ និងឧស្ម័នឥន្ធនៈគ្រប់ប្រភេទពីប្រទេសថៃ ត្រូវផ្អាកទាំងស្រុង»។

សម្ដេចធិបតីបាន​បន្តក្នុងសេចក្ដីប្រកាសដែលបង្ហោះនៅលើបណ្ដាញសង្គម Facebook ថា៖ «បណ្ដាក្រុមហ៊ុន​ចែក​ចាយ​ប្រេងឥន្ធនៈនៅកម្ពុជា មានលទ្ធភាពនាំចូលប្រេងឥន្ធនៈ និងឧស្ម័នឥន្ធនៈពីប្រភពផ្សេង គ្រប់គ្រាន់ ដើម្បីផ្គត់ផ្គង់តម្រូវការប្រើប្រាស់ក្នុងស្រុករបស់ប្រជាពលរដ្ឋយើង កុំថាឡើយត្រឹមមួយខែ ទោះជារៀងរហូតក៏មិនជាបញ្ហា»។

ការបោះជំហានយ៉ាងដូច្នេះរបស់កម្ពុជា ធ្វើឡើងក្នុងបរិបទនៃភាពកាន់តែតានតឹងកម្ពុជា-ថៃជុំវិញបញ្ហាព្រំដែន ក្រោយមានការគំរាមកំហែងពីអ្នកនយោបាយថៃ ដែលស្នើឱ្យរដ្ឋាភិបាលខ្លួន កាត់ផ្ដាច់ការផ្គត់ផ្គង់ប្រេងឱ្យកម្ពុជា។ ឆ្លើយតបនឹងបញ្ហានេះ សម្ដេច ហ៊ុន សែន ប្រធានព្រឹទ្ធសភាកម្ពុជា បាន​បង្ហោះសារនៅលើបណ្ដាញសង្គម យ៉ាងដូច្នេះថា៖ «យើងមិនស្លាប់ដោយសារមិននាំប្រេងពីថៃមកនោះទេ ប៉ុន្តែអ្នកដែលស្លាប់គឺក្រុមហ៊ុន PTT របស់ថៃទៅវិញទេ។ តើអ្នកចង់ឲ្យក្រុមហ៊ុនថៃ PTT ស្លាប់មែនទេ? បើចង់ សូមឲ្យអ្នកធ្វើតាមបំណងចុះ»។

ខណៈដែលភាពតានតឹងកម្ពុជា និងថៃបន្តកើនឡើង គេក៏សង្កេតឃើញមាន​និន្នាការពហិការផលិតផលថៃ រួមទាំងប្រេង PTT ពីសំណាក់ពលរដ្ឋកម្ពុជាផងដែរ ដែលភាគច្រើនត្រូវបានគេបង្ហោះនៅលើបណ្ដាញសង្គម៕