គណៈកម្មាធិការអចិន្ត្រៃយ៍ព្រឹទ្ធសភា បើកកិច្ចប្រជុំពិនិត្យសម្រេចលើរបៀបវារៈចំនួន៤

គណៈកម្មាធិការអចិន្ត្រៃយ៍ព្រឹទ្ធសភា នាព្រឹកថ្ងៃទី៤ ខែសីហា ឆ្នាំ២០២៥នេះ បានបើកកិច្ចប្រជុំ ក្រោមវត្តមានដឹកនាំរបស់លោក អ៊ុច បូររិទ្ធ អនុប្រធានទី១ព្រឹទ្ធសភា ដើម្បីពិនិត្យសម្រេចលើរបៀបវារៈចំនួន៤។

កិច្ចប្រជុំគណៈកម្មាធិការអចិន្ត្រៃយ៍នេះ បានរៀបចំឡើងគឺដើម្បីពិនិត្យ និងសម្រេចលើសុពលភាពបេក្ខជនឈរឈ្មោះបោះឆ្នោតជ្រើសតាំងជាសមាជិកក្រុមប្រឹក្សាជាតិប្រឆាំងអំពើពុករលួយ ១រូប តំណាងព្រឹទ្ធសភា ទៅក្នុងរបៀបវារៈនៃសម័យប្រជុំព្រឹទ្ធសភាជាវិសាមញ្ញ នីតិកាលទី៥។

របៀបវារៈផ្សេងទៀត គឺគណៈកម្មាធិការអចិន្ត្រៃយ៍ព្រឹទ្ធសភា ពិនិត្យសំណើរបស់សមាជិកព្រឹទ្ធសភា ស្នើសុំកោះប្រជុំព្រឹទ្ធសភាជាវិសាមញ្ញ និងការកំណត់កាលបរិច្ឆេទ និងរបៀបវារៈសម័យប្រជុំព្រឹទ្ធសភាជាវិសាមញ្ញ ព្រមទាំងបញ្ហាផ្សេងៗ។

តាមការគ្រោងទុក កិច្ចប្រជុំគណៈកម្មាធិការអចិន្ត្រៃយ៍ នាព្រឹកថ្ងៃនេះ ត្រូវដឹកនាំដោយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ប៉ុន្តែក្រោយទទួលបានព័ត៌មានថា យោធាថៃគ្រោងចង់បើកការវាយប្រហារមកលើកម្ពុជាជាថ្មីទៀតនោះ សម្ដេចតេជោ ហ៊ុន សែន បានប្រកាសលុបចោលការចូលរួមដឹកនាំកិច្ចប្រជុំនេះ ដោយប្រគល់ភារកិច្ចឱ្យលោក អ៊ុច បូរិទ្ធ អនុប្រធានទី១ព្រឹទ្ធសភា ទទួលដឹកនាំជំនួស។

សាររបស់សម្ដេចតេជោ នាយប់ថ្ងៃទី៣ ខែសីហា បានបញ្ជាក់ថា បើទោះមានការប្រយុទ្ធ ឬគ្មានការប្រយុទ្ធគ្នាក៏ដោយ គឺសម្ដេច មិនអាចដឹកនាំកិច្ចប្រជុំព្រឹទ្ធសភាបានឡើយ ដោយសភាពការណ៍បែបនេះ សម្ដេចតេជោ ត្រូវប្រចាំការរួមបញ្ជាកងទ័ព២៤ម៉ោងលើ២៤ម៉ោងបន្តទៀត៕