កុមារប៉ាគីស្ថានជិតពាក់កណ្ដាលក្នុងចំណោមមនុស្ស ១៧០នាក់ស្លាប់ដោយសារទឹកជំនន់

ទឹកជំនន់បណ្ដាលមកពីភ្លៀងធ្លាក់ខ្លាំងមិនឈប់ឈរបានសម្លាប់មនុស្សជាង ១៧០ នាក់នៅទូទាំងភាគខាងកើតប្រទេសប៉ាគីស្ថាន ដោយជនរងគ្រោះជិតពាក់កណ្តាលជាកុមារ។ នេះបើយោងតាមការចេញផ្សាយរបស់សារព័ត៌មាន​CNN នៅថ្ងៃទី១៨ខែកក្កដា។

អាជ្ញាធរគ្រប់គ្រងគ្រោះមហន្តរាយជាតិប៉ាគីស្ថាន (NDMA) រាយការណ៍ថា យ៉ាងហោចណាស់កុមារចំនួន ៨៥ នាក់បានស្លាប់ចាប់តាំងពីមានទឹកជំនន់កាលពីថ្ងៃទី ២៦ ខែមិថុនាមក ហើយមនុស្សចំនួន ៥៤ នាក់បានបាត់បង់ជីវិតក្នុងរយៈពេលត្រឹមតែ ២៤ ម៉ោងចុងក្រោយនេះ។

ភ្លៀងធ្លាក់ខ្លាំងបានវាយលុកខេត្តជាច្រើនក្នុងប្រទេសប៉ាគីស្ថានជាពិសេសខេត្ត Punjab រងផលប៉ះពាល់ខ្លាំងជាងគេ ដោយខូចខាតផ្ទះសម្បែង ផ្លូវថ្នល់ និងប៉ះពាល់ដល់ជីវភាពរស់នៅរបស់ប្រជាជន។ ភ្នាក់ងារជំនួយព្រមានថា ជាពិសេសកុមារគឺប្រឈមមុខនឹងការលង់ទឹក និងជំងឺដែលបណ្តាលមកពីទឹកជំនន់ជាងគេ។

ជាការឆ្លើយតបទៅនឹងគ្រោះមហន្តរាយរដ្ឋាភិបាលប៉ាគីស្ថានបានបង្កើតជំរុំសង្គ្រោះទឹកជំនន់ដើម្បីផ្តល់សម្ភារៈចាំបាច់ជាមូលដ្ឋាន ប៉ុន្តែមនុស្សរាប់ពាន់នាក់នៅតែត្រូវការជំនួយចាំបាច់ច្រើន។

មន្ត្រីប៉ាគីស្ថាន និងអ្នកជំនាញអាកាសធាតុបាននិយាយថា ទឹកជំនន់ដ៏សាហាវទាំងនេះមិនមែនជាព្រឹត្តិការណ៍ដាច់ដោយឡែកនោះទេ ប៉ុន្តែជាផ្នែកនៃវិបត្តិអាកាសធាតុដែលកំពុងកើនឡើង ដោយអំពាវនាវឱ្យមានវិធានការបន្ទាន់ក្នុងការរៀបចំផែនការទីក្រុង និងការត្រៀមខ្លួនសម្រាប់គ្រោះមហន្តរាយក្រោយៗ៕

អត្ថបទ៖ ប៊ុន សុភាព