ចិន​និង​វៀតណាម​នឹង​ធ្វើ​សមយុទ្ធ​​រួម​គ្នា​លើក​ដំបូង ​ចំពេល​មាន​ទំនាក់ទំនង​កាន់តែ​ជិតស្និទ្ធ​

យោងតាមការចេញផ្សាយរបស់សារព័ត៌មាន​ South China Morning Post ប្រទេសចិន និងវៀតណាមនឹងធ្វើសមយុទ្ធហ្វឹកហ្វឺនកងទ័ពរួមគ្នាជាលើកដំបូងរបស់ពួកគេក្នុងខែនេះនៅក្នុងតំបន់ Guangxi របស់ប្រទេសចិន ដែលមានព្រំប្រទល់ជាប់ប្រទេសវៀតណាម។

បើតាមក្រសួងការពារជាតិចិន សមយុទ្ធហ្វឹកហ្វឺនកងទ័ពរួមគ្នាជាលើកដំបូងនឹងផ្តោតលើការហ្វឹកហ្វឺនល្បាតតាមព្រំដែនរួមគ្នា និងមានគោលបំណងពង្រឹងកិច្ចសហប្រតិបត្តិការយោធារវាងប្រទេសទាំងពីរ។

ទោះបីជាប្រទេសជិតខាងមានជម្លោះជាបន្តបន្ទាប់នៅក្នុងសមុទ្រចិនខាងត្បូងក៏ដោយ ទំនាក់ទំនងយោធា និងសេដ្ឋកិច្ចរបស់ចិននិងវៀតណាមកាន់តែជិតស្និទ្ធនាពេលថ្មីៗនេះ ជាពិសេសក្នុងការឆ្លើយតបទៅនឹងភាពតានតឹងពាណិជ្ជកម្មក្រោមពន្ធគយថ្មីរបស់សហរដ្ឋអាមេរិក។ ប្រទេសចិនគឺជាដៃគូពាណិជ្ជកម្មដ៏ធំបំផុតរបស់វៀតណាម និងជាអ្នកផ្គត់ផ្គង់ដ៏សំខាន់សម្រាប់វិស័យផលិតកម្មរបស់ខ្លួន។

ឆ្នាំនេះគឺជាខួបលើកទី ៧៥ នៃទំនាក់ទំនងការទូតរវាងចិន និងវៀតណាម ហើយភាគីទាំងពីរបានបង្កើនកិច្ចសហប្រតិបត្តិការលើវិស័យការពារជាតិ។ នៅខែមេសា កងទ័ពចិនក៏បានចូលរួមការប្រារព្ធពិធីរបស់វៀតណាមនៃការបញ្ចប់សង្គ្រាមវៀតណាមជាលើកដំបូង។ ប្រទេស​ទាំង​នោះ​ក៏​បាន​ធ្វើ​ការ​ល្បាត​ជើង​ទឹក​រួម​និង​សមយុទ្ធ​ប្រឆាំង​ភេរវកម្ម​ផង​ដែរ។

ថ្វីបើមានភាពតានតឹងផ្នែកដែនដី ជាពិសេសនៅសមុទ្រចិនខាងត្បូងក៏ដោយ ក៏ទីក្រុងប៉េកាំងបានជៀសវាងការរិះគន់យ៉ាងខ្លាំងក្លាចំពោះទីក្រុងហាណូយ ដែលមិនដូចគោលជំហរកាន់តែឆេវឆាវរបស់ខ្លួនចំពោះហ្វីលីពីន ដែលបង្ហាញពីបំណងចង់រក្សាទំនាក់ទំនងល្អជាមួយវៀតណាម ចំពេលមានការផ្លាស់ប្តូរសម្ព័ន្ធភាពក្នុងតំបន់៕

អត្ថបទ៖ ប៊ុន សុភាព