Macron បញ្ជាក់ថា ២៦ប្រទេស ឯកភាពបញ្ជូនទ័ពទៅអ៊ុយក្រែន ក្រោយបទឈប់បាញ់

ក្រោយកិច្ចប្រជុំកំពូល «ក្រុមចម្រុះឆន្ទៈ» នៅវិមានអេលីសេ ក្នុងទីក្រុងប៉ារីស កាលពីថ្ងៃព្រហស្បតិ៍ទី៤ខែកញ្ញាឆ្នាំ២០២៥, ប្រធានាធិបតីបារាំង Emmanuel Macron បញ្ជាក់ថា មានប្រទេសចំនួន២៦ បានឯកភាពបញ្ជូនទ័ពទៅអ៊ុយក្រែន ក្រោយពេលប្រទេសនេះមានបទឈប់បាញ់ជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ BBC, លោក Macron អះអាងថា ទ័ពទាំងនោះនឹងត្រូវដាក់ពង្រាយតាមជើងគោក អាកាសនិងជើងទឹក ដើម្បីធានាសន្តិសុខជូនអ៊ុយក្រែន ក្រោយសង្គ្រាម។

ទោះបីជាយ៉ាងណាក៏ដោយ លោក Macron មិនបញ្ចេញឈ្មោះប្រទេសទាំង២៦នោះជាសាធារណៈទេ គ្រាន់តែបង្ហើបថា សហរដ្ឋអាមេរិក នឹងមិនបញ្ជូនទ័ពជើងគោកទេ ប៉ុន្តែនឹងរួមចំណែកគាំទ្រផ្នែកអាកាស ចែករំលែកការណ៍សម្ងាត់ និងដើរតួជាអ្នកសម្របសម្រួល។

ទន្ទឹមនោះ ប្រធានាធិបតីបារាំងក៏សង្កត់ធ្ងន់ដែរថា កងកម្លាំងនេះមិនមែនចង់ប្រឈមមុខជាមួយរុស្ស៊ីឡើយ ពោលគឺគ្រាន់តែទប់ស្កាត់ការវាយលុកនាពេលអនាគត ក្រោយបទឈប់បាញ់ប៉ុណ្ណោះ  ហើយក៏មិនដាក់ពង្រាយនៅជួរមុខដែរ។

ចំណែក ប្រមុខដឹកនាំរដ្ឋាភិបាលទីក្រុងកៀវ វ៉ូឡូឌីមៀរ ហ្សេលេនស្គី បានចាត់ទុកសកម្មភាពនេះថាជា «ជ័យជម្នះ» និងជាជំហានជាក់ស្តែងដ៏សំខាន់មួយឆ្ពោះទៅរកការការពារអ៊ុយក្រែនក្រោយជម្លោះ។

យ៉ាងណាក្តី ពាក់ព័ន្ធបញ្ហានេះ រុស្ស៊ីព្រមានម្តងហើយម្តងទៀតថា បើអឺរ៉ុបពិតជាដាក់កងរក្សាសន្តិភាពនៅ អ៊ុយក្រែនមែននោះ វានឹងបង្កឲ្យមានសង្គ្រាមធំរវាងណាតូ ជាមួយរុស្ស៊ីជាក់ជាមិនខានឡើយ។

រុស្ស៊ីចាត់ទុកក្រុមចម្រុះទាំងនេះថាជាឧបករណ៍របស់សហរដ្ឋអាមេរិក និងសម្ព័ន្ធមិត្តអឺរ៉ុបរបស់ខ្លួន ដើម្បីអនុវត្តនយោបាយឈ្លានពាន និងគ្រប់គ្រងពិភពលោក៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន​បដិសេធ​សំណើ​របស់ ​ពូទីន សម្រាប់​ជំនួប​​​នៅ​ទីក្រុង​មូស្គូ