ផលិតផលស្វាយចន្ទីខេត្តកំពង់ធំ គ្រោងចុះបញ្ជីម៉ាកសម្គាល់ភូមិសាស្ត្រទំនិញ ឆាប់ៗនេះ

រាជរដ្ឋាភិបាលកម្ពុជាកំពុងរៀបចំដាក់ដំណាំស្វាយចន្ទីនៅក្នុងខេត្តកំពង់ធំទៅជាផលិតផលម៉ាក​សម្គាល់​ភូមិ​​សាស្ត្រទំនិញ (GI) ដែលនឹងជួយបង្កើនតម្លៃគ្រាប់ស្វាយចន្ទី និងសក្ដា​នុពល​នាំ​ចេញ។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់ឱ្យដឹងថា ការទទួលបានឋានៈ GI មានអត្ថប្រយោជន៍ច្រើនសម្រាប់​ឧស្សាហកម្មគ្រាប់​ស្វាយចន្ទី​របស់ខេត្តកំពង់ធំ ដែលអាចបង្កើន​តម្លៃទីផ្សារផលិតផល បង្កើនសក្តានុពលនាំចេញ និងរក្សាចំណេះដឹងកសិកម្មតាមបែបប្រពៃណី។ វាក៏រួមចំណែកដល់ការអភិវឌ្ឍន៍ជនបទ ដោយការពារផលិតផលក្នុងស្រុក និងផ្តល់អំណាចដល់​អ្នកផលិតតាមរយៈម៉ាកសមូហភាព។

សមាគមស្វាយចន្ទីកម្ពុជា បាន​បោះជំហានដ៏សំខាន់មួយ​ឆ្ពោះទៅរក​ការទទួល​បានឋានៈ​សម្គាល់​ភូមិសាស្ត្រ (GI) សម្រាប់​គ្រាប់ស្វាយចន្ទីដែលដាំដុះនៅក្នុងខេត្តកំពង់ធំ តាមរយៈ​ការបញ្ជូន​តំណាងពីររូបចូលរួមក្នុង​កិច្ចប្រជុំ​ស្តីពីការកំណត់ភូមិសាស្ត្រកាលពីថ្ងៃទី ១៤ ខែសីហា ឆ្នាំ ២០២៥។

ព្រឹត្តិការណ៍នេះត្រូវបានរៀបចំឡើងដោយគម្រោង PEARL– FAO ដែលមានគោលដៅរួម គឺដើម្បីដាក់គ្រាប់ស្វាយចន្ទីខេត្តកំពង់ធំ ជាផលិតផលសម្គាល់​ភូមិសាស្ត្រដែល​មានការ​ទទួល​ស្គាល់ជាលក្ខណៈជាតិ និងអន្តរជាតិ។

កិច្ចប្រជុំបានប្រមូលផ្តុំអ្នកពាក់ព័ន្ធក្នុងស្រុក មន្ត្រីរដ្ឋាភិបាល និងអ្នកជំនាញបច្ចេកទេស ដើម្បីពិភាក្សាអំពីដំណើរការជាយុទ្ធសាស្ត្រនៃការចុះបញ្ជីគ្រាប់ស្វាយចន្ទីខេត្តកំពង់ធំ ក្រោមស្ថានភាព GI ជាការរចនាដែលទទួលស្គាល់ពីគុណសម្បត្តិ និងកេរ្តិ៍ឈ្មោះ​ពិសេសនៃផលិតផល ដែលភ្ជាប់ទៅនឹងប្រភពភូមិសាស្ត្រជាក់លាក់របស់វា។

បើតាមប្រធានសមាគមរូបនេះ កិច្ចប្រជុំនេះ មានគោលបំណង រៀបចំការពិគ្រោះ​យោបល់​ស៊ី​ជម្រៅនៅមូលដ្ឋានក្នុងខេត្តកំពង់ធំជាមួយភាគីពាក់ព័ន្ធ និងអាជ្ញាធរមូលដ្ឋាននៃខ្សែច្រវាក់​តម្លៃរបស់​ផលិតផលសម្គាល់ភូមិសាស្ត្រ ដើម្បីជំរុញការ​បង្កើតសមាគមសម្គាល់​ភូមិសាស្ត្រទំនិញ ព្រមទាំងសម្រេចបានវឌ្ឍនភាពសំខាន់ៗលើសៀវភៅបន្ទុក និងការរៀបចំសេចក្តីព្រាងបទបញ្ជា ផ្ទៃក្នុងនិងលក្ខន្តិកៈរបស់សមាគម។

ជាមួយនឹងគំនិតផ្តួចផ្តើមនេះ កម្ពុជាបន្តកិច្ចខិតខំប្រឹងប្រែង​ដ៏ទូលំទូលាយរបស់​ខ្លួនក្នុង​ការលើក​កម្ពស់ផលិតផល GI ដែលជាមធ្យោបាយមួយដើម្បីកសាងមោទនភាពជាតិ ធានាបាននូវស្តង់​ដារគុណភាព និងជំរុញការប្រកួតប្រជែងនៅក្នុងទីផ្សារពិភពលោក៕