ចិន​កាត់ទោស​ប្រហារជីវិត​សមាជិក​ក្រុម​អ្នកលេង១៦នាក់ ដែលបង្កើតកន្លែងឆបោកតាមអ៊ីនធឺណិតក្នុងប្រទេសមីយ៉ាន់ម៉ា

យោងតាមការចេញផ្សាយរបស់សារព័ត៌មាន CNA កាលពីថ្ងៃទី២៩ ខែកញ្ញា តុលាការ​ចិន​បាន​កាត់ទោស​ប្រហារជីវិត​សមាជិក​ក្រុម​ឧក្រិដ្ឋជនដ៏​មាន​ឥទ្ធិពល​ចំនួន ១៦ នាក់​ពី​បទ​ប្រតិបត្តិការ​មជ្ឈមណ្ឌល​ឆបោក​ដោយ​ហិង្សា​ក្នុង​តំបន់ Kokang ប្រទេស​មីយ៉ាន់ម៉ា។

ក្រុមអ្នកលេងនេះសកម្មតាំងពីឆ្នាំ ២០១៥ មកម្លេះ ដោយបានប្រើប្រាស់កម្លាំងប្រដាប់អាវុធដើម្បីដំណើរការប្រតិបត្តិការបោកប្រាស់តាមអ៊ីនធឺណិត ជួញដូរគ្រឿងញៀន កាស៊ីណូ និងពេស្យាចារ ដែលប្រមូលលុយបានជាង ១០ ពាន់លានយន់ (១.៤ ពាន់លានដុល្លារ)។

អាជ្ញាធរចិនបាននិយាយថា ក្រុមអ្នកលេងបានសម្លាប់មនុស្ស ១៤នាក់ រួមទាំងកម្មករដែលព្យាយាមរត់គេចខ្លួន។ ក្នុងនោះមានករណីមួយបានកើតឡើងក្នុងឆ្នាំ ២០២៣ ដោយសមាជិកក្រុមនេះបានបើកការបាញ់ប្រហារដើម្បីបញ្ឈប់កម្មករពីការធ្វើមាតុភូមិនិវត្តន៍ទៅកាន់ប្រទេសចិនវិញ។

ក្រៅពីសមាជិក ១៦ នាក់ត្រូវបានកាត់ទោសប្រហារជីវិត មនុស្ស ៥ នាក់បានទទួលបានការបន្ធូរបន្ថយទោសប្រហារជីវិតរយៈពេល ២ ឆ្នាំ ហើយ ២៣ នាក់ផ្សេងទៀតត្រូវបានកាត់ទោសឱ្យជាប់គុកពី ៥ ឆ្នាំទៅមួយជីវិត។

គួរបញ្ជាក់ថាការបង្រ្កាបនេះកើតឡើងចំពេលមានយុទ្ធនាការកាន់តែទូលំទូលាយរបស់ទីក្រុងប៉េកាំងជាមួយបណ្តាប្រទេសអាស៊ីអាគ្នេយ៍ដើម្បីរុះរើបណ្ដាញក្រុមឆបោកឆ្លងព្រំដែនដែលចរាចរមនុស្សរាប់ពាន់នាក់ភាគច្រើនជាជនជាតិចិនចូលទៅក្នុងការឆបោកតាមអ៊ីនធឺណិត។

អង្គការសហប្រជាជាតិបានព្រមានថាបណ្តាញបោកប្រាស់បែបនេះរកលុយបានរាប់សិបពាន់លានដុល្លារជារៀងរាល់ឆ្នាំ ហើយឥឡូវនេះកំពុងដំណើរការនៅទូទាំងពិភពលោក ដោយមានមនុស្សរាប់សែននាក់ជាប់ក្នុងលក្ខខណ្ឌការងារដែលរំលោភបំពាន។ គិតត្រឹមខែមេសា ឆ្នាំ ២០២៥ប្រទេសចិនបានធ្វើមាតុភូមិនិវត្តន៍ជនរងគ្រោះប្រហែល ៧ ពាន់ នាក់ពីប្រទេសមីយ៉ាន់ម៉ា៕

អត្ថបទ៖ ប៊ុន សុភាព