ព័ត៌មានអន្ដរជាតិ

Macron បញ្ជាក់ថាទណ្ឌកម្មរបស់ UN លើអ៊ីរ៉ង់អាចនឹងដាក់ឡើងវិញ

បានផុស

៩ ខែ មុន

នៅ

ថ្ងៃសុក្រ ១៩ កញ្ញា ២០២៥

ដោយ

យោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី១៩ខខែកញ្ញា ប្រធានាធិបតីបារាំងលោក Emmanuel Macron បានបញ្ជាក់ថា ទណ្ឌកម្មអន្តរជាតិលើប្រទេសអ៊ីរ៉ង់ទំនងជាត្រលប់មកវិញនៅចុងខែកញ្ញា បន្ទាប់ពីកិច្ចចរចានុយក្លេអ៊ែរជុំចុងក្រោយរបស់អឺរ៉ុបជាមួយអ៊ីរ៉អ់ បរាជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចក្រភពអង់គ្លេស បារាំង និងអាឡឺម៉ង់ ដែលត្រូវបានគេស្គាល់ថាជា E3 បានបង្កឱ្យមានដំណើរការ «snapback» រយៈពេល ៣០ ថ្ងៃកាលពីចុងខែសីហា ដែលត្រូវធ្វើឡើងដើម្បីស្តារទណ្ឌកម្មរបស់អង្គការសហប្រជាជាតិ ប្រសិនបើអ៊ីរ៉ង់មិនបំពេញលក្ខខណ្ឌត្រឹមត្រូវ។

E3 បានផ្តល់ការពន្យាពេលដល់ទៅ៦ខែ ប្រសិនបើអ៊ីរ៉ង់អនុញ្ញាតឲ្យអ្នកត្រួតពិនិត្យនុយក្លេអ៊ែររបស់អង្គការសហប្រជាជាតិចូលត្រួតពិនិត្យ ឃ្លាំងផ្ទុកសារធាតុអ៊ុយរ៉ាញ៉ូមដែលចម្រាញ់រួចរបស់ប្រទេសនេះ ហើយយល់ព្រមពិភាក្សាជាមួយសហរដ្ឋអាមេរិក។ ទោះយ៉ាងណាក៏ដោយ លោក Macron បាននិយាយថា ការឆ្លើយតបចុងក្រោយរបស់អ៊ីរ៉ង់ បង្ហាញពីចេតនាមិនសហការ។

រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយថា លោកបានផ្តល់ឱ្យមេដឹកនាំអឺរ៉ុបនូវផែនការមួយ ដែលអាចទប់ស្កាត់វិបត្តិ ប៉ុន្តែលោកមិនបានពន្យល់ពីអ្វីដែលមាននៅក្នុងនោះទេ។ មន្ត្រីអឺរ៉ុបបានឆ្លើយតបថា ពួកគេមិនបានឃើញការវិវឌ្ឍន៍ពិតប្រាកដច្រើននោះទេ ខណៈពួកគេនៅតែមានឆន្ទៈក្នុងការពិភាក្សាប្រសិនបើអ៊ីរ៉ង់ផ្លាស់ប្តូរវិធីសាស្រ្តរបស់ខ្លួន។

រោងចក្រថាមពលនុយក្លេអ៊ែរ Bushehr នៅខាងក្រៅទីក្រុង Bushehr ភាគខាងត្បូងប្រទេសអ៊ីរ៉ង់។ (រូបភាព៖ AP)

ជំហានបន្ទាប់គឺការបោះឆ្នោតនៅក្រុមប្រឹក្សាសន្តិសុខអង្គការសហប្រជាជាតិនៅថ្ងៃសុក្រនេះ ថាតើត្រូវលុបចោលទណ្ឌកម្មរបស់អង្គការសហប្រជាជាតិលើអ៊ីរ៉ង់ជាអចិន្ត្រៃយ៍ឬអត់។ ប៉ុន្តែអ្នកការទូតនិយាយថា ដំណោះស្រាយនឹងបរាជ័យ ដោយសារតែមិនសូវមានប្រទេសគាំទ្រអ៊ីរ៉ង់ ឬដោយសារសហរដ្ឋអាមេរិក អង់គ្លេស ឬបារាំងនឹងរារាំងវា។ ប្រសិនបើវាបរាជ័យ ទណ្ឌកម្មចាស់របស់អង្គការសហប្រជាជាតិលើអ៊ីរ៉ង់នឹងចូលជាធរមានដោយស្វ័យប្រវត្តិ.

គួរបញ្ជាក់ថាទណ្ឌកម្មរបស់អង្គការសហប្រជាជាតិ គឺជាការរឹតបន្តឹងដែលអង្គការសហប្រជាជាតិដាក់លើប្រទេសដែលបំពានច្បាប់អន្តរជាតិ ដូចជាការហាមឃាត់ការលក់អាវុធ ដែនកំណត់ពាណិជ្ជកម្ម បង្កកទ្រព្យសម្បត្តិ និងបម្រាមការធ្វើដំណើរសម្រាប់មន្ត្រី។ ពួកវាត្រូវបានដាក់លើប្រទេសអ៊ីរ៉ង់នៅចន្លោះឆ្នាំ ២០០៦ និង ២០១០ ជុំវិញការសង្ស័យថា អ៊ីរ៉ង់កំពុងព្យាយាមបង្កើតអាវុធនុយក្លេអ៊ែរ ទោះបីជាមានការអះអាងពីការប្រើប្រាស់ដោយសន្តិវិធីក៏ដោយ។ ក្នុងឆ្នាំ ២០១៥ទណ្ឌកម្មជាច្រើនត្រូវបានដកចេញក្រោមកិច្ចព្រមព្រៀងនុយក្លេអ៊ែរ (JCPOA) ប៉ុន្តែឥឡូវនេះពួកគេអាចត្រលប់មកវិញបន្ទាប់ពីអ៊ីរ៉ង់បានបង្កើនការចម្រាញ់សារធាតុអ៊ុយរ៉ាញ៉ូមច្រើនលើសកម្រិតអនុញ្ញាត៕

អត្ថបទ៖ ប៊ុន សុភាព

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា