យន្តហោះ​សង្គ្រោះ​បន្ទាន់​របស់​ប្រទេស​កេនយ៉ា ធ្លាក់​ស្លាប់​មនុស្ស​៦​នាក់

យោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃទី០៨ខែ សីហា យន្តហោះមួយគ្រឿងដែលជាកម្មសិទ្ធិរបស់ក្រុមហ៊ុនផ្តល់សេវារថយន្តសង្គ្រោះបន្ទាន់បានធ្លាក់នៅក្នុងតំបន់លំនៅដ្ឋានមួយ ក្នុងក្រុង Kiambu ខាងក្រៅរដ្ឋធានី Nairobi ប្រទេសកេនយ៉ាកាលពីថ្ងៃព្រហស្បតិ៍សម្លាប់មនុស្សយ៉ាងហោចណាស់ ៦ នាក់ ។

នៅពេលធ្លាក់ យន្តហោះ Cessna Citation XLS ដែលដំណើរការដោយក្រុមហ៊ុន AMREF Flying Doctors បានហោះចេញពីទីក្រុង Nairobi ហើយកំពុងធ្វើដំណើរទៅកាន់ប្រទេសសូម៉ាលីឡែន។

អាជ្ញាធរ​បាន​បញ្ជាក់​ថា ជន​រង​គ្រោះ​៤​នាក់​ស្ថិត​នៅ​លើ​យន្តហោះ ខណៈ​២​នាក់​ផ្សេង​ទៀត​ស្ថិត​នៅ​ក្នុង​ផ្ទះ​ដែលយន្តហោះធ្លាក់លើ។ ក្រុមជួយសង្គ្រោះមកពីកាកបាទក្រហមកេនយ៉ាបានឆ្លើយតបទៅកាន់កន្លែងកើតហេតុ ខណៈមូលហេតុនៃការធ្លាក់នៅតែស្ថិតក្រោមការស៊ើបអង្កេត ដោយ AMREF បញ្ជាក់ថា ខ្លួនកំពុងសហការយ៉ាងពេញលេញជាមួយអាជ្ញាធរអាកាសចរណ៍ដើម្បីរកមូលហេតុ៕

អត្ថបទ៖ ប៊ុន សុភាព