កម្ពុជា​ទទួល​បាន​ចំណូលជិត $៨០០ ​លាន​ ​ពី​ការ​នាំ​ចេញ​គ្រាប់ស្វាយ​ចន្ទី​

គិតចាប់ពីខែមករា ​ដល់ខែសីហា ​ឆ្នាំ ២០២៥ ក​ម្ពុជារកចំណូលបានប្រមាណជិត ៨០០ លានដុល្លារ (៧៩០) ពីការនាំ​ចេញ​គ្រាប់​ស្វាយ​ចន្ទី ​កើនឡើង ៦០,៥៥% ​ធៀបនឹងរយៈពេល​ដូចគ្នានៅឆ្នាំ ២០២៤។ នេះបើយោងតាមរបាយ​ការណ៍​របស់​ក្រសួង​ពាណិជ្ជកម្ម។

​លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីថា ​ទីផ្សារ​តម្លៃ​ និង​ទិន្នផល​គ្រាប់​ស្វាយចន្ទី​នៅ​តែ​បន្ត​មាន​ភាព​ល្អ​ប្រសើរ​នៅ​ឆ្នាំ ​២០២៥ ថ្វីបើមានការធ្លាក់ភ្លៀងច្រើន ដែលធ្វើឱ្យ​គុណ​ភាពចន្ទីធ្លាក់​ចុះ​បន្តិច។ ​

លោក អួន ស៊ីឡុត បន្ថែមថា តម្លៃគ្រាប់ស្វាយចន្ទីនៅតែមានភាពល្អប្រសើរចាប់តាំងពីខែមេសា ដែលគ្រាប់សើមមានតម្លៃ ៥០០០ រៀល ក្នុងមួយគីឡូក្រាម នៅក្នុង​ខែមេសា ហើយគ្រាប់ស្ងួតលក់បាន ៦៥០០ រៀល នៅខែ​ឧសភា នៅខែមិថុនា គ្រាប់ស្វាយចន្ទីស្ងួត លក់បានតម្លៃ ៧២០០ រៀលក្នុងមួយ​គីឡូ​ក្រាម និងខែសីហា លក់បាន ៦៨០០ រៀលក្នុងមួយគីឡូក្រាម។ ​

លោក អួន ស៊ីឡុត យល់ឃើញថា៖ «កម្ពុជាត្រូវមានយន្តការច្បាស់​លាស់ទើបរក្សាតម្លៃគ្រាប់ស្វាយ​ចន្ទីឆៅ​ឱ្យមានស្ថេរភាពជូនដល់កសិករ ដោយយន្តការចម្បងគឺគាំ​ទ្រការ​បង្កើត​​​​រោង​ចក្រកែច្នៃក្នុង​ស្រុក​ឲ្យបានច្រើន តាម​គោលនយោបាយជាតិស្ដីពីស្វាយ​ចន្ទីដែល​បានកំណត់ ២៥% រវាងឆ្នាំ ២០២២-២០២៧»។

​លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា រាជ​រដ្ឋាភិបាលកំពុងអភិវឌ្ឍហេដ្ឋារចនាសម្ព័ន្ធ សួនឧស្សាហកម្មស្វាយចន្ទីនៅខេត្តកំពង់ធំ ដើម្បី​ជំរុញ​ការ​អភិវឌ្ឍន៍វិស័យ​ស្វាយចន្ទីកម្ពុជា។

​លោក ឃឹម ហ្វីណង់ បន្ថែមថា៖ «បច្ចុប្បន្នអ្វីៗ នៅល្អប្រសើរទាំងអស់ រាល់ទនិន្ន័យ​ដែលយើង​មាន មិនថាទិន្នផល តម្លៃ មិនថាគោលនយោបាយ និងការគាំទ្រពីរដ្ឋាភិបាល ទាំងសហគមន៍​កសិ​កម្ម​ទំនើប ក៏ដូចជាការរៀបចំសួនឧស្សាហកម្មកែច្នៃ ដើម្បីតម្លៃបន្ថែម សុទ្ធតែជារឿងល្អ ខ្ញុំអត់​មាន​ឃើញ​សញ្ញាបារម្ភពាក់ព័ន្ធបញ្ហាតម្លៃចន្ទីទេ»។

នៅឆ្នាំ ២០២៤ កម្ពុជា​សម្រេច​​បានការ​ប្រមូលទិន្នផលគ្រាប់​ស្វាយ​ចន្ទី​ចំនួន ៨៥ ម៉ឺនតោន ក្នុង​នោះ​​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើន​ឡើង ២១% គិត​ជា​ទឹក​ប្រាក់​​ ១ ពាន់ ១៥០ លាន​ដុល្លារ កើន ២៦,១៥%។ ក្នុងនោះ​នាំចេញ​ទៅវៀត​ណាមចំនួន ៧៩ ម៉ឺន ៥ ពាន់​តោន។ នេះបើយោងតាមរបាយការណ៍សមាគមស្វាយចន្ទីកម្ពុជា៕

អត្ថបទ៖ ឡេង ដេត