លោក ត្រាំ ជំរុញ​ឲ្យ​អឺរ៉ុបបញ្ចប់ការទិញប្រេងពីរុស្ស៊ី

ប្រធានាធិបតីអាមេរិក លោក ដូណាល់ ត្រាំ បានជំរុញប្រទេសអឺរ៉ុប​ឲ្យ​បញ្ឈប់ការទិញប្រេងពីរុស្ស៊ី ក្នុង​អំឡុងការហៅ​ទូរសព្ទ​កាលពីថ្ងៃព្រហស្បតិ៍​ទី​៤​កញ្ញា​ ជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី និងមេដឹកនាំពិភពលោកផ្សេង​ទៀត ដោយព្រមានថា ប្រាក់ចំណូលបែបនេះកំពុងបញ្ឆេះសង្គ្រាមរបស់ទីក្រុងមូស្គូនៅអ៊ុយក្រែន។

កិច្ចប្រជុំ​អនឡាញ​ដែលចូលរួមដោយមេដឹកនាំប្រហែល ២០​រូប​ បានធ្វើឡើងបន្ទាប់ពីកិច្ចប្រជុំផ្ទាល់រវាងប្រធានាធិបតីបារាំង Emmanuel Macron និង​លោក ហ្សេលេនស្គី នៅទីក្រុងប៉ារីស។ មេដឹកនាំមកពីប្រទេសអាល្លឺម៉ង់ ចក្រភពអង់គ្លេស អ៊ីតាលី ជប៉ុន និងប្រជាជាតិផ្សេងទៀត​ដែលហៅថា «សម្ព័ន្ធនៃឆន្ទៈ» ក៏បានចូលរួមផងដែរ។

មន្ត្រីសេតវិមានបាននិយាយថា «ប្រធានាធិបតី ត្រាំ បានសង្កត់ធ្ងន់ថា អឺរ៉ុបត្រូវតែបញ្ឈប់ការទិញប្រេងពីរុស្ស៊ីដែលផ្តល់មូលនិធិដល់សង្រ្គាម ខណៈដែលរុស្ស៊ីបានទទួល ១,១ពាន់លានអឺរ៉ូ (១,២៨​​ពាន់លានដុល្លារ) ក្នុងការលក់ប្រេងឥន្ធនៈឲ្យ EU ក្នុងរយៈពេលមួយឆ្នាំ»។ លោកក៏បានជំរុញដៃគូអឺរ៉ុប​ឲ្យបង្កើនសម្ពាធសេដ្ឋកិច្ចលើប្រទេសចិន ចំពោះអ្វីដែលលោកហៅថាតួនាទីរបស់ទីក្រុងប៉េកាំង ក្នុងការផ្តល់ហិរញ្ញប្បទានដល់សង្គ្រាមរបស់ទីក្រុងមូស្គូ។

ការ​ជំរុញ​នេះ ​បាន​កើត​ឡើង​ខណៈ​កិច្ច​ខិត​ខំ​ប្រឹង​ប្រែង​របស់​លោក ត្រាំ ដើម្បី​បង្កើត​ឲ្យ​មាន​ការ​ចរចា​រវាង​លោក ហ្សេលេនស្គី និង​លោក​ប្រធានាធិបតី​រុស្ស៊ី វ៉្លាឌីមៀរ ពូទីន នៅ​មិន​ទាន់​មាន​ផ្លែផ្កា​​នៅ​ឡើយ។ នៅក្នុងបទសម្ភាសន៍ជាមួយសារព័ត៌មាន CBS News កាលពីល្ងាចថ្ងៃពុធ លោក ត្រាំ បានរៀបរាប់ថា លោកនៅតែមានទំនុកចិត្តថាសង្រ្គាមនឹងបញ្ចប់ «អ្វីមួយនឹងកើតឡើង ប៉ុន្តែពួកគេមិនទាន់រួចរាល់នៅឡើយទេ ប៉ុន្តែអ្វីមួយនឹងកើតឡើង។ យើងនឹងធ្វើវា​ឲ្យ​រួចរាល់»។

លោក ហ្សេលេនស្គី បាននិយាយបន្ទាប់ពីកិច្ចប្រជុំកាលពីថ្ងៃព្រហស្បតិ៍ថា ក្រុមចម្រុះបានពិភាក្សាអំពីការធានាសន្តិសុខសម្រាប់អ៊ុយក្រែន និងការដាក់ទណ្ឌកម្មបន្ថែមទៀតលើប្រទេសរុស្ស៊ី។ លោកបានសរសេរនៅលើ​បណ្ដាញ​សង្គម X ថា «ការគាំទ្រសម្រាប់អ៊ុយក្រែនត្រូវតែកើនឡើង ហើយសម្ពាធលើរុស្ស៊ីត្រូវតែកាន់តែខ្លាំង» ដោយបន្ថែមថា ការងារកំពុងរីកចម្រើនលើកញ្ចប់ទណ្ឌកម្មទី​១៩ ​របស់សហភាពអឺរ៉ុប ដោយប្រទេសជប៉ុនក៏បានរៀបចំវិធានការផងដែរ។

ការអំពាវនាវ​ទាំង​នេះ បានកើតឡើងនៅពេលដែលលោក ពូទីន បានស្វែងរកទំនាក់ទំនងកាន់តែស៊ីជម្រៅជាមួយមហាអំណាចមិនមែនលោកខាងលិច ពោល​គឺ​លោក​បាន​ជួបក្នុងប៉ុន្មានថ្ងៃថ្មីៗនេះជាមួយប្រធានាធិបតីចិន ស៊ី ជីនពីង នាយករដ្ឋមន្ត្រីឥណ្ឌា Narendra Modi និងមេដឹកនាំកូរ៉េខាងជើង គីម ជុងអ៊ុន ដែលបង្កើនការព្រួយបារម្ភសម្រាប់​រដ្ឋធានីវ៉ាស៊ីនតោន និងអឺរ៉ុបអំពីប្លុកប្រឆាំងលោកខាងលិចដែលកំពុងកើនឡើង​មួយ​នេះ៕

ដោយ៖ ឈាង

ចុចអាន៖ Macron បញ្ជាក់ថា ២៦ប្រទេស ឯកភាពបញ្ជូនទ័ពទៅអ៊ុយក្រែន ក្រោយបទឈប់បាញ់