ចំនួនអ្នកស្លាប់ក្នុងគ្រោះរញ្ជួយដីនៅអាហ្វហ្គានីស្ថានកើនដល់ជាង២ពាន់នាក់ ចំពេលខ្វះខាតជំនួយ

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី ០៥ ខែកញ្ញាមន្ត្រីតាលីបង់បានបញ្ជាក់ថា ចំនួនអ្នកស្លាប់ដោយសារគ្រោះរញ្ជួយដីកម្រិត ៦.០រ៉ិចទ័រ នៅភាគខាងកើតប្រទេសអាហ្វហ្គានីស្ថាន បានកើនឡើងដល់ជាង ២,២០០នាក់ហើយ ខណៈដែលក្រុមផ្តល់ជំនួយ នៅតែព្យាយាមឆ្លើយតប។

គ្រោះរញ្ជួយដីនេះបានបំផ្លិចបំផ្លាញខេត្ត Kunar ដែលផ្ទះស្ទើរតែទាំងអស់ត្រូវបានខូចខាត ឬបំផ្លាញ ទុកឱ្យអ្នករស់រានមានជីវិតគ្មានទីជម្រក អាហារ ឬថ្នាំពេទ្យ។

កិច្ចខិតខំប្រឹងប្រែងសង្គ្រោះត្រូវបានរារាំងដោយដីរដាក់រដុប បំណាក់ដី និងការកាត់ថវិកាយ៉ាងធ្ងន់ធ្ងរ។ ក្នុងពេលជាមួយគ្នានេះក្រុមប្រឹក្សាជនភៀសខ្លួនន័រវេសបានរាយការណ៍ពីគម្លាតថវិកាចំនួន ១.៩ លានដុល្លារ ដោយមានតែបុគ្គលិក និងការផ្គត់ផ្គង់តិចតួចប៉ុណ្ណោះដែលអាចរកបាន។ បុគ្គលិកជំនួយនិយាយថា អ្នករស់រានមានជីវិតត្រូវការតង់ ទឹកស្អាត និងការថែទាំសុខភាពជាបន្ទាន់។

គួរបញ្ចាក់ថាគ្រោះមហន្តរាយនេះបានធ្វើឱ្យកាន់តែធ្ងន់ធ្ងរនូវវិបត្តិគ្រោះរាំងស្ងួត ការដួលរលំសេដ្ឋកិច្ច និងការវិលត្រឡប់របស់ជនភៀសខ្លួនយ៉ាងច្រើនរបស់ប្រទេសអាហ្វហ្គានីស្ថាន ដែលទីភ្នាក់ងារផ្តល់ជំនួយពិពណ៌នាថាជាវិបត្តិបន្ថែមលើវិបត្តិ៕

អត្ថបទ៖ ប៊ុន សុភាព