ក្រុមឧទ្ទាមមីយ៉ាន់ម៉ា ចាប់ពង្រាត់អ្នកនេសាទបង់ក្លាដែស ២៦ នាក់

យោងតាមការចេញផ្សាយរបស់សារព័ត៌មាន asianews. network នៅថ្ងៃទី២៥ខែសីហា កងទ័ព Arakan ដែលប្រឆាំងរបបយោធាមីយ៉ាន់ម៉ា ត្រូវបានចោទប្រកាន់ថា បានចាប់ពង្រត់អ្នកនេសាទជនជាតិបង់ក្លាដែស ២៦ នាក់ ពីមាត់ទន្លេ Naf ក្នុងទីក្រុង Cox’s Bazar ព្រំដែនរវាងប្រទេសទាំងពីរ។

ក្រុមអ្នកនេសាទដែលត្រូវបានចាប់ពង្រាត់ទាំងនោះមានកាលពីថ្ងៃទី ១៣ខែសីហា ចាប់បានអ្នកនេសាទ ១៤ នាក់និងការចាប់ពង្រាត់ចុងក្រោយនៅថ្ងៃទី២៣ខែសីហាដែលចាប់បានអ្នកនេសាទ១២ នាក់បន្ថែមទៀត។

ក្រុមមន្ត្រីបាននិយាយថា អត្តសញ្ញាណជនរងគ្រោះចុងក្រោយនេះ មិនទាន់ត្រូវបានបញ្ជាក់នៅឡើយទេ ខណៈដែលម្ចាស់ទូកក្នុងតំបន់បានព្រមានថា ការវាយប្រហារម្តងហើយម្តងទៀតកំពុងបង្កើតការភ័យស្លន់ស្លោនៅក្នុងសហគមន៍នេសាទ។

ការចាប់ពង្រាត់ទាំងនេះបានកើតឡើង បន្ទាប់ពីការចាប់ជំរិតអ្នកនេសាទ ៥នាក់ កាលពីថ្ងៃទី១២ ខែសីហា ដែលនៅតែមិនទាន់ដោះស្រាយបាន។ អាជ្ញាធរ​បង់ក្លាដែសកំពុង​ធ្វើ​ការ​ដើម្បី​ដោះស្រាយ​ស្ថានការណ៍ ហើយ​ថ្នាក់​ដឹកនាំ​មូលដ្ឋាន​កំពុង​អំពាវនាវ​ឱ្យ​មាន​ការ​គាំទ្រ​ពី​រដ្ឋាភិបាល​ជា​បន្ទាន់ ដើម្បី​ធានា​សុវត្ថិភាព​អ្នក​នេសាទ។

គួរបញ្ជាក់ថាព្រំដែនរវាងមីយ៉ាន់ម៉ា និងបង់ក្លាដែស គឺជាព្រំដែនដីគោក និងដែនសមុទ្រអន្តរជាតិ មានប្រវែង ២៧១.០ គីឡូម៉ែត្រ ដែលលាតសន្ធឹងពីឈូងសមុទ្រ Bengal នៅភាគខាងត្បូងដល់ចំណុចបីជាមួយឥណ្ឌានៅភាគខាងជើង។ កាលពីឆ្នាំមុន ក្រុមប្រដាប់អាវុធជនជាតិភាគតិច Arakan បានទទួលការគ្រប់គ្រងលើព្រំដែនមីយ៉ាន់ម៉ាទាំងមូល ដោយបង្កើតស្ថានភាពសន្តិសុខដ៏ស្មុគស្មាញមួយសម្រាប់ប្រទេសបង់ក្លាដែស ដែលជាកន្លែងទទួលជនភៀសខ្លួនរ៉ូហ៊ីងយ៉ាជាងមួយលាននាក់ភៀសខ្លួនចេញពីការធ្វើទុក្ខបុកម្នេញនៅក្នុងរដ្ឋ Rakhine របស់ប្រទេសមីយ៉ាន់ម៉ា៕

អត្ថបទ៖ ប៊ុន សុភាព